ပြိုင်ဘက်ကင်းမိုးကောင်းကင်သိုင်း၀ိဉာဥ်(ကျွင်းရှောင်ယောက်) Book 1

အပိုင်း ၁၈

အခန်း ( ၁၈ ) စေ့စပ်စာချုပ်ဖျက်သိမ်းခြင်း၊ ဦးထုပ်စိမ်းဆောင်းရပြီဟု ခံစားရ၍ ဒေါသဖြစ်နေသော ရှောင်ချန်း

မိုက်မိုက်မဲမဲ ဒေါသထွက်ပြနေသည့် ရှောင်ချန်းကိုမြင်ပြီးနောက် ပိုင်ယုအာ ပိုမိုစိတ်ပျက်လာသည်။

'တခြားသူနဲ့သာ မယှဉ်ဖူးရင် တကယ့်ယောကျ်ားတစ်ယောက်က ဘယ်လိုဆိုတာ နင်သိမိမှာမဟုတ်ဘူး'

မူလက သူဟာ ရှောင်ချန်းကို အလွန်အထင်ကြီးခဲ့မိသည်။

သို့သော် ကျွင်းရှောင်ယောက်နှင့် ယှဉ်ကြည့်သောအခါ သူက ပိုးကောင်တစ်ကောင်ပမာ ဖြစ်လာခဲ့၏။

'ဒီလိုလူက ငါ့ရည်းစား ဘယ်လိုဖြစ်ခဲ့တာပါလိမ့်…'
ပိုင်ယုအာ ခေါင်းကိုသာ ခါယမ်းလိုက်တော့သည်။

ထို့နောက် သူကပင် ဆက်ပြောလိုက်သည်။
"ဒါတွေအားလုံးက ငါ့ဆန္ဒအရ ပြုလုပ်ခဲ့တာ ရှောင်ချန်း... နင်ထွက်သွားလိုက်တော့"

ပိုင်ယုအာစကားဟာ ရှောင်ချန်းနှလုံးသားကို ဓားထက်ထက်နှင့် ထိုးခွဲနေသည့်ပုံနှယ်။

ထိုခံစားချက်ဟာ ရှောင်ချန်းရင်ဘက်ကို နာကျင်သွားစေခဲ့၏။ သူက အေးစက်စက်နှင့် ကျွင်းရှောင်ယောက်ကိုသာ လှည့်ရင်ဆိုင်တော့သည်။
"မင်းက ကျွင်းရှောင်ယောက်မဟုတ်လား... မင်းက ဘာကောင်လဲ... မင်းယုအာကို ဘာလုပ်လိုက်တာလဲ"

ရှောင်ချန်းဟာ ဒေါသထွက်နေသော ‌ခြင်္သေ့ကဲ့သို့ ဖြစ်နေသည်။

ကျွင်းရှောင်ယောက်ကမူ ရှောင်ချန်းကို အပြောင်းအလဲမရှိသော မျက်နှာအမူအရာနှင့် ပြန်ကြည့်နေ၏။

အတိအကျဆိုရလျှင် သူက ရှောင်ချက်လက်၌ဝတ်ထားသော နဂါးလက်စွပ်ကို ကြည့်နေခြင်းသာ။

ကျွင်းရှောင်ယောက်က အလွန်ရှုပ်ထွေးခက်ခဲသော ရှေးဦးစိတ်ဝိညာဉ်ပုံရိပ်ဖော်ကျင့်စဉ်ကို လေ့ကျင့်ထား၍ သူ့မြင်နိုင်စွမ်းဟာ ပုံမှန်ထက် ပိုသည်။

၎င်းနဂါးလက်စွပ်မှ ထူးကဲသော အသွင်အပြင်နှင့် စိတ်ဝိညာဉ်အတက်အကျများကို သူခံစားမိ၏။

'ဝှား... ဒါက တကယ့်ဇာတ်လမ်းဇာတ်ကွက်လား'
ကျွင်းရှောင်ယောက် အံ့ဩသွားသည်။