အလှလေးရှောင်မန် (Beauty and the Beast) Book 1

အခန်း (၇၈)

အခန်း (၇၈) : ဂူမန်မန် ဂုဏ်ပြုပါတယ်

ကော်လင်းသည် ဂူမန်မန်၏ ရုတ်တရက် ပွေ့ဖက်မှုကြောင့် မှင်သက်သွားခဲ့လေသည်။ သူ့ခန္ဓာကအေးစက်လာကာ နေရာမှာ သံရိုက်ခံလိုက်ရသည့် သစ်သားချောင်းလိုဖြစ်နေပြီး လှုပ်ရှား၍ မရချေ။ သူ့နှလုံးခုန်သံက သေလုမတတ် ကျယ်လောင်စွာ မြည်နေသည်ကိုသာ ကြားနေရင်း ကမ္ဘာသစ်ကို ရောက်ရှိသွားသကဲ့သို့ ဖြစ်နေ၏။

စန္ဒီသည် ဘေးမှ တုန်လှုပ်နေသည့် ဂူမန်မန်ကို ကြည့်လိုက်ပြီးနောက် ကော်လင်းကို ပြန်ကြည့်လိုက်သည်။ မနေ့ညက ကော်လင်း၏ သတ္တိရှိမှုနှင့် ဇွဲကို ပြန်အမှတ်ရပြီး သူမသည် စိတ်ထဲမှ အနည်းငယ်သော မနာလိုမှုကို ချိုးနှိမ်ကာ သက်ပြင်းချလိုက်သည်။

သံသယမရှိစွာ ထိုထူးချွန်လှသည့် ကော်လင်းလို အမျိုးသားသည် ဂူမန်မန်လို ပြီးပြည့်စုံသည့် အမျိုးသမီးကိုသာ ပိုးပန်းလိမ့်မည်။ သူမလို နိမ့်ကျသည့် သားရဲတစ်ဝက်အမျိုးသမီးက ဘယ်လိုလုပ်ဖြစ်နိုင်မှာလဲ..... မနေ့ညက ကော်လင်း၏ အားထုတ်မှုကိုမြင်ပြီး စန္ဒီ မှန်းဆပြီးသားဖြစ်၏။ အဆုံးသတ်မှာ အခွင့်ရေးအနည်းဆုံးက အဲလ်ဗစ်နှင့် လီရာတို့ တိုက်ပွဲဖြစ်လေသည်။ ဂူမန်မန်သည် ကော်လင်းကို လက်ခံမည့် ဖြစ်နိုင်ခြေရှိသည်။

သို့သော်.... အခုကြည့်ပါဦး.... သူတို့က တစ်ယောက်နှင့်တစ်ယောက် ဖက်ထားသည်က ကောင်းကင်ဘုံက ချီးမြောက်ထားသည့်အတွဲနှင့် တူလှသည်။

စန္ဒီသည် အတင်းပြုံးလိုက်သည်။ ထို့အပြင် ဒီနေ့က သူမ၏ တစ်ဉီးတည်းသော သူငယ်ချင်း ဂူမန်မန် အရွယ်ရောက်လာသည့် ပထမဆုံးရက်ဖြစ်၏။

ကော်လင်းသာ ဂူမန်မန် မိသားစုစတင်သည့် ပထမဆုံးရက်တွင် ဂူမန်မန်ပါတနာဖြစ်လာပါက သူ့အဆင့်တန်းက အဲလ်ဗစ်နှင့် လီရာတို့နှင့် မယှဉ်နိုင်သော်လည်း အနာဂတ်တွင် အခြားလူများ၏ အနိုင်ကျင့်ခြင်းကို ခံရမည် မဟုတ်ပေ။

ဤသည်လည်း အဆင်ပြေလှသည်။

ထိုအရာကို တွေးလိုက်ပြီးနောက် စန္ဒီသည် ပြုံးရင်း သူတို့ဆီ လျှောက်လှမ်းလာကာ အူလိုက်သည်းလိုက် ကောင်းချီးပေးလိုက်သည် "ဂူမန်မန်.... အရွယ်ရောက်လာတဲ့အတွက် ဂုဏ်ပြုပါတယ်.... အဲလ်ဗစ်၊ လီရာ နှင့် ကော်လင်းတို့က တော်တဲ့ အမျိုးသားတွေပါ..... အနာဂတ်မှာ သူတို့ နင့်ကို ကောင်းကောင်းစောင့်ရှောက်ပေးနိုင်မယ်လို့ ငါယုံကြည်တယ်...."