راجس

166

انس عقد حواجبه لما شاف شخص غريب يسوق السيارة ويدخل ناحيت المخزن .. هو يعرف الطرفين .. اللي بيسلم الفلوس وعامر المستلم .. بس ذا اول مرة يشوفه !

مافي وقت يغيرو خطتهم ولو قرر عامر فجأة يصير حذر وما يجي للتسليم عكس عادته

بلل شفايفه وغمض عيونه .. لازم يهدأ ويفكر .. هل اختار يوم غلط ؟ .. لا هو متأكد المبلغ اللي بيتم تسليمه اليوم بيكون كبير .. عامر ما يخلي احد يستلم المبالغ الكبيرة بدون وجوده على الاقل .. دفعات الربع الاول من السنة لسه ما خرجت بسبب قضية راجس فكل شي كان واقف بس دحين المفروض كل شي رجع للعمل فالمبلغ اللي المفروض يتسلم بيكون كبير ..

اخذ نفس عميق قبل ما يتذكر ويسحب جواله يطالع .. البرنامج قديم جدا بس ما يعتقد انو عامر يهتم يحدث برامجه او يحذف الحاجات القديمة .. دخل على الخريطة وابتسم .. عامر قريب من المينا .. لو ارسل الغريب ذا فهو ارسله عشان لحد يشك فقط .. هو جاي للفخ برجوله ..

تحرك وبعد عن المخزن .. رفع الكمامة على وجهه .. تعمد يلبس كاب يرجع شعره على ورى .. لابس عدسات بلون غامق عشان يبعد اي اشتباه عنه .. و .. خلينا نقول انو عيشته مع امهاته خليته يعرف يغير ملامحه بشوية ميكب .. يمكن ذي فايدة انو امهاته الاثنين يحبوا يعطوه افكار مختلة للهالوين .. وطبعا يكونوا معاه في كل جزء من تجهيزه لها

حط يده على النظارة اللي لابسها .. الكاميرا مثبته بداخلها والارسال شغال حسب جواله

تحرك بهدوء ناحيت المخزن .. حط يده على سلاحه .. الطرف اللي حيسلم الفلوس غالبا شخص خطير .. الفلوس اللي تحتاج غسيل هيا فلوس غير شرعية ودايما وراها مجرمين .. لو قدر يحدد مصدر الفلوس فكذا بيحل قضيتين بدل وحدة

ألتفت حولينه .. مافي حراس حول المكان وذا اكثر شي مثير للشبهة .. لو حطو حرس كثير فمشكلة بس انو العملية نكون بدون اي حراسة كذا ؟

لف حولين المخزن وطالع بفتحة التهوية .. مرتفعة .. بس الصناديق اللي حوله كثير ويقدر يطلع عليهم ويشوف اللي بيصير جوة .. طبعا في خيار اخر هو يفضله وهو الاقتحام بس لو صار اطلاق نار فهو الخسران كفرد واحد مو حافظ المكان او تفاصيله .. الافضلية بتكون لهم ولو مات بيتورط اكثر في المجانين اللي حوله .. راجس .. عبير .. بيان .. وسلطان

غمض عيونه واخذ نفس عميق قبل ما يسحب الصندوق بهدوء بدون ما يطلع اي صوت ويحطه تحت الفتحة ويطلع يطالع منها .. المروحة مو مخليته ياخذ منظر كامل للمكان بس كانت تعطيه زاوية تخيله يقدر يشوف الشخص اللي بدأ يطلع رزمات فلوس من الشنطة عشان يوريها مرسول عامر .. بعدها رجعهم وسحب شنطة ثانية خلت انس يرفع حاجبه .. بداخل الشنطة في بلوكات مغلفة بشكل محكم .. بلوكات يعرفها لانو قد اشتغل على مصادرتها .. عامر كان يستلم فلوس فقط .. هذا اللي يعرفه انس .. بس الواضح انو عامر قرر يكبر تجارته باخر كم سنة ودخل مخدرات فيها !