جولان فتح باب الشقة وهو حاسس بالخذلان .. انس ما رد عليه .. غالبا بيروح مكان يفرغ غضبه .. حاول يكلم سلطان واكتشف انو سلطان بالرياض يعني انس اكيد بيروح لراجس بس راجس مع سياف بالمكتب وما كلمه انس من كذا يوم !
مسح على شعره بانزعاج .. ما يقدر يلوم زياد .. اللي سواه صح انسانيا بس القضية بتصير اطول .. صح انو اليضاعة اتمسكت فكذا في ناس انقذهم من انهم يتعاطو اكثر ! .. وفي فلوس قدر يرجعها قبل ما تبدأ عملية غسيلها .. بس المتهمين الرئيسين كذا بيصيروا احذر .. بيبدأ يفكروا انهم تحت المراقبة .. وصعب نمسك عليهم اي حركة ... هو اعطاهم تنبيه بسبب قانونيته ..
شم ريحة من المطبخ فتحرك لهناك وشاف سند واقف وهو لابس المريلة .. لامم شعره اللي شوي طويل ومليان كيرلز على فوق ك كعكة صغيرة .. وحاطط سماعاته الكبيرة اللي تغطي اذنه وهو يتمايل وفي خليط قدامه جالس يخلطه وهو يبتسم واحيانا يرجع يزعق بكلمات الاغنية اللي جولان متأكد انها بلغة تقريبا اول مرة يسمعها او حبيبه ما يعرف ينطق الكلمات فصارت كأنها واحد يقرأ انجليزي معرب !
ابتسم وفكر يقرب يحضنه بس وقف للحظة .. سند ممكن ينفجع .. ترجعله ذكريات سيئة .. حبيبه ضحية علاقة كانت سيئة وهو للان ما تجاوزها ولا بيتجاوزها بأي وقت قريب وهو لازم ينتبه لما يقرر يسوي شي زي كذا
رجع خطوة لورى ودق الباب بالقوة بس صوت الاغاني في سماعة سند كان عالي .. فتحرك للناحية اللي سند يقدر يشوفه فيها وفعلا سند انتبهله ونزل السماعة وهو مبتسم
- فين رحت ؟
جولان قرب ومسك يد سند
- قلتلك عندي شغل اليوم
سند ابتسم ودخل نفسه في حضن جولان
- ما حبيت اني صحيت وانت مو جنبي .. السرير بدونك يصير مرة بارد
جولان ضم سند لصدره
- اسف حبيبي .. المرة الجاية بصحيك قبل ما اطلع
سند رفع راسه يطالع في عيون جولان
- او اسحب على الشغل واجلس في حضني !
جولان ضحك وهو يبوس عيون سند
- ابشر
جولان دق قلبه لانو توقع جولان يقوله ما ينفع .. بس جولان دايما يوريه انو هو أولويته الدايمة .. وذا هو الشي اللي مخلي سند قادر لأول مرة في حياته يواجه كل شي وهو مو حاسس بضعف انو ماله احد ..
سند غمض عيونه
- كيف كان شغلك ؟
جولان تنهد
- ما خلصنا المهمة للاسف .. في حاجات واضح انها حتطول
سند بعد عن جولان بس مو بشكل كبير يعني لساته في حضنه بس صار يقدر يشوف وجه جولان
- ايش صار ؟
جولان ابتسم وترك سند وتحرك يسحب الكرسي ويجلس عليه يحكي سند عن يومه بينما سند يسمعه وهو يكمل الخليط اللي جولان للان ما عرف ايش هو
⚜️⚜️⚜️⚜️
راجس كان يطالع الاوراق اللي في البوكس مع سياف .. كل واحد كان يخرج ورقة محتلفة ويقراها عشان لو في شي يوضح اي حاجة غير اللي يعرفوها .. اغلبها تقارير من شغل رواد .. راجس فخور بأنو ابن شخص شارك بكل ذي المهام وانكتب في شغله كل ذي التقارير
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
