ناض خرج عروقاتو كتصبب باغي يرجع و متقادش .. ديمارا اللوطو غير غادي و ماعارفش اينا اتجاه شاد حتى لقا راسو قبالة المقبرة .. سطاسيونة بعيد و بقا غادي على رجليه تا وصل لقبرها .. لقا الربيع فوق القبر و كاعما نقي .. هز كمامو و مشا ضبر فجوج بيدوات دالماء.. بقا كينقي فداك الربيع و كيبكي قلبو طااايب و الحنينة لي كانت عندو مشااات و خلاتو .. من النهار مااتت و هو دايخ و الدنيا ضايرة بيه مابقا يضحك كي الناس مابقا ينعس كي الناس .. تنعد تنهيدة من قلبو و حنا على البيدو عزو كيغيل فالقبر كمل و هز يديه بدا كيقرا فالقران .. قرا ماتيسر من سورة ياسين و الفاتحة و الناس .. مسح على وجهو
بكر ( بصوت باح ):صدق الله العضيم
تخلع ملي سمع صوت من موراه كيسحابليه كاين وحدو فالمقبرة .. دور وجهو بان ليه راجل مسن لابس قشابة فالابيض و مقيوسة بالغيس من لتحت فيدو عود كيتكي عليه بحال العكاز ..
البوهالي: ماتخلع ما دهش.. غير انا .. البوهالي ولد باب الله .. لا والي لا ثالي تايه فالدنيا و لايحها على الله .. كل نهار المووت و كل نهار زيادة .. ارض ربي وااااسعة و عالياااا و مكيحيد لك حتى كيعطيييك .. حيد لك المرحومة دابا يرزقك فما ينسيك فيها .. غير تكون نيتك مزيانة ( اشار ليه بصبعو كينبهو ) مممااا ضلم ممااا تكدب ماتنهب .. الدنيا صغيييييييرة اوليدي فيها غااااا سبعيااام وييييااااك يغرك الشييييطاااان راه ربي كيشوف ( هز صبعو للسماء) بكي و شكي على الخالق الوهاب انا العبد لاااا ثقة فيه كل من عليها فاااان ويبقى وجه ربك دوك الجلال و الاكرام و شنو ماكان مكتوبك فراه مكتوب الخير ماتخافش
بقا غي حادر راسو و كيسمع .. فعلا ربي حيد ليه سماح و عطاه ولد من ابرار فعلا كل مكتاب فراه مكتوب الخير
بكر : الشريف .. كتكون ديما هنا
البوهالي: كتلك ارض ربي واسعة و عالية .. كل مرة و فين غادي بيا المكتاب
حدر راسو و مشا عيا مايعيط ليه بكر لكن كانت عندو جوج كلمات قالهم ليه و مشا
#يتبع
أنت تقرأ
مكتوب الخير
Romance~ لايسمح بالنشر إلا بعد أخذ اذني والاحتفاظ بنفس المقدمة و الكوڤر وذكر اسمي ~ بــــــقلمي: DOUNIA ELMESSAOUDI💎 تحـــــت عنوان: مكتوب الخير / WELL DESTINY "كانت السماء مُرصعة بالنجوم، وشديدة الصفاء، بحيث إن من يتطلّع إليها لابدّ أن يتساءل دون وعي...
