قصة جبل - نورسين ( بالدارجة المغربية )

😊 الفصل 44 💛

جبل نورسين الجزء 199 :ما قدرش يتحمل حوار نورسين مع رشيد مرضو فقلبو لدرجة كره نهار اللي قبل يخدم رشيد عندو فالمزرعة داكشي علاش جر نورسين بقوة من يديها غير باش يبعدهم على بعضياتهم أصلن رشيد ما خاصوش يلمسها حتى باليد كيتمنى من قلبو ما يكونش عندهم إعجاب ببعضياتهم حيت ما يقدرش يتحكم فراسو .. ما عارفش أشمن شر غايخرج منو و لكن أكيد غايقتلو واخا يعرف يدخل لحبس من جديد ما سوقوش المهم نورسين ملكو و يموت و يحيي عليها واخا يوقع اللي وقع ما يقربها حد و ما يمسها حد خاصة الجنس الذكري ....بينما نورسين بقات مصدومة كتشوف فيديها اللي جارها منها ما عرفاتش علاش دار هاكا ما خلاهاش حتى توادع مع رشيد ؛ حنات راسها و بغات تحيد يديها من يدو و هو يزير عليها حتى وصلو لباب ديال الفيلا قالت هنا غايطلق مني ساعة والو حرام واش بغا يتفك منها ؛ دق فالباب و بقا واقف متمسك بيديها و باين فيه معصب وجهو أحمر حاجب طالع و حاجب هابط و يدو كترعد بقوة الأعصاب مزال دمو كايغلي ما كرهش يرجع عند رشيد يشطب بيه هاد المزرعة و لكن عارف راسو غايتفرش ...نورسين تجرأت و نطقات بصوتها الأنثوي الرقيق ...نورسين : جبل مالك ؟؟؟التافت عندها بمجرد ما سمع صوتها عينو سهات فيها و بقا ساكت و ملامح وجهو كيتطلقو و يرطابو شوية بشوية كأنها لقات عليه سحر خاص بيها كايكون فقمة الغضب و شوفة غير فوجهها كتريحو كأنها مهدئ أعصاب بالنسبة لقلبو اللي ساكناه و معششة فيه ؛ جاوبها بطريقة هادئة ...جبل: ما ماليشنورسين هزات يديها اللي قابط فيها و مزير عليها و نطقات بصوتها الأنثوي اللي كيختارق قلبو ...نورسين: و علاش جريتيني و زيرتي ليا على يدي ؟؟جبل طلق من يديها ؛ و مرر يدو على لحيتو و جاوبها ...جبل : غير ما بغيتكش تبقاي واقفة مع رشيد حيت بنتو ليا طولتو فالهضرة و نتي عاد جاية من الكلينيك خاصك ترتاحينورسين بغات تجاوبو و هو يتفتح الباب من طرف جوهرة اللي غير شافت جبل لمعو عينيها بفرحة بينما جبل درم فيها و دخل أصلن مكره ما كيتهدن غير مع نورسين ...نورسين ابتاسمت لجوهرة و حتى هي بادلاتها الإبتسامة المزيفة ؛ تبعات نورسين جبل بينما جوهرة سدات الباب و دخلات لعندهم ...نورسين لمحات جبل جلس فالسيجور من فوق الفوتوي قابط فراسو و كيدير ليه مساج بيدو باين عليه مكره و ماشي هو هداك لدرجة نورسين تشوشات على حالتو ما عرفاتش علاش ما عجبهاش الحال تشوفو هاكاك ياكما عيان و لا عندو شي مشكل نورسين بطبعها حنينة و خاصة جبل اللي دار فيها الخير و ضلماتو بكلامها ما عرفاتش واش مقلق بسبابها و لا بسباب شي حاجة أخرى ما فاقت من سهوتها حتى شافت جوهرة مشات جلسات حداه و كتسولو على حالو ساعة ما جاوبهاش بقا فنفس وضعيتو ...نورسين تقدمات بخطواتها لعندو حتى وقفات على راس جبل كتشوف فيه .. بينما جوهرة هزات عينيها فيها و خنزرات ما حملاهاش و ما تسرطاتش ليها علاش جبل يجيب نورسين لعندهم و هاد القيمة اللي معطية ليها و نظراتو ليها هادشي كولو خلاها تحقد على نورسين و تبدا تفكر كيف دير تحفر ليها باش تقلعها من طريقها حيت كتحس بيها كتشكل خطر عليها ...نورسين تجرأت و حطات يديها على كتف جبل و قالت بإهتمام مشوشة عليه..نورسين : جبل مالك واش ضارك راسك ؟؟بمجرد ما سمع صوتها حيد يدو من جبهتو و شاف فيها بطريقة حنونة مع إبتسامة باهتة مرسومة على وجهو المرهق من عشقها اللي كيعاني و كيقاسي منو بطريقة متعبة ...جبل : وي ضرني شويةنورسين : خاصك تشرب دوليبران و ترتاحجبل حس بيديها على كتفو و هو يهز يدو بسرعة حطها على يديها و طبطب عليها و جاوبها ...جبل : نتي اللي خاصك ترتاحي انا دغيا يفوتني الحال بلا ما تشغلي بالكنورسين حسات بدنب من داك الكلام اللي جرحاتو بيه و شوف سيد شحال دار على قبلها و هي باش كتجازيه عاد رجع معاها داك الكلام اللي قالت ليه فاش كانو فالخارج ما عرفاتش شنو وقع ليها حتى اتاهماتو بلي كيشوف فيها بطريقة خايبة و باغي يستغلها هادي هي نورسين ديما متسرعة و ما كتفكرش فالحاجة قبل ما تنطقها خاصة فاش كتعصب ما عندها غير جيب يا فم و قول ...طاحت عليها فكرة كطريقة إعتدار ليه و باش تخفف هاد حريق راس اللي كيحس بيه ...نورسين: أش بان ليك نصوب ليك لويزة عرفتي غاترتاح و ما يبقاش يضرك راسكجبل ابتاسم و عجبو الحال من هاد الإهتمام الجميل اللي كيحس بيه كنسيم بارد على قلبو المرهق من حرارة الحب المشتعلة فصدرو ..فرحتو فهاد اللحظة ما كتوصفش بالكلام ؛ تنهد و جاوبها برحابة صدر ...جبل : نخاف نعدبكنورسين بقات ساكتة مدة كتفكر باش تجاوبو و هي تقول مع إبتسامة عريضة ...نورسين : عدابك راحة غانمشي نصوبها و نرجع