قدر مراهقة

الجزء 46

#قدر_مراهقة
الجزء 46
روحنا لدار ديراكت دخلنا في سبات قلة النوم والطريق بعيدة والدوران رجع علينا تفتتنا خصوصا انا منيش موالفة نبعد هك واذا بعدت لازم نرقد والشهر هذا نرقد غير شوي وعدت نتقيا بزاف شكيت من تخلاط الماكلة والتعب كلو رجع عليا وباينة راح نعاني بزاف لانو مرضي صعيب نطول باش نرتاح. فاتو يومين وحنا فدار يخرج الصباح يجيب لفطور ويرجع يرقد وكي يلحق وقت لغدا ولعشا ثاني يجيب من برا لانو ماكان والو في دار وانا قولتلو بلي منعرفش نطيب حتى بيضة وهو صدقني يستاهل خلي ندلل شوي ونربح راحتي. كي روحنا لقينا كلش نظيف هو كان ديجا وصا العساس وخلالو المفتاح باش يجيب وحدة تنظفهم اصلا انا مستحيل نقدر واسعين بزاف وزدت تعبت.اليوم ثاني نضت راسي يدور ديراكت جريت لدوش نرد مصارني السمانة هذي جايبتها غير قيا ومجد كان معول نفوتو ديراكت لدارهم عرضونا وكي شافني تعبانة آجلها، لازم ثاني نروح نزور دارنا لانو من العادات لعروس نهار السابع تروح زيارة لدار باباها وانا مصلحتليش كنت في شهر العسل زعما للعشاق بصح اناوياه نبانو خاوة . فت للكوزينة نشوف كشما ناكل جعت وزدت كرهت ماكلة برا ومبغيتش نطيب لانو قولتلو منعرفش. شربت كاس جو بارد ورجعت نرقد اصلا معندي ماندير كلش نظيف وواحد مايجيني امالا خلي نربح راحتي آخرتها موت. مع جيت نغمض عينيا صونا تليفوني بالسيف مانضت وهزيتو لقيتها ماما حكينا شوي وسقساتني كيفاه علاقتي مع مجد وانا غير الحمدلله لباس بخير مكان حتى مشكل مليح غاية، منحبش نقلقها ومع هي مريضة بالقلب نخاف كشما يصرالها في جرتي وتبقالي ندامة طول حياتي لهذا من الاحسن مشاكلي نخبيهم ونحاول نحلهم وحدي، عرضتني انا ومجد وقالتلي بلي طولت ولعرايس كامل يجيو في السابع الا انت المهم دارتلي محاضرة طويلة عريضة والفت هذي هي طبيعة خدمتها إلقاء المحاضرات_ماما منقدرش نقرر وحدي لازم حتى نشاور هذاك_هذاك نعيك او راجلك متقوليليش برك مزالك تشركي فمك كيف كنتي عندنا_علاه فمي شبيه_بلعي بلعي عرفتها الي فيه صنعة ماتتنحى وانت عمرك تشدي فمك _ياماما وش درتلك انا ذوك _مدرتيلي والو بصح باين راكي غابنة راجلك بنتي ونعرفها راسها خشين ولسانها اطول منها ومتهداش حتى دير مصيبة كبيرة_والله مدرت والو اني عاقلة تحبي حتى عيطي لهذاك وسقسيه_مزالك برك في كلمة هذاك ياو راهو راجلك متحكيش عليه هك_ وكيفاه نقولو حبيبي عمري وحياتي حبي قلبي عينيا او عيب اماما نقولو هك قدامك كي نكون معاه وحدنا نشبعو رومانسية بصح كي نكونو وسط الناس نحشم حتى نعيطلو باسمو خصوصا قدامكم عيب خلاص _من وكتاه انت وليتي تحشمي _ملي تزوجت وعرفو الناس كامل وش درت نهار عرسي فليل_ الله يمسخك متحشميش انت خلاص _هاو انت الي سقسيتيني قولتيلي من وكتاه تحشمي وانا قولتلك _بلعي برك وعندك تنساي تقولي لراجلك يجيبك عندنا _اوك متخافيش كي يروح راجلي حبيب قلبي نقولو يجبني عندكم _انا قولت بعد الزواج ترزاني وديري عقلك بصح صرا العكس نص عقل الي كان عندك زاد طار _طيرهولي مجد _باي لانبتلي بيك اليوم_باي حبيبتي سلميلي عليهم كامل كامل وبوسيلي ريتال بزاف بزاف توحشتها .
#فريال