قدر مراهقة

الجزء 03

#قدر_مراهقة
الجزء 3
آذن لفجر صليت وروحت رقدت انا هكا مدايرة نمشي كعس الناس كامل وزيد اليوم الجمعة يجيو لفامي تاع لخلا منحملش نشوفهم يبقاو يطلقو في سمهم وانا منحملش ونردلهم الصرف ومن بعد يقولولك الطفلة هذي منعرف منين جبتوها متشبهلكمش ڨاع.
فقت على صوت نبع الحنان وهي تعيط فوق راسنا بدات بختي غسلتها ياعرة لبنات يالفنيانة زعما انت ذوك تاع زواج ومسؤولية وش يبالك كي تروحي عندو تقضيها تحواس ورقاد يالالة لازم تقفازي وتنوضي تتعلمي شغل الدار واحد مايدوملك غير ذراعك شبعتها رخس ودارت ليا وانت يالهاملة يالعرة فليل تباتي دوري كي الجنية وفنهار راقدة وش انا كاسبة زوفر فدار هذي خاوتك الي رجال وراهم ينوضو بكري وانت الي عندك اختبارات السمانة الجاية مزالك راقدة نوضي تنوضي على خشبة ان شاء الله قولتلها خليني منيش حابة نقرا وزيد مزال الحالالناس تصبح اليوم الجمعة_نوضي قولتلك متقلقينيش ومتخلينيش نهز يدي عليك وزيد راهي11يالالة كشما بقا رقاد ذوك _ماخص القرد غير الورد ضربتيني في صغري حتى تضربيني في كبري راني 17سنة اختاه متغلطيش_راني نشوف فيك درت لڨرون وانا الي نحيهملك_حتى انا راني نشوف فيك كبرتي لازم نجيبو وحدة تعاونك غدوا نروح نخطب لبابا كاش وحدة باش تتهناي، انا نقولها هكا وهي تهز بشماقها وتشحطني على فخضي نضت نڨز وحدي زادت لختي ضربة وخرجتنا يالكلبة ارواحي هنا تحبي تزوجيلي راجلي ربحت هذا ماخصني مكفاش ربي بلاني بمصيبة كيفك تزيدي تجيبيلي ضرة. انا نجري وهي ورايا فدار حتى تخبطت في بابا خباني قالها وش بيك صباح ربي تجري وراها وش دارت_قول وش مدارتش الطفلة متقرا متعاوني في شغل الدار وفوق هذا كامل حابة تزيد تزوجك وتجيبلي ضرة _دار بابا عندي وثالي صح وش راهي تقول _هيه صح_وعلاه مكيش حابة تقراي وش بقالك سمانة وترتاحي واصلا انت على العام مرتاحة _منفحتش_شوفي بنتي القراية لازم تقراي ماشي بالنفحة يجي نهار وتحتاجيها هي سلاحك وواحد مايدوملك فهاذ الدنيا من غير قرايتك وصحتك _بصح انا _لابصح لا والو امشي تقرا بنتي مبقاش بزاف طلعي العام ويبقالك الباك زيري روحك تديه ولثم تتهناي تبقالك الجاميعة دبر راسك اصلا متحتاج قراية بزاف تفاهمنا، هبطت راسي منقدرش ناقشو كيما ماما _وش قولت تفاهمنا_ايه تقاهمنا_وذوك نجيو لموضوع زواجي صح حابة تزوجيني_ايه صح كعاد ماما قالتلي غلبت ونحب نتهنى قولت نزوج منها نفرحك انت ومنها هي تتهنى_حضني وباسني على راسي بنتي الشاطرة تخمم فراحة باباها ويماها صحيتي وكتاه تروحي تخطبيلي _وقت ماحبيت_نطقت ماما ايه ياعدوة كرشي هكا حابة تجيبيلي ضرة معليش وتزيدلي شحطة على جنبي _حبسي حبسي والله راني نتمسخر اخلايا شكون عندو البوقوصة هذي الزين ولعقالة والقفازة بكاش وحدة والله الي عندو وحدة كيفك راهو مزهر _بلعطيني برك كي شغل منيش فايقتلك شوفي عندك دقيقة طيري من قدامي لانسلخك اليوم طيري روحي تقراي_بابا احكي معاها شوف كيفاش تحڨرني_والله يابنتي منقدر نحكي معاها نخاف تحاوزني حتى انا _هههههه تخافها_لا نحتارمها برك اما الخوف من ربي سبحانو وفرات_ايه زعما صدقتك _امشي من قدامي امشي لانزيدلك ضربة انا ثاني منعرف منين جبتي هاذ اللسان_باين من جداتي وعمتي _ههههه ياربي صبرني على الطفلة المهبولة
#فريال