راجس

172

زياد بلل شفايفه وهو يفتح طبق الاكل ويطالع طلال اللي كان يبعد اوراقه من فوق الطاولة عشان يترك مساحة افضل ياكلوا فيها
- بسألك بخصوص شي

طلال ما ألتفت وكمل يرتب الاوراق بس ابتسم
- من متى تستأذن قبل السؤال حبيبي ؟

زياد حط الطبق قدام طلال وبعدها رجع جلس مكانه على الناحية الثانية من المكتب وبدأ يفتح طبقه وهو يحاول ما يطالع في حبيبه
- لما .. لما بحثت في ملف قضيتي .. لقيت انو المشتبه فيه .. صغير .. لساته بالعشرين .. بس هو تقريبا اللي جالس يدير شغل ابوه ..

طلال عقد حواجبه وهو يطالع زياد
- اوك يعني العيلة كلها رايحة شمال !

زياد قاوم يضحك وبلع ريقه
- الولد تمشكل كذا مرة مع ناس .. بس كل مرة يظهر محامي للولد ويطلعه من المشكلة

طلال هز راسه وهو يحط الشوكة بالمكرونة
- اوك يعني ابوه مزبطه قانونيا .. حلو كمل

زياد رفع عيونه بشويش يطالع طلال اللي رفع الشوكة والمكرونة مغروسة فيها
- المحامي من هنا .. من مكتبك

طلال وقف الاكل قبل ما يدخلها فمه وطالع في زياد .. رمش مرتين قبل ما ينزل الشوكة وهو عاقد حواجبه
- من هنا ؟! .. ايش اسم الولد ؟! .. اعطيني اسمه دحين بطلع المحامي اللي بيمسك قضيته واجبلك قراره !

قالها وهو يسحب الكيبورد ويبدأ يسجل دخول على جهازه

زياد بلل شفايفه وهو يطالع في طلال
- عامر .. عامر ال ****

طلال وقف يكتب على الكيبورد .. ملامحه تغيرت للحظة قبل ما يتنهد ويترك الكيبورد
- المحامي اللي ماسك قضاياه هو *****

زياد ظل يطالعه بينما طلال كمل يبرر
- اغلب اعمال ذيك العيلة مرتبطة بمكتبنا .. بسبب معرفة ابوي بعادل ..

زياد تكلم
- عادل ؟ .. اللي ربي راجس ؟ .. مو .. مو أهله رفعوا قضية على راجس بس سياف محاميه ؟! .. القضية كانت بين محاميين من نفس المكتب ؟!

طلال رفع يدينه يحركهم
- لا لا لا ! .. رفضنا نمسك ذيك القضية لاسباب عديدة منهم انو اصلا عادي حاط وصيته وموقعها هنا وضمن الوصية طلب انو المكتب يوقف ضد اهله مع راجس !

زياد عقد حواجبه
- ماني فاهم شي !

طلال بلع ريقه وغمض عيونه يرتب افكاره
- ابوي .. وعادل .. بينهم .. امممم كيف اصيغها .. اتفاق قديم .. عادل سوا شي عشان خاطر ابوي .. وابوي ممتن لعادل بسبب ذاك الشي للان ! .. فهو ما ياخذ شي من عادل مقابل بعض الخدمات .. عادل كان يعرف انو اهله بيقلبوا على راجس ولانو رباه وحبه كأنه ولده هو قرر يحميه .. يحميه بطرق كثير ومنها انو المكتب هو المسؤول عن قضيته

زياد
- كيف يحميه بطرق كثيرة ؟! ..

طلال هز اكتافه
- شغله بالسفارة .. الاملاك اللي بتتحول لاسم راجس برة .. الشقة اللي كانت ملك لعادل هنا بجدة .. وحساب استثماري ووثيقة تأمين الحياة تبع عادل اللي مبلغها مو بسيط .. ما اعتقد سياف شرح كل ذا لراجس وانا ما حذكر سياف بكل ذا لانو .. لو راجس عرف انو عادل تركله كل ذا ما اعرف ايش بيصير في احساسه