طلعات لبيتها حلات الماريو كان ديجا وجدات فيه حوايجها حطاتهم و رتباتهم فيه .. هزات واحد الكسوة طويلة عندها بالكمام ختارتها فالباج مع صمطة تاعها و دارتها حجابها .. هزات الصغيور لبساتو سروال دجين كحل مع طريكو و سبرديلتو وداتو متكتك .. شداتو من حنيكاتو
ابرار: ماشاء الله على وليدي شحال فنيون ماشاء الله .
بقات كالسة كتستغر و تسبح حتى سمعات لوطو وقفات حدا الباب. هزاتو و هزات معاه شويكش صغير فيه اغراضو لي غيحتاج.. حطاتو اللور و دازت كلست حداه
بكر( شافيها من المرايا ) واش انا شيفور عندك .. دوزي للقدام
دارت ضحكة شريرة فخاطرها و مزلات ركبات القدام حداه.. بقات كتشووف فيه بلاما يعيق بيها و هي تقشع زغبة لاصقة ليه بالصدفة دالقميجة .. بلاما تخلعو و هو صايك جراتها بالشوية و هو كيحاول يشوفها اش باغا تصنع . حيداتها و ساستها فالارض .
بكر: شنو حيدتي؟
ابرار: والو.. غير واحد الخيط .
دورات وجها للسرجم بقات كتامل فالطريق و هو مرة مرة كيضور يشوف فولدو .. وصلو لواحد المتجر كبير كاين فالناضور. نزلات و هو مشا هز ولدو .
بكر : سيري تقداي . انا غنتسناك فهاذ القهوة
ابرار: واخا ولكن ..( حدرات راسها .. فهم بلي خاصها الفلوس جبد من جيبو خمسة دالورقات و مدهم ليها ..) عطيني الولد غتخنقو ريحة الكارو
بكر: لا غير خليه معايا غيبرزطك
خلاتو على خاطرو مشات تقدا كضور و تختار لي محتاجة .. بدات كتختار فالبطاطة بان ليها الكزار فالكونطوار و هي تقسدو باش تخلصو .. بقا كيشوف فيها عرفها ماشي بنت الوقت و غالطة
الكزار: بنتي.. غير هزي لي بغيتي فديك الكروصة و ملي تكملي ( اشار ليها بيدو ) شتي الناس فين واقفين .. شدي معاهم النوبة باش تخلصي كلشي دقة وحدة
بقات حادرة راسها كتشوف فالفلوس و فيه حشمات و حست براسها عروبية ..
ابرار: شكرا
حدرات راسها و جرات الكروسةز.. الوقت كامل و هي حابسة البكية .. دارت لي قاليها عليه و شيطات منهم الفلوس.. حيت اصلا هزات غير الضروري.. و لي غتحتاج اما التخربيق فين كيضيعو الفلوس ماشافتش لجيهتو .. لقاتو كيتسناها فالباب حيت ماعندهاش طيلي باش تصوني لو ..
بكر( عطاها البيبي) : هاكي شدي
خداتو من عندو و مدات ليه الصرف لي شاط ليها .. هز هو التقدية دارها فالكوفر و تمو راجعين للدار
ابرار: شنو بغيتي للعشاء؟
بكر : لي بان لك
ابرار: كلشي هو هذاك عندي شنو مشهي؟
بكر: قتلك لي بان اك
#يتبع
أنت تقرأ
مكتوب الخير
Romance~ لايسمح بالنشر إلا بعد أخذ اذني والاحتفاظ بنفس المقدمة و الكوڤر وذكر اسمي ~ بــــــقلمي: DOUNIA ELMESSAOUDI💎 تحـــــت عنوان: مكتوب الخير / WELL DESTINY "كانت السماء مُرصعة بالنجوم، وشديدة الصفاء، بحيث إن من يتطلّع إليها لابدّ أن يتساءل دون وعي...
