عامر قلب عيونه وهو يوقف ويطالع الخزنة .. ملاحظة لنفسه .. لا تطعن احد وتسحبه للخزنة مرة ثانية ! .. يعني كمية التنظيف اللي سواها كانت سيئة .. وذا غلطه .. لانو يبغى يحتفظ براجس عايش .. لو ابوه لقى قطرة دم بيهزأه وهو مو ناقص ابدا !
جمع الفلوس اللي دم راجس كان متناثر عليها .. الحيوان كأنه كان بيحاول يحط دمه على كل ريال بداخل الخزنة ! .. طبعا عامر يعرف كيف ينظفهم .. بينقعهم فترة بكحول او الطريقة الاسهل .. يحط المبلغ في شنطة ويسوي حادث .. حادث مفتعل طبعلا وتقرير مضروب من المستشفى عشان يودي الفلوس لمؤسسة النقد يبدلها بفلوس جديدة ..
يب كذا هو يقدر يحل كل شي .. دحين يحتاج يرجع ينظف جسم راجس .. ومنها يشيك على جسمه .. لو عنده وشم زي انس بيكون مثير .. او يمكن عامر يوشمله .. من زمان اشترى المكينة وعمره ما جربها على احد فيمكن يكتشف انو رسام وشوم محترف من اول تجربة ! .. مو كأن في احد بيشوف جسم راجس .. مو بعد ما صار بين يده
تحرك لغرفته وسحب ملابس جديدة .. ملابسه معدومة حاليا وبيفضل يجهز ملابسه لبعد ما يروش راجس .. اكيد بيتبلبل لما يدخل في الموية مع راجس .. ويمكن يحتاج هو كمان اصلا يستحما والفكرة ذي كانت عاجبته .. تجربة بسيطة للعبة الجديدة اللي بيقضي وقته عليها الفترة الجاية
خرج من غرفة بعد ما جهز ملابسه وتحرك للحمام .. قلب عيونه لما شاف قطرات موية برة الحمام .. واضح انو راجس جالس يحلم انو يغرق وتحرك جسمه .. المهم ما يدخل ويشوفه ميت ! .. مو بعد ما حط كل ذيك الخطط له !
دف باب الحمام وهو يتكلم بصوته
- رجوس .. لا تقولي انك مت ؟!
بس تفاجئ لما الحوض كان فاضي .. عقد حواجبه وبسرعة تحرك ورى الباب و .. مافي احد
طالع في الموية اللي على الارض .. راجس مستحيل يتحرك لوحده .. هل الجرعة ما كانت كفاية ؟! .. بس عامر يعرف كيف يجهز الجرعات .. في النهاية هو طالب تمريض المفروض تخرج من ٣ سنين بس هو مطول بالجامعة عشان يقدر يطول في الجامعة !
طالع في اثار الموية بالارض الاثار في حدود الحمام .. بس هو شافها قدام الباب .. رفع عيونه للمناشف .. في منشفة مفقودة .. حتى لو لفها على نفسه ما بيقدر يخبي كمية الموية الكبيرة .. اللي لو فصخ ملابسه !
ابتسم عامر وهو يطلع من الحمام .. لو مسك راجس وهو عاري بالفيلا .. حيمارس معاه مكان ما يلقها .. ذا الوعد الوحيد اللي يقدر يضمنه !
طلع الدرج لانو اقرب مكان من الحمام وفي شوية قطرات موية على الدرجات فيمكن راجس طلع ومسح الموية اللي وراه وتكلم عامر وهو يبتسم
- رجوووووس .. مكان ما تكون فانا جايك ! .. يحتاج اعد ؟ .. واحد طش .. اثنين طش .. ثلاثة طش ..
راجس كان مغطي يدينه بفمه .. لمجرد ما سمع خطوات عامر تبعد عن الباب هو بعد يده عن فمه وحاول يتنفس بهدوء .. جسمه لسه ثقيل .. بس وعيه كامل .. هو عارف هو فين وايش لازم يسوي .. يتذكر الفيلا لما دخل .. هو بعيد عن المدخل الرئيسي بس الباب الخلفي .. الفلل متصلة سوا من ناحيت الموية .. لو وصل لهناك بقدر ينط على الفيلا اللي بالجنب .. بيطلب من اي احد يدق على الشرطة ووقتها بيكون بخير .. هو يحتاج يتحرك بحذر بس
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
