قصة جبل - نورسين ( بالدارجة المغربية )

💛 الفصل 55💛

جبل نورسين الجزء 260 :سارة طلقات من يد جبل وبخطوات مسرعة طارت وعنقات صديقتها نيليا ؛بينما نورسين فور ماشافت نيليا تدكراتها هي نفسها الطفلة اللي كانت تالفة ودخلات عند نورسين لشومبر فالمستشفى ، كيف تقدر تنسى طفلة دات الجمال الخلاب الممزوج بين المغربي والأمريكي شعرها الأشقر المبوكل وعويناتها الملونين خلاو صورتها ماتفارقش دهنها؛فرحات أكثر منين عرفات بلي نيليا هي صديقة سارة...بينما جبل تلفت يشوف فين مشات سارة حيت طلقات من يدو على غفلة حتى بانت ليه معنقة بنت قدها تقريبا هز عينو شوية وهو يلمح أنور صغر عينو فيه كأنه كيتدكر فين شاف هاد الوجه اللي ماخافيش عليه ؛ داكرتو مشات فالبلاصة ليوم المستشفى فاش شاف فيه أنور بطريقة غير لبقة بتاتا ماعجبوهش نظراتو من داك نهار ودابا بان ليه كيشوف فنورسين وكيتأمل فيها بطريقة غريبة لمعان باين فعينيه كأنه عاشق مايخفاوش على جبل هاد نظرات اللي داير أنور فنورسين خاصة جبل اللي طايب فالحب والغرام كيعرف المحب بنظرة وحدة ...مرر جبل لسانو داخل فمو كيلعب بيه ودماغو كيفكر وكيتمنى مايكونوش ظنونو صحاح و مايكونش هاد الراجل عندو شي علاقة بنورسين يا فالماضي يا فالحاضر يا فالمستقبل حيت غايقتلو مافيهاش الشك كيحاول يهدن راسو حيت ربما غيرتو العمياء عليها كتدفعو يفكر هاكا ....حول جبل نظراتو لنيليا اللي طلقات من سارة واتاجهت بخطوات مسرعة بإتجاه جبل نورسين ...جبل بقا متبعها شنو غاتدير حتى بانت ليه عنقات نورسين من رجليها وقالت بصوتها الطفولي الجميل كبراءتها بلغة اجنبية ...نيليا : I miss you mom ( توحشتك أ ماما )جبل مافهمش واش هي نطقات mom و لا غير جابو ليه ودنيه كيفاش ماما وشنو علاقة هاد طفلة بنورسين وعلاش كاتقولها ماما شنو هاد تخربيق اللي خرج ليه من جنب تاني تمنى من اعماق قلبو تكون غير شي حاجة خفيفة و تدوز و ماتكونش شي مصيبة كحلة تسلطات عليه من حيث لايدري ...نورسين حنات بشوية وهزات نيليا لبين أحضانها و تقادات فالوقفة عنقاتها وحتى نيليا بادلاتها العناق بطريقة قوية كأنها كتعرفها مند زمن منظرهم خلا جبل يستغرب ويبغي يفهم شنو طبيعة العلاقة اللي عند نورسين مع هاد الطفلة اللي صدقات صاحبة سارة والأكثر من هدا شنو سر النظرات اللي كيدير انور فنورسين ....فنفس الاثناء تقدم أنور بخطوات بطيئة حتى وقف اونفاص مع نورسين بهيئتو ضخمة وبملابسو الأنيقة وريحتو رجولية القوية إنسان وسيم خاصة أن شكل وجهو يوحي وكأنه إنسان أجنبي ماشي ولد البلاد ؛ مد يدو بطريقة لبقة وخرجات سميتها من فمو ...أنور:نورسينبمجرد ماخرجت سمية نورسين من فم أنور ؛ جبل التافت بسرعة لعندو احاسيس خايبة تكونو ففؤادو كأن نار قوية كتغلي داخل صدرو و الطبق هو قلبو اللي كيتشوى بطريقة بطيئة كتزيد تحرق كل خلية فجسمو بل كل درة وكل جزيئة إحساس شبيه بطعن ألف خنجر فقلبو كيفاش نطق سميتها المقدسة بنسبة ليه إسم ملاكو الطاهر الصافي البريئ شنو علاقتو بيها ؟؟ علامة إستفهام كبيرة شغلات بالو شكون هاد ناس اللي ضهرو من العدم تاني ومنين كيعرفو نورسين حبيبة قلبو اللي متمني يديرها فقفص و يشد عليها باش ما يشوفها حد من غيرو و لكن الظاهر انه الجميع مستمتع برؤية عصفورتو نورسين ....نورسين ابتاسمت لأنور ومدات ليه يديها وبطريقة لطيفة نطقات ...نورسين:أنور سلامرجع تلفت جبل شاف فنورسين حيت نطقات إسم هاد الشخص الواقف أمامهم الآن صرط ريقو بصعوبة وسميتو كتكرر فودنيه بصوت نورسين هادشي كيعني أنهم كيعرفو بعضياتهم ماتسرطش ليه البلان شكون هدا ثاني و شنو العلاقة الرابطة بيناتهم وعلاش كايشوف فيها بهاد الطريقة ربما يكون كيتخايل و مابيناتهم والو حلقو نشف بل فهاد اللحظة كيحس بداتو نشفات عض على شنايفو كيبرد فيهم الحر ديال هادشي اللي كيوقع ليه فحياتو كل مرة خارج ليه شي حد وهادشي خلاه يفكر بلي خاصو يخطفها فأسرع وقت ويتزوج بيها يبعدها على هادشي كامل باش تولي ديالو حيت عيا من هاد الدنيا اللي كتدير مافجهدها باش تبعد عليه ملاكو و بنت قلبو و عصفورتو و طفلتو نورسين ....بدون مايشعر هز جبل يدو وضورها على ضهر نورسين حتى تحطات يديه على كتفها كأنه كيحاول يثبت لأنور بلي نورسين شي حاجة غالية على قلبو و كتخصو هو فقط ؛ قال موجه نظراتو لأنور بصوتو الخافي عصبية مكتومة ....جبل:ممكن تشرفيني بمعرفة سي أنور هممنورسين ضارت شافت فجبل حلات فمها باش تجاوبو وهو يحس بيد سارة قبطات فيديه و قالت بطفولية ...سارة: نعرفك أ عمو جبل البنت اللي معنقة طاتي نورسين سميتها نيليا جات لمدرستنا عاد عاد من امريكا هي صغر مني ولكن كنتلاقاو فساحة و رجعنا ديزامي أما هاد الراجل سميتو أنور باباها لنيليا و لكن ماعرفتش علاش نيليا عنقات طاتي نورسين بحال كتعرفها و زيد عليها نورسين عرفات سمية باباة نيليا بحال كتعرفهم من قبل غريب