نواف قفل باب السيارة وطالع برازي
- ماله اثر وللان جواله مقفل
رازي حط راسه على الكبوت وهو يغمض عيونه
-فين اختفوا ؟
نواف طبطب على ظهر رازي
- اكيد بيداوم سلطان بكرة .. فصدقني بمسكه من حلقه استوجبه وقتها
رازي اخذ نفس عميق ورفع راسه
- صدقني لو ما كنت ادور على انس زي ال٢٩ سنة اللي فاتت كنت لقيته !
نواف ابتسم وممل يطبطب على ظهر حبيبه
- في حاجات ما نلقاها إلين هيا تقرر انها تبغانا نلقاها
رازي رجع غمض عيونه .. لو ما قال كلامه السخيف كان مداه يكلم راجس وياخذ الرقم .. واكيد لو طلب راشد ياخذ الرقم من راجس بداله بيهزأه وكبرياء رازي حاليا مأجل ذا القرار كحل نهائي لو ما لقى اي طريقة ثانية
ليش كان لازم راجس يعيش بعيد ؟ .. لو العكس طيب .. لو اتأخذ هو مع انس كيف كانت بتكون حياته ؟ .. هل كان بيعيش الحاجات الا راجس تأثر منها .. كان بيعتبر امنية اخته ويبكي عليها زي راجس ؟ .. ولا كان بيصير بارد عديم احساس زي توئمه اللي المفروض يكون اقرب له من نفسه بس هو حايس من امس يدور ولد عم حبيبه عشان يقدر ياخذ رقم اخوه ويكلمه !
سكت للحظات قبل ما يفتح عيونه ويستوعب وهو يزعق
- جولان !
نواف فز وألتفت يطالع حولهم
- فين ؟!
رازي هز راسه ومسك وجه نواف عشان مو وقت فهوته
- جولان .. كان مع راجس .. مسافر .. اكيد يعرف انس .. اكيد معاه رقمه !
نواف اخذ لحظات قبل ما يستوعب وهز راسه
- صح ! .. كيف نسينا !
رازي سحب جواله ودق على جولان وهو يكلم نواف
- جلسنا نلفلف جدة على الفاضي
نواف ابتسم وهو يحط يده على الدركسون ويطالع رازي بدون ما يتحرك بالسيارة
- مافي وقت اقضيه معاك على الفاضي .. كل اوقاتي معاك اعتبرها ثمينة
رازي عض شفايفه وهو يطالع نواف
- كيف تعرف تتكلم كذا ؟
نواف كان حيرد بس صوت جولان قاطعهم
- رازي ؟ .. حصل شي لراجس ؟!
نواف ضحك و رازي غطى عيونه باحراج من وضعهم ومن كل شي حولهم
- لا .. لا هو بخير
جولان عقد حواجبه
- اوك .. غريبة داق علي
رازي بلع ريقه
- ب .. بسألك .. عندك رقم .. انس ؟
جولان سكت لفترة لدرجة انو نواف عقد حواجبه وطالع في الجوال يتأكد انو الاتصال ما انقطع
- جولان ؟
جولان تنهد تنهيدة عميقة
- قابلته ؟
رازي عقد حواجبه وطالع في نواف بشك
- ايوة .. قابلناه .. كلنا تقريبا
جولان صوته بعد للحظات وباين انو بيضرب الجدار ويلعن انس قبل ما يرجع الجوال لاذنه
- ايش تبغى برقمه ؟
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
