قدر مراهقة

الجزء 100

#قدر_مراهقة
الجزء 100
فاتو يومين بلمح البصر دانيا تزوجت وراحت مع راجلها مجد خرج من الحبس ديراكت جا لمينا حوايجنا ورجعنا لدارنا محبش يبقى عيات فيه يماه محبش قالها كرهت من مشاكلكم كل مرة واحد يدير حاجة وانا نحصل وشوفي ردي بالك على نيدال قسما بالله العلي العظيم وتغلط حتى هي يالوكان غلطة صغيرة ننحرها . انا سكت مقلت وعلو خليتها في قلبي المرة هذي قرىت نسكت ونتجاهلو ومنقولوش وش غاضني خليه خسارة فيه حتى كلمة مني ميستاهلهاش . روحنا لدارنا كيف لعادة لقيتها مرتبة مستفة ، دوشت لبست بيجامة الجو بارد ورحت للكوزينة كشما نطيب لقيتها فارغة شوي هك دخل وجاب معاه القضيان قيس شهر تقول كان حاس بلي راح يغيب فترة. حطيت كل حاجة في بلاصتها ودرت لعشا كملت وجدت طابلة جا هو تعشينا مع بعض عيا يسقسي فيا وش بيك مش من عوايدك تسكتي هك موالفة تحكي وتقصري ، لسانك الي فيه ميترتين شبيه رجع لبلاصتو _مابيا والو تعبت من طريق برك _ اشربي دواك وروحي ترقدي انا خارج عندي خدمة رايح نطول شوي باش نرجع ارقدي متستناينيش _ معليش (كي شغل ميتة عليه قالو متستناينيش ياو ماقولت تهنيت منك وخرجت خص غيرنقعد نستناك). هو خرج وانا قولتلو طريق السد الي تدي ماترد ربي يجيبلك موصيبة ان شاء الله الموت تديك حيوان كي جات فلفامي تاعو لعبها راجل ودخل للحبس على جال شرفهم وكي جات فيا عادي مجرد غلط لحظة غضب صححت غلطتي اسمحيلي ووووو ، ربي يجيبهالك كلب رخيس اصبر برك جاي نهار الي نطرطق في وجهك ونقولهملك كامل ونبرد قلبي ونروح ونهار هذا ماهوش بعيد علبالي لصبر حدود وانا صبري مبقالوش ويخلاص ونوريلك الشرف كيفاه داير اصبر عليا . لميت لماعن غسلتهم شربت دوايا اهم شيء صحتي انا وبنتي هو بحر عليه جهنامة تاكلو وتاكل عظامو ان شاء الله كسرة ليدو ولا لرجلو هكا يركح في فرد بلاصة وميلقاش الي يرفدو واذا جات عليا كاس ماء مانمدهولوش الحلوف خليه برك ياربي بردلي قلبي ووريلي فيه يالوكان نهار . بعد ماكملت دعاوي تقول كاش عجوز هاربة من الثورة رحت صليت زدت عيطت لماما حكيت شوي معاها وكوبيت مسقساتنيش على حكاية دانيا ووش صرا معاها مع اني متأكدة بلي سمعت لانو ام رنيم صاحبتها لانتيم وعشرة عمر ميخبو والو على بعض بصح ماما جاية هك متحبش تقرعج على ناس ولا تجيب خبارهم تاع روحها وفرات حتى وتسمع كاس خبر تموت ومتسقسيكش ولا تحاول تجبدك منك الهدرة كيما يديرو شيء عباد يبقاو ينشنشو حتى يعرفو كلش من بعد ينشروها وحكايات الناس يديرولهم ڨعدات ميخافوش ربي يجي نهار ويطيحو في نفس الموقف وحتى هوما يوليو حديث الناس.
#فريال