دازت لشومبرتها جمعات كاع لي فيها حطاتهم قبالة الباب حتال الصباح.. كي صبح النهار هزت قشها وخرجت شدت طاكسي للمحطة حطها تما قلبات فصاكها بان ليها شي صرف قليل و ورقة د ربعلاف خلصات الطاكسي و سمح ليها فالبقية لان وجها كيشرح كلشي.. يا الله جات تقطع الشانطي و هي توقف سطافيط بيضة نزلو منها جوج رجال مع ضارت عندهم دورو عليها البلوزة البيضة بقات كتغوتت و ترجدد و لااا من مجيب ... بالخف طلعوها و داوها لمصحة الامراض العقلية ..
قبل ساعتين ..
دور لابيل لصاحبو لي فالسبيطار
بكر: راها خرجات من لوطيل *** و غالبا غادا للمحطة .. بغيت لقاكم تما ..
..: كون هاني و لكن شغنديرو فالوراق
بكر : انا راجلها و باقي ما طلقتها .. و ولي امرها
..؛ صف اذا مكين تا مشكل
رجع بداكرتو للحاضر .. و ديمارا طوموبيلتو شاد الطريق المعاكسة لي شداتها السطافيط.. فالبلاصة مشا لمحكمة الاسرة و دار ليها طلاق غيابي يعني بدون حضورها .. يعني عتابرها زبلة ..
اصلا هي من النهار الاول ماداهاش بخاطرها و طلقها فغيابها ... كان ممكن يسمح ليها و لكن باش تقرب لمو ؟؟ واخا كون دارتو ليه هو ... غير خدا الطلاق رجع للمصة و خلاها ليها فالادارة عندهم .. زجغ الطوموبيل و عوال برجع للناضور حيت مابقا عندو مايدار ف كاازا .. عافط فالطريق و كيحس بغمة نازلة لو على قلبو .. الى ماحيدتش السحر المدفون مع مو مايرتاحش ... دخل للطريق السيار مع الوحدة دالليل .. الطريق خاااوية قلبل فين كتبان شي طموبيل دايزة .. ركن الطموبيل جنب و هبط ياخد قهوة من عند مول بارطنير كيبيع القهوة ... كيحرك فااسكار و يشوف فالفراغ حتى كيحس بشخص وقف حداه دور وجهو لقاه البوهالي لي كان وقف عليه ..
البوهالي: سلام الله عليك
بكر: عليكم السلام( مصغر عينيه و كيتسنتاه يهضر) فين غبرتي؟ شحال من مرة قلبت علك و مالقيتكش
البوهالي: انا بوهالي ولد باب الله دايع فارض ربي و ركابيا جابوني عندك ... فاجي همك وحمد الخالق على حالك .. راه حال حسن من حال .. قالك ماعرفتيها عند هبييل و لا حكيم ولا مردي الوالدين .. و انت طينتك طينة ولاد الحلال .. ربي و ملايكتو واكفن معاك.. غا ديرها زينة و لا تخافش .. بلحق لاتغرررششش.. كل بنو ادم خطاء... ( كيهددو بصبعو) راك ضالم.. لاتغرش اولد الحلال .. لا تغرششش.. الدنيا دوارة .. نهار معاك و نهار علييك.. لااا تغرررششش
كيسمع هضرتو و كيضورها بالزربة فدماغو باش يتبع معاه.. قاليه بزااف دالهضرة .. و كل هضرة حاملة معنى .. ماجا فين يستوعب باش يرد عليه حتى لقاه عطاه بضهرو و غادي راجع
بكر : البوهااالييي.. و البوهااالييي
شاف فيه مول القهوة مستغرب وقرب ليه
مول القهوة: العشير.. ياك لباس راه مكين حد.. هه راه غا انا و انت و ربي مالك سكران؟
دور راسو شافيه و عاود شاف فالطريق مابان ليه حد.. حك راسو و طلع مع ديك القهوة .. كفاش عاد كان كيبان ليه و شوية مابقاش كيبان واش هذا من الانس ولا الجن!!
#يتبع
أنت تقرأ
مكتوب الخير
Romance~ لايسمح بالنشر إلا بعد أخذ اذني والاحتفاظ بنفس المقدمة و الكوڤر وذكر اسمي ~ بــــــقلمي: DOUNIA ELMESSAOUDI💎 تحـــــت عنوان: مكتوب الخير / WELL DESTINY "كانت السماء مُرصعة بالنجوم، وشديدة الصفاء، بحيث إن من يتطلّع إليها لابدّ أن يتساءل دون وعي...
