قصة جبل - نورسين ( بالدارجة المغربية )

💛 الفصل 60💛

جبل نورسين الجزء 295 :فمكان آخر و بالضبط فالفيرمة فبيت نورسين حلات عويناتها كتشوف فسقف كتفيق طافية خاصها بضع ثواني باش ترجع ليها داكرة كأنها كدير الميزاجوغ للميموار أول صورة بانت قدام عينيها هي صورة جبل ما حسات حتى فلتات من ثغرها ابتسامة فاش وعات على راسها تحشات فالمخدة كي نعامة فاش كتغرس راسها فتراب تصرفاتها الصبيانية بدات كتدخل ليها شك فراسها ناضت من مكانها لبسات الصندالة ديال صبع و تمشات حتى وقفات حدا المرآة الموضوعة بشكل طولي كتبين داتها كاملة من راسها الى أخمص قدميها دارت يديها فخصرها و بقات كتشوف فداتها فالمراية حتى سهات و رجعات بيها داكرتها لنهار شافت كاميليا بنيس مع جبل معنقاه بطريقة قريبة بزاف حسات بقلبها كيتحرق و كأنه يقيم حفل شواء داخل صدرها شعرات بألم ليس طبيعي داخل الجزء الأيسر من صدرها شي حاجة كتخنقها بمجرد ما كتدكر أول مرة شافت فيها جبل داخل العمارة فاش كانت حاضناه أكبر خبيرة تجميل فالمغرب حسات بداتها فشلات جلسات فالأرض و ربعات رجليها كتشوف فحالتها فالمراية و كتدير مقارنة بينها و بين كاميليا بنيس لقات بلي لا مجال للمقارنة لوخرى كتحمق بزين و معتانية براسها و كلشي كيتمنها أما هي مشعككة ما زويناش مڭردة ما قارياش كيفما قارية لوخرى و لكن علاش كدير مقارنات بينها و بين كاميليا بنيس واش بصح كتمنى كن كانت فعوطها و كانت كتعني لجبل و مقربة ليه بحالها واش هادشي كيعني بلي قلبها مال لجيهتو و اللي عطا الله عطاه حطات يديها على قلبها و قالت بإنكسار مخفي بين طيات صوتها ...نورسين : فين غادي بيا يا قلبي فين غادي واش هدا هو الحب اللي كنقرا عليه فالقصص و الروايات و لكن انا عنوان روايتي غايكون حب من طرف واحد جبل الابراهيمي غير سميتو كتزعزع غايرضى يكون مع وحدة بحالي أنا [حطات يديها على صدرها ] انا نورسين بنت محمد البنت خايبة ؛ البنت درويشة اللي كتمشي جنب الحيط و عمر شي حد ما قالي حتى كلمة زوينة فطريق أنا اللي ما عمر ما اهتم بيا شي حد انا اللي تخلات عليها عائلتهااا و ظلموها أقرب ناس ليها البنت ضعيفة الشخصية اللي جا كيضحك عليها بجوج كلمات البنت السادجة اللي ما عندها حتى دور فوق هاد الكرة الارضية انا اللي ما عندي حتى هدف او حلم الللي نعيش على قبلو انا اللي موتي أحسن من حياتي غايرضى يكون معاها واحد بحال جبل ، جبل الابراهيمي زين و الشخصية و الكاريزما و هاد الثراء كامل غا يرضى يبغي وحدة بحالي ولا يحس بشي حاجة من جيهتيحسات بدمعة نزلات من عينيها على خدها بسرعة كأنها كتبرد عليها حر الألم و الحرقة الدفينة بداخل قلبها و كملات كلامها بحزن طاغي على صوتها كيعكس أحاسيسها القاسية ....نورسين: علاش انا وقع ليا هادشي علاش أ ربي كنبغي واحد عمرو ما غايبغيني واخا نبقى غير أنا و ياه فوق الكرة الأرضية ؟؟ انا تلفت ما بقيت عارفة فين نحط راس علاش عائلتي تخلاو عليا أ ربي بحال شي طارو د زبل واش انا ماشي بنتهم علاش تجمع عليا كلشي فدقة وحدة واش هدا إبتلائي فدنيا انا ما بقيتش باغا هاد دنيا غير خودني أ سيدي ربي عندك أحسن ليا ما بقيت باغا والو بغيت غير نرتاح حيت عييت ....حشات وجهها بين ركابيها و طلقات العنان لدموعهاا و خلات شهقاتها يخرجو حتى حسات بروحها تهدنات عاد هزات راسها بتثاقل كتشوف فالمراية عينيها المدمعين الحومر و فشعرها المشعكك وجهها شاحب كرهات راسها بقات ساكتة مدة حتى تحولو ملامح وجهها لقسوة و كملات عتابها لنفسها ....نورسين : حتى لهنا و باركة ؛ باركة ما تشفقي على راسك حتى لامتى غادي نبقى هاكا حتى لامتى ؟؟ ياك كيقولك الضربة اللي ما كتقتلش كتقصح الراس خاصني نوض و نكون مراة و قادة مراة قوية مفتاخرة براسها أول حاجة خاصني نلوح مور ضهري شخصيتي القديمة من اليوم غانرجع قوية و حتى واحد على وجه الكرة الارضية ما غادي يقدر يلعب بمشااعري اهم حاجة خاصني نسا عائلتي من اليوم عائلتي و راسي مالي هي راسي و صحتي ...تنهدات و خرجات باقي كلامها بمرارة و قسوة كأنها ما راضياش عليه ...نورسين: أما جبل الابراهيمي كيبقى مجرد أخ عاونني و وراني الطريق الصواب لا أقل ولا أكثر ديما خليها فبالك جبل ما بيني و بينو والو جبل ما بيني و بينو و...حسات بدموعها كينزلو من جديد كأن قلبها كينزف على كلامها اللي كيخرج من فمها و كتجرحو بيه ...نورسين: م..ما..بيني و بينو وااالو وااالورجعات غرسات وجهها بين ركابيها كتبكي على كلشي على راسها على عائلتها و على جبل بالخصوص اللي كان اول شخص كيتعامل معاها بإهتمام و حنان و لطف و عطف و برحمة كيف دير ما تبغيهش كيف دير تنساه و هي كانت محرومة من شحال من حاجة و قدمها ليها على طبق من دهب دخل لقلبها بدون إستئدان منها حتى بدات كتغراق فبحر حبو و هادي غير بداية الحب اما نهايتو الا بقات على هاد الحالة فأكيد غاترجع مهووسة بيه ...تعبت أن أراك بعيدا و أنت بداخلي تسكن