ثامر تقلب فوق السرير .. طالع في الطاقة وشايف النور برة .. يعرف انو يقدر ينام قد ما يبغى ببيت سلطان .. فرجع غمض عيونه وشد البطانية ناحيته
هل هما كذا من طفولتهم ؟ .. سلطان هو الملجئ الا تقدر تروحلهم وتزعق عليه وتخلص كل عصبيتك عنده وبيتحملك وما يرد عليك - على الاقل مو بنفس اللحظة - وبيظل يتأكد انك بخير إلين تهدأ ؟ .. نواف الطفل اللي مشغول في عالمه بشكل كبير بس برضوا موجود كدعم لأي احد .. عادي تجي تقوله بروح هوشة ويقوم معاك حتى لو يدري انكم انتم الاثنين بتكفخوا إلين تقولو امين بس هو ما يسترك احد جاله .. سند المدلل الا بياخذ كل شي سواء كان من حقه او من حق غيره لمجرد انو انولد في ظروف مختلفة عن الباقين !
فتح ثامر عيونه يطالع سقف الغرفة .. هو ما كان كذا وهو صغير .. كان .. اهدأ .. عايش في عالمه الخاص .. يجمع ألعابه حوله ويراقبهم .. رغم انو فارق العمر بينهم صغير بس كان مختلف .. يمكن لانو الوحيد بيناتهم الا ما كان بنفس اللقب .. كلهم عيال عم .. هو ولد العمة ( يعني كلهم يصيروا عيال خاله وهو ولد عمتهم )
دايما يقولو الاطفال ينجذبوا لأهل امهم .. الا عيلته .. كلهم مع اهل ابوهم .. وهو ضاع بيناتهم .. كان حبيب جدته .. بس مو قد ما تحب سند .. كان عزيز على الكل .. بس مو قد سند
لف وجهه وسحب جواله .. فتح السناب ودخل يشوف سناباتهم .. نواف زي العادة يصور شاشة سودة مع شوية كلام .. احيانا اغنية بالخلفية بس نادر ما يصور نفسه او شخص معاه .. سلطان ما نزل شي جديد .. هو ما ينزل الا صور النادي اصلا واحيانا قهوة الصباح ..
بدون ما يغير السنابات انتقل السناب على الشخص الا بعده واللي كانت سنابات سند .. كشر ثامر وهو يشوف مشهد لامواج تتحرك بشويش مع رمال الشاطئ واغنية " all of me "
رما الجوال ودفن وجهه بالمخدة .. يكتم صرخاته .. المفروض ذي سعادته هو .. سند ما يستاهل يعيش سعيد .. سند يلبه كل شي .. هو اسوء من خالد .. خالد قتلهم بس سند ما قدر حتى يتذكر اماكن جثثهم ! .. فليش الكل حوله ! .. ليش محد قادر يستوعب انو عالم ثامر اللي انهار في الوقت الا سند عرف يتجاوز كل شي ويعيش عادي !
رفع يده وطالع الخاتم اللي ما فصخه .. كان المفروض يلبسه هو .. ثامر لقى العلبة .. وجلس يبكي .. رفض يلبس الخاتم لفترة طويلة .. كان يعتقد انو سليمان فجأة حيظهر من العدم ويلبسه هو .. بس سليمان مات .. فهو مستحيل يرجع يلبسه .. وقتها قرر ثامر يلبس الخاتم وينتقم .. لو هو ما انكتبله يعيش مع حبيبه .. حيضمن انو سند عمره ما حينساه !
رفع ثامر راسه ورجع يطالع في السنابة .. البحر مو باين منه شي بس هو يدري انو لو سأل احد من اعمامه عن مكان سند بيتكلموا .. محد بصفه غير اعمامه اصلا .. حيلحقه .. ايوة .. ما حيخليه يعيش بذي السعادة اللي هو ما يستاهلها
⚜️⚜️⚜️⚜️⚜️
راجس قفل الملف وهو يطالع الدولاب .. هو وسند لازم يتهاوشوا على ذا الترتيب للملفات ! .. يعني مو عشانه ترك المكان شهر يقوم سند يغير ترتيب الملفات كذا ! .. جلس راجس تقريبا ٤ ساعات عشان يعيد الترتيب ويلقى كل الملفات فقط !
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
