راجس

137

سلطان مسح وجهه بيده وهو يطالع انس
- ذي خطتك ؟ ..

انس هز راسه
- كل الاوراق بتطلع كذا و .. وبقدر اطلع امي من السالفة

سلطان رجع ظهره على الكنب وهو عاقد حواجبه
- متى كنت بتعطي فرصة لأي شي بيننا ؟ .. بخطتك ذي ما فيها احنا ابدا .. ولا حينفع يكون فيها احنا

عض انس شفايفه وبعد وجهه
- ب .. بعدها .. بعد ما اخلصها .. بنكون وصلنا المرحلة اللي تخلينا نقدر .. نكون سوا

سلطان اخذ نفس عميق
- تبغاني انتظرك ؟

انس بلع ريقه بشويشة توتر
- م .. معرف

سلطان مد يده وحطها على خد انس اللي تفاجئ وتكلم
- ما اقدر

انس طالع في سلطان دقيقة قبل ما يرجع ينزل عيونه ويتكلم بهدوء
- اوك .. بتفهم .. قرارك

سلطان هز راسه ورفع يده الثانية يحاوط وجه انس
- انت ما فهمتني

انس رفع عيونه يطالع بسلطان
- قلت انك ما تقدر .. تنتظرني و ..

سلطان قاطعه وهو يسحب وجهه ناحيته بهدوء
- ما قلت اني مقدر انتظرك .. مقدر اسيبك تسوي كل ذا واظل واقف انتظرك ..

انس غمض عيونه بشويش وسلطان حط جبينه على جبين انس
- ما ابغى اخسرك قبل ما اخذك

انس بلع ريقه
- ما بتخسرني

سلطان
- خطتك ممكن تموت فيها ٧٠ مرة

انس فتح عيونه
- بس اعرف اطلع منها

سلطان طالع بعيون انس .. بذا القرب بتقدر تتوه فيها وفي خطوطها اللي كانت عبارة عن متاهة بدون مخرج
- ما اقدر اوقف عند المخرج انتظرك ..

انس طالع بعيون سلطان
- ذي مو اول مهمة امسكها .. ذا شغلي سلطان .. اني اتعامل مع ناس كذا .. ذي طبيعة حياتي اللي انكتبت ليا

سلطان عقد حواجبه
- محد يحقله يكتب حياتك عنك

ابتسم انس بسخرية
- حياتي انكتبت من اللحظة اللي سلمتني فيها الداية لعادل

سلطان بلع ريقه وغمض عيونه .. يبغى يفهم اكثر .. بس انس عبارة عن بير .. بير ممكن تغرق فيها بسرعة وفي لحظات ممكن تقلب عليك وتحسسك انك وسط البحر بتقلباتها

قاطعة صوت جوال انس اللي دق فخلاه يبعد عن سلطان شوي ويسحب الجوال يطالع الرقم قبل ما يرفع حاجبه .. كيف وصل رقمه لرازي ؟ ..

قلب عيونه بانزعاج وهو يفتح الخط ويتكلم بدون ما يسمع لرازي
- الرقم غلط لعد تدق علي
وقفل في وجهه

سلطان تراجع شوي وبعد عن انس ورجع ظهره على الكنب يغرق في افكاره وفي كلمات انس اللي قالها ورما قنبلته في وسط حياة سلطان .. للحظة لمع اسم في باله فرفع راسه وطالع في انس
- اعرف شخص .. ممكن .. يساعد