قدر مراهقة

الجزء 54

قدر_مراهقة
الجزء 54
تلمو كامل جداتو وخالتو ويماه وختو صغيرة ندال وباباه على الطابلة بداو ياكلو انا كنت  خايفة ماكلتي متعجبهمش ونتبهدل قدامهم بصح صرا العكس وكامل شكروها باباه يغزل في يماه ويقولها هاي طفلة صغيرة وماكلتها خير من ماكلتك وهي مداتهاش كامل فيه قالتلو مذابيا بنتي تكون شاطرة باش نفوخ ونزوخ بيها قدام الناس، سكت ماقال والو جداتو وخالتو يشكرو ويعاودو وهو كلمة مقالهاش كلا حتى شبع وناض طلع لفوق. باباه ثاني راح لشومبرتو ولحڨوه الباقي بقيت غير انا وخواتاتو جيت نلم معاهم لماعن باش نغسلهم محبوش قالولي بزاف عليك روحي ترتاحي من صباح وانت بالواقفة وصح كنت تعبانة ميتة لوكان نزيد دقيقة نطيح ندوخ. جيت طالعة مدتلي نرجس التحلية الي درتها قالتلي نطلعها لفوق ناكلها انا ومجد لانو باين مش حانزيدو نهبطو العيا تاع طريق قتلنا. طلعت لفوق لشومبرة لقيتو قاعد على سرير ويخرب في التليفون، هاك تاكل _وشنو تحلية _شكون دارها _احممم هو يعني _انت درتيها باين _ايه انا _وعلاه كذبتي عليا وقولتيلي بلي متعرفيش تطبخي وش يبالك حانحبسك في الموزينة ونظل نتآمر عليك ونقولك طيبي هذي وزيدي هذي _ايه اصلا المتزوجين كامل هك حياتهم راحت في الشغل والطياب وانا مش حابة نضيع حياتي في الكوزينة _ شكون قالك انا حا نغبنك في الكوزينة مزال متعرفيني مليح ومش انا الي نحڨر مرتي ونردها عبدة ليا _ايا خلاص خلينا ناكلو ونرقدو النعاس هلكني من الصباح مرقدت وغدوا نوضو بكري عرضنا عمك لكبير لغدا وفليل نروحو ثاني لعمك واحد خلاف ولغدوا منو عمك الصغير وفليل عمتك وبعدها عمتك وحدة خلاف وخالك لكبير والصغير والمتوسط وخالتك الصغيرة والمتوسطة والي قل من ماماك وخوك لكبير والي قل منو عمتك ام رنيم  ووخلي وخلي السمانة هذي كامل عرضات _ بصح ياربي وش تحكي انت متعبيش نهاركامل تلعي لسانك مترديهش لفمك خلاص لميه شوي لايعود يتقطع _ خمسة في عينيك هذا لسان ولحقتني ليه _محسدتك ماوالو احكي وكثري بصح بالشوي اتنفسي _هيا تاكل برك __اوك كولي بصحتك_وانت متاكلش_مبغيتش _لا كول واعطيني رايك _وعلاه وش يهمك رأيي _يهمني وبزاف، مديتلو التحلية كلاها كامل عجباتو وشكرني لأول مرة يعجبني مدحو ليا تبالي بديت نميل ليه ونطيح على راسي (وقعت في الفخ وماحدا سما عليكي). كليت مام انا وروحت غسلت سناني وبدلت قشي لبست بيجامة وتلحت جنبو نرقد خير اصلا منقدر ندير والو النعاس هلكني وتعب بزاف اصلا راني حايرة في روحي كي  بقيت واقفة على رجليا الوقت هذا كامل ومطحتلهمش لتحت دايخة.
#فريال