استند بيده على سياف وهو يمشي .. جسمه لسه بيوجعه بس .. بما انو اللي كان بجسمه مخدر .. فأي دوا بياخذ حاليا ممكن يسببله ادمان فللاسف هو مضطر يتعايش مع ذا الالم إلين يهدأ .. بس الالم خف بشكل كبير
جابر مد العكاز ناحيته
- شكلك تحتاجه اكثر مني
راجس تنهد وهو يمسك العكاز
- توقعت انو اضلاعي تجبرت !
جابر ابتسم وهو يشوفه يوقف بدون سياف وسياف باس راس راجس قبل ما يبعد ويرجع للسيارة يجيب اغراضه
- ايش قال الدكتور ؟
راجس كشر
- انو لسه .. ما ينفع يحطلي ادوية للان رغم انو عدا ٦ شهور ! .. الله ياخذ عامر بس
جابر هز راسه
- قالك طلال ؟ ..
راجس طالع في جابر
- يب .. للاسف ما خلوني احضر محاكمته هو وابوه بس .. طلال صورلي الجلسة كلها بدون علم المحكمة ! ..
جابر ضحك وهو يهز راسه
- عمرهم ما بيشوفوا النور .. ابو عامر انحكم عليه بالاعدام .. بس عامر اخذها ٦٠ سنة .. مؤبد بس بلفه
راجس نزل يده ناحيت صدره والشاش اللي حوله بسبب ضلعه اللي انكسر من ضرب عامر ذاك اليوم
- ليته اخذ حكم ازفت .. بس ما احس يحقلي اعترض
جابر كان بيرد بس وصلهم تنبيه لجوالاتهم فرفع جابر جواله هو وراجس وشافو رسالة بالقروب اللي صارت فيه كل العيلة ( جابر - سياف - طلال - زياد - راجس - راشد - شادي - رازي ونواف - وطبعا انس وسلطان ومعاهم عبير وبيان والاضافة الاخيرة للعيلة سند وجولان ولان سند موجود فلازم مالك وهيرو يكونوا هناك كمان ! )
كانت صورة من جولان وكانت لأنس اللي كان لابس مريلة بنك واضح مهي من اختياره لانو عليها ميلودي .. وهو يزعق بانزعاج في الكاميرا وماد يده يبغى يمسكها بس رازي اللي كان لابس مريلة كرومي ( اخت ميلودي الشريرة ) ماسكه وسند بمريلة هيلو كيتي اللي واضح انو الوحيد مبسوط فيها ويضحك حاضنه من الجانب وفي كريمة في وجهه وواضح انو جزء من الكلاسات اللي بياخذها الثلاثة في تزين الكيك .. ليش ؟ لانو سند يبغى يتعلم وبيان تبغى انس يقرب من سند ورازي ما بيفوت فرصة انو يحضر كلاس من اخوه !
ضحك جابر وهو يطالعهم قبل ما يطالع في راجس
- ما قالو متى راجعين ؟
جاه الرد من ناحيت المطبخ بالتحديد من راشد اللي كان واضح انو توه صاحي من شعره المشقلب وهو يتثاوب وكوب القهوة بيده
- تذاكرهم بكرة المسا .. أكدت عليهم بالكثير ٢٧ رمضان يكونوا قدامي ! .. ما بجلس ازين البيت لحالي !
راجس تحرك بشويش للكنبة قبل ما يرمي نفسه ويتأوه بسبب الألم
- انا برة الحسبة .. شغلتي اذوق الدبيازة والقهوة حلوة واقولكم زودوا سكر ولا تزودو لوز !
شادي رفع حاجبه وهو ينزل سماعته لانو توه خلص اجتماع يخص عمله بما انو صار نص الوقت اون لاين ونص الوقت بمقر الشركة عند طلال وراشد
- نعم نعم ؟! .. لا يا حبيبي بتقوم بالطيب تعلق اللمبات بالحوش كمان وفي الظهر ! .. يكفي تكنسلت سفرتي انا وراشد من وراك !
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
