زياد سحب كوب قهوته يشربه وهو يراجع تقرير الحادث .. لو طلال ما كان معاه ما يدري كيف بيكمل وظيفته ..
ضحك لما عدل وحدة من الكلمات .. لانو غلط وكتب ثاني بما انو عقله غارق في طلال دحين
سمع الباب يندق فرفع راسه وشاف احد العساكر عند الباب ..
- المقدم يبغاك
زياد سحب التقرير ووقف باستغراب لانو موعد تسليم التقرير باقي ما جا فليش بيستدعى الان ؟
تحرك ورى العسكري لمكتب المقدم بعدها دخل هناك ووقف بعد ما اعطى التحية
- طلبتني ؟
المقدم اشر لزياد يجلس وهو يطالع الورقة اللي بيد زياد ورفع حاجبه
- لا تقولي بتقدم استقالتك !
زياد رفع الورقة للمقدم
- لأ .. ذي مسودة تقرير الحادث
طالع المقدم في الورقة فبل ما يهز راسه
- تمام سيبنا من ذي الحادثة شوي لانو في شي اهم دحين
عقد زياد حواجبه
- شي أهم ؟
المقدم
- احتاجك تكون ضمن فريق لقضية ثانية ..
زياد طالع فيه
- اي قضية ؟! .. في حادث ثاني ؟
المقدم ابتسم
- لا ابدا .. ذي قضية ما فيها اي جثث .. للان على الاقل
زياد ظل يطالعه والمقدم كمل وهو يوقف ويتحرك بالمكتب
- قضية غسل اموال .. القضية ماسكتها كذا جهة .. من ضمنهم نزاهة
زياد
- لو نزاهة ماسكتها فأحنا ليش نتدخل ؟
المقدم
- لانو احد اطرافها كان شغال في السفارة .. ويعتقد انو الغسيل كان يصير بعلم احد افراد السفارة .. فهنا إحنا كوزارة داخلية لازم نكون ضمن الموضوع ..
زياد بلل شفايفه
- بس كون الموضوع مرتبط بالسفارة فالمفروض يمسكها عساكر من وزارة الخارجية مو احنا
المقدم هز راسه
- صح .. بس المصدر جاي من هنا .. من الداخل .. وبترسل عن طريق السفارة لشركة برة .. بعدها بيرجع يدخل كأرباح وهمية لشركة على اساس انها توزيع لأرباح المستثمرين
زياد عقد حواجبه
- يعني الفلوس كانت تطلع عن طريق السفارة بسبب جواز السفر الدبلوماسي !
المقدم وهو يقدم الملف
- بالزبط .. في اصلا عسكرين من الخارجية ضمن الفريق .. فبتقابلهم بكرة .. واحد منهم ماسك القضية بشكل كامل .. عادة الثاني يسمكها لانو أرسى .. بس ذي المرة اللي ماسكها .. ااااخ المهم انتبه منه
زياد طالع بالملف
- ليش انتبه منه ؟
المقدم اخذ نفس عميق
- لانو .. اممم كيف اقولها .. تعرف الشغل الوسخ اللي ما نعطيه اي احد عشان لو اسمنا جا عليه بنتورط ؟
زياد فتح عيونه بتفاجئ
- ثواني .. انت تقصد انو هو ..
المقدم هز راسه
- بالزبط .. نص بلطجي .. ونص عسكري .. شخص سجله اسود وما تنعطيله الا مهام الدم في العادة .. انقاذ مختطفين او اخراج ضحايا ..
أنت تقرأ
راجس
قصص عامةيا حاضري ومستقبلي .. يا جرحي وعلاجي .. يا جنوني واعظم درجات عقلي .. ( عامية جداوية )
