مسح سند عيونه .. يحس بصداع وهو يرفع راسه ونادى بصوت خفيف
- جولان ؟
فتح عيونه وطالع بالغرفة .. هو مو بغرفتهم .. هو فين ؟
طالع بالكوميدينو وسحب جواله وتحرك لرقم جولان ودق عليه وهو فعليا شبه نايم للان
جولان رد بسرعة بصوت تعبان
- سند !
سند ابتسم لما سمع صوت جولان ورجع راسه على المخدة
- لساتك .. بالدوام ؟ .. وحشتني .. ليش تركتني انام بدونك ؟
جولان فز ووقف .. هو ما نام .. هو ظل بالصالة ينتظر سند يرجع او اي شي يصير ..
- ا .. أجيك ؟
سند ضغط الجوال على اذنه وصوت انفاسه كانت واضحة
- تعال
جولان تحرك ونزل من الشقة بدون ما يفكر في اي شي .. هو حتى ما غير او سحب شي من اغراضه .. هو خرج ومعاه مفتاح سيارته وجواله بأذنه للان
- انت كويس ؟
سند تكلم بشوية انزعاج
- مدري .. احسني .. مو طبيعي .. ما اخذت .. ما اخذت حبوبي من زمان .. هيا .. هيا تخلي افكاري .. مدري كيف
جولان بلع ريقه وهو يتحرك بالسيارة
- تتذكر شي .. عن امس ؟
سمع صوت خشخشة وواضح الجوال طاح جنب المخدة لانو صوت سند صار شوي بعيد
- مدري .. بس .. ابغاك هنا ..
جولان دق قلبه وهو يشيك على الخريطة .. سند بشقة سلطان .. هو مستعد يتضارب مع سلطان بس .. صوت سند مو طبيعي .. كأنه مو واعي .. كأنه مو مستوعب شي من اللي حوله وذا الشي مخوف جولان .. مخوفه انو سند يجرب يتحرك ويطلع من الشقة لمكان ثاني واحد يأذيه
جولان رجع مسك الجوال وقربه من فمه عشان يبغى سند يسمعه
- حبيبي .. سند .. خليك مكانك انا جايك طيب .. لا تقوم من مكانك
سند انقلب فوق السرير وطالع في السقف .. هو بيفتح عيونه ويغمضها .. في حاجات مختلفة جالس يشوفها على السقف .. وضحك بشكل غبي وهو يرفع يده للسقف
- جولي ..
جولان وقف السيارة وطالع بالعمارة .. هو ما يعرف اي دور .. سحب جواله ودق على رقم انس .. انس دايما يرد .. دايما !
وفعلا انس رد عليه بصوت يوضح انو لسه نايم
- خير ؟
جولان بلع ريقه وتكلم وهو ضغط على زر المصعد عشان ينزله
- شقة سلطان بأي دور ؟
انس عقد حواجبه وهو يرفع راسه من فوق صدر سلطان اللي فتح عيونه بانزعاج لانو انس بعد يد سلطان اللي كانت فوقه وجلس على الكنبة
- ايش تبغى بالدور ؟
جولان زعق
- جاوبني بسرعة ! .. سند دق علي وهو مو طبيعي
انس تفاجئ والتفت يطالع سلطان
- سند مو طبيعي ؟! ..
سلطان فز وقام من فوق الكنبة سحب بنطلونه ولبسه بشكل مستعجل وفتح باب الغرفة وتحرك لغرفة سند بينما انس تكلم
- الدور الثالث .. بفتحلك الباب فما يحتاج اعطيك رقم الشقة
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
