انس ظل يطالع سلطان اللي كان جالس يتحرك في الغرفة يرتب المخدات عشان يجلسوا يتفرجوا الفلم وهو مو مقتنع للان انو سلطان مشى موضوع اللوكيشن ذا .. هو حاسس انو في شي ناقص .. سلطان ما بيستسلم بذي السرعة .. صح ؟
انس جلس على الكنبة وهو يطالع في سلطان للان وتكلم بهدوء
- كيف دوامك ؟
سلطان ألتفت وهو مبتسم وحرك يده عشان يحاوط بيها كتف انس
- يعني .. عادي .. رتبت شوية اشياء للرياض .. بسافر الخميس احضر اجتماع ويمكن اتأخر لثاني يوم .. مافي حجز بنفس اليوم للاسف
انس عقد حواجبه
- بتروح ؟
سلطان هز راسه
- لازم اروح .. احنا بناخذ وكالة والفريق القانوني اطلع عليها وكل شي جاهز بس لازم اكون حاضر للتوقيع وعشان المناقشة الاخيرة .. وسامي للان قافل جواله وواضح انو لساته في شهر العسل
انس بعد وجهه بانزعاج
- قلت انك ما حتسافر
سلطان
- ما قلت اني ما حسافر .. قلت اني حروح ولرجع وما بطول
انس كشر
- قلت يمكن تتأخر وتبات هناك
سلطان حرك يده على رقبة انس
- لاني ما لقيت طيران .. تبغاني ارجع بالسيارة ؟
انس ما التفت ناحيته
- بتاخذ ١٩ ساعة ما بتقدر تسوقها وتوصل وانت صاحي وسليم
سلطان ابتسم
- طيب تعال معاي
انس التفت
- ايش ؟
سلطان هز كتفه
- سافر معاي .. شغلك ما بينهار بسبب غيابك ليوم واحد
انس
- لما نبدأ ما ينفع نوقف .. ممكن يصير اي شي بأي لحظة ولو ما كنت موجود ممكن اخسر فرصة اني انهي كل شي
سلطان تنهد وهز راسه
- اوك .. بحاول ادور طيران ثاني يرجعني .. بس مقدر اوعدك اني ارجع بدري
انس سكت ونزل عيونه بينما سلطان حرك يده على رقبة انس من ورى يضغط عليها بشويش
- لا تعطيني ذي التعابير .. قلتلك بحاول
انس رفع عيونه يطالع في سلطان
- بتقول كذا عشان موضوع اللوكيشن ؟
سلطان ضحك بشويش
- لا !
انس كشر
- كذاب .. انت زعلان من سالفة الموقع فأنت جالس تضغط علي بسفرتك !
سلطان عض شفايفه وهو يطالع انس
- ابدا .. موضوع اللوكيشن كنت متوقعه منك
انس عقد حواجبه
- متوقعه ؟!
سلطان مسك وجه انس
- طريقة كلامك كانت واضحة .. انت ما تبغى احد يتدخل في خططك .. وانت مقتنع اني حعرقلك لو تدخلت .. عشان كذا كنت عارف انك حتلعب وما حتخليني اعرف مكانك ..
انس عض شفايفه
- طيب ليش انتظرتني وانت ماسك الجوال ؟
سلطان حط جبينه على جبين انس
- توقعي لأفعالك ما يعني اني ما حعاتبك عليها او انبهك لكونها مزعجتني .. لو ما انتظرتك وتكلمنا ما كنت بتفهم اني عرفت كذبتك
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
