قدر مراهقة

الجزء 19

#قدر_مراهقة
الجزء 19
تلمينا على الطابلة نتعشاو وخاوتي يتمسخرو بيا كعاد راح نتزوج خصوصا وائل فاسخ بالضحك _عشنا وشفنا ميرال راح تتزوج قبلنا كامل تشفاو معندهاش شهر قولنالخا انت تتزوجي قبلنا قالت مستحيل غير انا منتزوجش وغدوا يجيو يخطبوها هههههه، نطق خليل خلي لعروسة تاعنا متزعفهاش لا يجي راجلها يقلب علينا الدار. هنا كامل طرشقو بالضحك مبغاوش يسكتو حتى بابا وضحكوه، ايا خليولي بنتي متضحكوش عليها وهي قافزة خير منكم وراح تتزوج وانتوما اقعدو تضحكو على لعباد. نطق وائل والله عندك الحق يفوت عرس ميرال روحو اخطبولي راني كبرت قالتلو ماما وشكون هذي الي باغي تخطبها نعرفوها حنا. قبل ماينطق هو نطقت الستوتة تاع ريتال_باينة شكون السنفورة هذيك تاع رنيم شكون غيرها عدوتي السراقة مكفاش سرقت ختي وذوك تزيد خويا. كامل ضحكنا من غير وائل حشم من بابا. ماما فرحت بزاف كعاد تحب رنيم دارنا كامل يتفاهمو معاها من غير ريتال _اخلاص يفوت عرس ختك ونخطبولك ليك ويبقى خليل حتى ينوب ربي _غير مطمعوش انا منزوجش مزال _براحتك منسيف على حتى واحد. قالتلو ريتال وانا متزوجونيش ولا ناويين تخليوني وسط العجايز_شكون العجايز الالة_سلمى وادريس باين شكون من غيرهم. ناضت ماما ليها وهي تهرب تتخبى عند بابا _بعدو على بنتي خليوها تهدر كيما بغات _ايه تهدر شكون حكمها بصح تحشم شوي عيب عليها تقول عليا عجوز اذا انت شفت روحك كبرت انا مزالني صغيرة _ولادك راح يتزوجو وانت تقولي صغيرة_ههههه خليو ماما تبقى صغيرة حتى وتزوجنا كامل العمر تاعي وبستها_هاي الناس الي تعرف تهدر ماشي كيف شي عباد _اخلاص اسلمى غلطنا ورانا طالبين السماح متتقلقيش مني شكون يمشطلي شعري غدوا الصباح _اااه يالمصلحجية تموتي على صلاحك. كملنا لعشا وتعاونا غسلنا لماعن وفرزنا الحالة قعدنا نتفاهمو على وش نديرو غدوا كي يجيو. نطقت اسيل _وكتاه نديرو الڨاطو ميكفيناش الوقت_متخافيش راني كومونديت الڨاطو غدةا يوصل على 12هذيك _اخلاص تهنينا نزيدو كاش تحلية وصاي ياخي غير جايين يخطبو ونهار الفاتحة يديرو كلش مع بعض _ايه هكاك غدوا حاجة خفيفة نفوتوها ونبدوا نوجد كعاد راح نعرضو بزاف عباد عمومك وعماتك وخوالك وخالاتك وجداتك _نطقت انا وعلا تعيطيلهم خلينا منهم يقلقو يجيو ويقعدو يطلقو في سماطتهم علينا كيما موالفين_لا عيب لازم نعرضوهم كي يجيو الناس وميلقاوهمش وش يقولو علينا _انت اصلا يهمك كلام الناس كثر من راحتك خلاص اعرضيهم ولا اقعدي. بعد ماتفاهمنا على كلش روحنا نرقدو باش غدوا نوضو بكري.
#فريال