قدر مراهقة

الجزء 37

#قدر_مراهقة
الجزء 37
قدمت عندو جيت راح نعضو من بعد فقت مع روحي وش راني ندير في دقيقة خلاني نضعف قدامو تفوووه شحال راني بغلة بعد وش دارلي كامل قاعدة نتغزل فيه. بعدت عليه وهزيت حجابي لبستو فوق البيجامة _هيا نروحو ياك قبيل كنت تندب فوق راسي وتقولي هيا راح الحال ورانا روطار وذوك راك تتكسل. رفضت لفاليزة تاعي وخرج وانا وراه ركبنا في اللوطو ديراكسيون دارهم لانو راح الحال وراح يجيبولي لحفافة لدارهم وندير الصبوحي تاعي لثم ومن بعد نروحو لدارو الي في #####. وصلنا لدارهم جاية فالسونتر فيل بعد وقدامها بزاف فيلات تاع عمومو وعماتو وخالاتو احتلو الكارطي بكل( من غير دار رنيم بعيدة لانو كي كانت هنا يماها صراولها مشاكل بزاف مع سلافاتها ايا قررو يبعدو ويجيو يسكنو قدامنا ودارهم الي هنا قفلوها لانو خاوتو محبوش يخليوه يبيعها ولا يكريها ميحبوش البراني بيناتهم اصلا الكارتي مقفول وواحد مايدخلو غير لفامي تاعهم برك). نزلت انا وياه وهو كي لڨرادة لاصق فيا وحاكملي يدي تقول راح نهرب وانا خطوة كيف لعباد عيت نلوحها قريب نرقد بالواقفة، لقينا ولاد عمو وعماتو وخوالو وخالاتو لبرا قاعدين وخاوتو كي شافوه بداو يعيطو (هاو زوج هاو زوج اووووو)، مداهاش اصلا فيهم كملنا طريقنا كي وصلنا للباب ضربو خاوتو البارود وخرجو النسا يزغرتو كي جينا ندخلو حبستنا يماه وراحت جابت لحليب والتمر كليت نص وعطيتلو ليه النص الثاني لوكان مش لعباد معانا والله مايشوفها حبة وحدة ونزيد نقسمها معاه. دخلت سلمت على يماه وجداتو وخالاتو ماشاء الله يهبلو وحلوين حتى من عماماتو يبانو ملاح شوي بصح منافقين مع ليام ويبانو اما نسا عمو تاع راسهم  ضاربين الدنيا بكوتبي يشبهو لعجوزتي بزاف، خواتاتو سلمت عليهم يبوسو ويحضنو غير لكبيرة السم يقطر منها سلمت عليا بالتشناف الي يشوفها يقول ضرتي ايا روحي ترنكي على روحك هذا ماخصني سلفة سوسة تغلط تسلك وعلى حساب الحطة باين انا وياها مش راح نتفاهمو وتوصل بيناتنا لكبيرة. جات رنيم تبوش وتحضن كيف عوايدها ماتطلقني غير كي تشوف روحي راح تطلع لثم وين تبعد وهكاك تبقى معايا. داوني لشومبرة وقالولي شوي هك تجي الحفافة نحيت حجابي وتسطحت شوي شميت ريحة مجد فالمخدة اويلي وشنو هذا وليت نتخيل لدرجة هذي مآثر عليا،رنيم_وي ميرال_تاع من الشومبرة هذي_تاع مجد_قولي والله _والله علاه نكذب عليك _امممم مليح وانا نقول شكون الداب هذا الي مداير شومبرة كامل فلكحل وظهر الحمار لكبير _ احشمي لوكان يسمعك كاش واحد وش يقول عليك_يروحو يقودو منيش حايرة فيهم نقول وش نحب وندير وش نحب والي معجبوش الحال لحيوط بزاف واذا مكفاوهش لحيوط يجي ليا نكسرلو راسو_ذوك تجي الحفافة وجدتي وش تلبسي_ايه راهم فالفاليزة تاعي. جبدتلي حوايجي وحطتهم على جنب شوي هك دخلت الحفافة باركتلي وسقساتني وش حابة ندير قولتلها نحب كلش سامبل. خدمتلي شعري اوندولي ورفعتهولي شوي من لقدام ودارتلي مكياج سامبل خلاص ولاحظت بلي تتوله بزاف لرقبتي وصدري وسقساتني على ليطراس اذا نحب نغطيهم_لا مكلاه غطيتهيم وحدي_امممم معليش.
#فريال