هزو عطاه للفرملية بلاما يبقا مجرجرو معاه و نيت هوما يعناو بيه خير .. خرج كيضور فراسو لاتكون فشي قنت لكن والو.. ركب طوموبيلتو و غادي كيقلب.. داز من كاع الدروبة و كاع الزناقي كاع الشواريع واخا تكون نملة كانت غتبان..
مخبية فباب دالعيمارة و لي داز كيسولها شنو واقفة كدير تما .. كلها كترعد .. الى مشا حتى لقاها غيدوز عليها
ابرار : ياربي تعاوني ياربي .. يااربي مايلقانيش .. ياربي باقة باغا نعيش و نعاون ختي و ماما ...
مرة مرة طل من الباب دالعيمارة واحد الساعة كيبان ليها دايز باللوطو بالشوية و كيضور فعينيه .. غير شافتو و هي ترجع سدت الباب.. حطات يدها على قلبها كتحسو كيخبط مليون مرة فالدقيقة.
ابرار : ياربي ياربي تنجيني .
دازت عليها ساعات فديك العيمارة و الناس بداو كيدخلو . خافت لا يدخلها شي واحد لشي قنت و هي تخرج .. ماهازة معاها لا ريال لا جوج.. ضارت بيها الدنيا و كتحس براسها بوحدها لا حنين لا رحيم .. بقات كتمشا فالشاريع الكبير و فينما تبان ليها بحال طوموبيلتو تبدا تجري ..
نسمات الرياح بداو كيطيرو ليها الزيف لي فوق شعرها .. خصلات رطبين كيبانو ..اما عينيها فيهم بريق خاص .. كلمعو بشوية تاع الدموع و بزااف تاع الخوف ... بانت ليها حجرة حدا واحد الكاراج مشات كلست عليها .. كلشي كيسحاب ليه غا طلابة تيجيو يقربو منها و هي كترجع بلور .. باغاهم غير يبعدو منها ولات خايفة من كلشي و ماقادة تيق فحتا واحد .. هاكا كيطرا لك واحد ملي كيلوحوه اعز الناس عندو و ماعندو فين يمشي.. كاينة لي كتمشي للدعا رة و كاينة لي كتمشي تخدم بالحلال كاينة لي كطلب كاينة لي كتنهب .. اما هاذ المرة ابرار ختارت تمشي للجامع .. بيت الله.. عسى تلاقا مع ناس قلوبهم طيبين و يدرقوها تا تعرف فين تعطي الراس .
دخلات للجامع كان صغير ولكن متول و الناس تاع المنطقة معتانين بيه.. حيدات صباطها و دارتو تحت من باطها .. دخلات و بقات كالسة..اول حاجة دارتها من مورى ما ستارحات هي توضات و صلات جوج ركعات .. هزات القران و بدات كتقرى فيه .. و سبحان الله فينما كتقرا القرآن من قلبك باش ترتاح كطيح فالأية لي كدويك .. و كذلك وقع لابرار.
ابرار : لقوله تعالى : {وَاصبِر لِحُكِمِ رَبِكَ}.
مع قرات هاذ الاية طاحت دمعة حارة من عينيها .. حطات كتاب الله من بعد ما باستو . تكات حيت كان العشاء ادن و الجامع خوا ..
#يتبع
أنت تقرأ
مكتوب الخير
Romance~ لايسمح بالنشر إلا بعد أخذ اذني والاحتفاظ بنفس المقدمة و الكوڤر وذكر اسمي ~ بــــــقلمي: DOUNIA ELMESSAOUDI💎 تحـــــت عنوان: مكتوب الخير / WELL DESTINY "كانت السماء مُرصعة بالنجوم، وشديدة الصفاء، بحيث إن من يتطلّع إليها لابدّ أن يتساءل دون وعي...
