انس رما جاكته في الارض وهو يدخل الشقة وباين انو منزعج من اجتماعه اللي ما وصل فيه لأي شي غير انو زياد شخص مزعج ناوي يتدخل بكل شي وبيخلي خطتهم اللي كانت ٣ مراحل ، ٢٧ مرحلة عشان قلك ضروري محد يتأذى او ييستعملوا طرق خارجة عن القانون
اول ما وصل الصالة انتبه لسلطان اللي كان جالس فوق الكنب .. للان بثوبه وشماخه وواضح انو جالس هنا من فترة وينتظر .. وهو ماسك جوال انس اللي انس تركه في الشقة قبل ما يروح اجتماعه عشان لا يعرف سلطان مكانه
انس وقف يطالعه بينما سلطان ظل جالس وهو يحرك الجوال يمين ويسار قبل ما ينطق اخيرا
- ليش تركته هنا ؟
انس قلب عيونه
- لاني رايح شغل .. شغل ما احتاجك تكون فيه مراقب علي
سلطان رفع حاجبه بس ما غير جلسته او نبرته
- مو اتفقنا انك تشغل موقعك عشان اعرف مكانك ؟
انس هز راسه وهو يطالع الارض
- ايوة .. بس قلتلك شغلي يتطلب مني انو محد يعرف مكاني
سلطان تحرك بهدوء ووقف
- يعني فكرة مشاركة الموقع اصلا ما منها فايدة .. لانك لو مو بدوامك غالبا بتكون معاي او قدام عيوني
انس هز اكتافه انو ما يدري بس ما رفع نظره يطالع في سلطان اللي قرب خطوة ناحيت انس
- يعني ما تبغاني اعرف فين مكانك لما تكون بوسط شغلك ؟
انس ما رد وظل يطالع الارض فسلطان هز راسه وهو يبلل شفايفه
- تمام .. وهو كذالك
انس رفع عيونه يطالع في سلطان باستغراب بس لقى سلطان فصخ شماخه وعقاله ورماهم على الكنب وتحرك للغرفة وهو يفتح ازارير ثوبه يفصخه
انس تحرك ورى سلطان وتكلم بنبرة استغراب
- ايش اللي وهو كذالك ؟
سلطان فصخ الثوب ورماه على السرير
- اللي تبغاه .. ما تبغاني اعرف مكانك .. طيب ما حعرف مكانك
انس صغر عيونه يراقب سلطان
- ما بتعترض ؟
سلطان قرب ومسك وجه انس بيدينه وقرب وباس شفايف انس بوسة سريعة قبل ما يهز اكتافه
- لا
وتحرك سلطان ناحيت الحمام وهو يفصخ بلوزته بينما انس ظل واقف مكانه مو عارف ايش المفروض تكون ردت فعله ..
⚜️⚜️⚜️⚜️
سند ابتسم اول ما شافه يدخل من باب المكتب
- رجوس !
راجس تفاجئ لانو نسي انو سند يشتغل مكانه ولما هو ما يدوام سند يداوم فابتسم وهو يحضن سند بس بعدها انتبه للرفوف الفاضية وبعد عن حضن سند
- ايش سويت بالملفات ؟!
سند ضحك
- استلمت طلال وخليته يحلل راتبه !
راجس ضحك وهو يطالع الرفوف والغبار اللي عليها
- واو .. حقيقي واو
سند اتكى على المكتب
- طبعا انت جيت تشوف الحب ولا سواد عيوني ما يجيبك
راجس قلب عيونه
- عيونك مو سودا
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
