انس تنهد وهو يحط راسه على الطاولة وتكلم
- عمرك خليت سامي يعتذر عن شي بدون ما تعلقه مقلوب ٤ ايام الين يجيه نزيف بالدماغ ؟
سلطان رفع حواجبه وهو يرفع عيونه عن جهازه يطالع انس وافكاره انشلت للحظة .. انس بيفكر يعلق راجس مقلوب ؟ .. ٤ ايام ذي وفاة مو نزيف بالدماغ بس انس يحب اخوه فغالبا بيعلقه ٣ ساعات الين يدوخ بعدها ينزله لانو باقي اليوم بيكون صداع وغثيان لراجس الين يروق ثاني يوم ويرجع انس يعلقه ثاني .. يب ذي فكرة انس دارسها كويس وسلطان ما بيشك في كذا ابدا
انس رفع راسه لما حس انو سلطان ساكت
- ترى ما بخليه طول ال٤ ايام معلق !
سلطان قاطعه
- ادري .. كنت بحاول استوعب انا ليش ما علقت سامي للان !
انس ابتسم
- رغم انو سامي يحتاج يتعلق ٧ ايام في اقل تقدير
سلطان حك ذقنه يفكر
- مع اللي سواه لمرهف .. اعتقد شهر بيكون اقل تقدير
انس هز اكتافه
- شغله سهل تمسكه بداله فغياب شهر ما بيأثر كثير عليه اصلا
سلطان هز راسه
- صحيح .. اصلا ايام دوامه بالشرمة تنحسب على الاصابع كل شهر
انس ميل راسه
- انت جالس تتهرب من سؤال بخصوص راجس ؟
سلطان هز راسه بلأ
- ابدا .. بس .. حبيبي .. جرب تكلم رازي بذا الموضوع .. اعرف انت اقربه لراجس .. وانت الوحيد اللي كنت معاه طول طفولته .. بس .. راجس تغير بشكل جذري من يوم ما صار مع رازي وراشد .. وسياف .. فممكن .. ممكن رازي يوضحلك نقطة انا ما حعرف اوضحها .. مقصدي .. انا ماني قريب من راجس بأي شكل .. لو سألتني عن راشد او رازي بقولك كيف تتعامل معاهم بس راجس .. ما قابلته الا صدفة وكم مرة تكلمنا فيها
انس نزل عيونه
- ما ابغى ارجع لرازي في شي يخص راجس
سلطان مسح على ظهر انس
- تتذكر لما قلتلك انك تحتاج تدخل رازي في تفاصيلك ؟ .. ذي جزء من التفاصيل الصغيرة .. ما بقولك سوي اللي بيقوله .. بس اسمع وجهة نظره .. كون فكرة حقيقة عن كيف رازي يطالع للناس والامور
انس تنهد وهو يوقف
- طيب .. بس ما حطبق اللي يقوله !
سلطان ابتسم
- محد بيرغمك تسوي شي انت ما تبغاه
انس ابتسم نص ابتسامته وتحرك يطلع من الغرفة ناحيت غرفة رازي
انس دق باب الغرفة .. نواف جوة مع رازي وايه بيحاول يحسن علاقته بأخوه بس مو لدرجة يشوف اخوه بوضع مخل !
انتظر لحظات قبل ما يفتح نواف الباب وكأنه متوقع جيته .. اوك سلطان ونواف صارو فريق وذا الشي ما يدري انس لو بيعجبه او ينرفزه لانو يكره انو تصرفاته تصير متوقعة او احد يخبر احد عن تحركاته !
نواف تردد يفتح الباب بشكل كامل بس رازي تكلم من وراه
- نواف ..
نواف تنهد وهو يفتح الباب ويبعد عشان يدخل انس ووقف نواف عند الباب عاقد يدينه وهو عاقد حواجبه ويراقب انس
أنت تقرأ
راجس
General Fictionيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
