انس فتح الباب زي عادته ودخل بدون ما يدق الباب او يقول شي لانو في عقله " راشد مو بالبيت وشادي مقعد ما يقدر يتحرك فطبيعي ما بدخل عليه بوسط منظر خليع مع نفسه مثلا ! "
بس هو وقف يطالع شادي اللي كان فاتح شنطة سفر وبيحط فيها شي وهو واقف على رجوله !
مو المفروض شادي لسه ما يقدر يوقف ؟!
انس رد الباب بشويش وقفله عشان رازي لا يدخل الغرفة وألتفت لشادي اللي بدأ يبلل شفايفه بتوتر
- ثواني اشرحلك
انس طالع في الشنطة بعدها في شادي وتكلم بهدوء
- هل راشد اذاك بأي شكل ؟
شادي عقد حواجبه لانو انس بيفكر بأيش ؟!
بس انس عاد كلامه بصوت هادي بدون اي تعابير واضحة من وجهه
- هل راشد اذاك بأي شكل ؟ ..
شادي تكلم بتوتر
- لأ ! .. راشد ما سوا شي .. هو .. هو افضل شخص ممكن يكون بحياتي و ..
قاطعه انس وهو يكشر
- اجل ليش كذبت عليه بخصوص حالتك الصحية ودحين بتلم اغراضك عشان تتركه ؟! .. شادي قدامك ٣ دقايق بتشرح كل شي قبل ما اكسر رجلك بطريقة تخليك معد تقدر توقف عليها من جد !
شادي فز من نبرت انس وتراجع لورى وهو يحاول يرتب كلامه وقالها وهو تقريبا يزعق لانو انس كان يقرب منه وهو تقريبا بعرف انو انس شبه مجنون !
- بفاجئ راشد باني صرت احسن !
انس وقف قبل ما يوصل لشادي وطالع فيه بشك
- تفاجئه انك صرت احسن ؟!
شادي هز راسه بأيوة وهو يفكر كيف يقدر يشرد من آلة القتل الا قدامه دحين
انس تراجع شوية لورى ورفع حاجبه وكتف يدينه قدام صدره
- ايش اللي يثبت كلامك ؟
شادي أشر على الشنطة اللي انس ألتفت لها وشاف بداخلها شوية اغراض بس من ضمنها فشاش للكيك وقرطاس بلالين و .. ياه مافي احد بيهرب من اخوه وهو شايل معاه علبة زيت بنكهة التوت ما يبغى انس يفكر بليش هيا بذي النكهة لانو تقريبا يعرف
رجع عيونه ناحيت شادي
- ايش خطتك ؟
شادي بلع ريقه
- ب .. بكلمه انو يجيني على المكان .. بقوله فادي تهاوش مع ماهر .. ذول .. ذول اقاربي وهو بيجي لانو بيعرف انو صار شي و .. وافاجئه
انس حك ذقنه وهو يفكر .. اتصال من شادي وصوته خايف حيخلي راشد يقوم زي المجنون يروحله فخطة شادي كويسة
هز راسه قبل ما يطالع في شادي
- اوك .. لو احتجت مساعدة كلمني .. حاليا عندنا اجتماع تحت .. راشد ورازي وراجس ورازي .. فلا تطلع من الغرفة عشان اضطر اقفل بابها
شادي عقد حواجبه وانس كمل
- شي يخص ابونا وراشد بعدين بيفهمك كل شي ..
قالها وتحرك يطلع من الغرفة وشادي ظل واقف مكانه يرمش وهو يحاول يستوعب كل الحاجات اللي توها صارت
أنت تقرأ
راجس
Ficção Geralيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
