قدر مراهقة

الجزء77

#قدر_مراهقة
الجزء 77
قعدنا نقصرو انا وياها ونحكيو كيف زمان وطبعا لازم نتنمرو شوي على ناس وزادت حكاتلي على سماح وحكايتها قالتلي بلي مجد كان عندو صاحبو كي خوه هو كبير عليه ب3سنين بصح ميبانش وقالتلي بلي بوقوص يهبل عليها سماح عشقت فيه وهو من النوع الخلاط كل نهار مع وحدة وبلي سماح شافاتو وضربت فيه عشقة وهي الي تقربت منو وتلاحت عليه وهو كأي راجل مقدرش يقاوم ومشى معاها وكي شافاتو كل ليلة في بار ويبات مع نسا قررت تسلملو روحها وتخليه يدير وش يحب وكلش صرا بإرادتها وكان في بالها كي تمدلو يتوشيها راح يحبس خرجات وسهرات بصح صرا العكس كمل حياتو عادي في نهار يكون معاها وفليل يبات مع الخامجات هذوك وهي كي شافاتو بلي مجبسش خدايمو قررت تبدل جاميعة وتخير وحدة بعيدة على دارهم بزاف وهذاك الي صرا دارت إقامة وهملت قرايتها ولات ليل ونهار معاه والراجل كي تمديلو كلش قبل الزواج حاجة باينة حايعفك وكي يقرر يزوج راح يشوف وحدة نظيفة لانو المرا الي تمدلك جسمها فلحرام ممكن تمدو لغيرك ( هذا تفكير الرجال مكلاه تقولولي مكانش منها لانو حقيقة مجتمعنا والراجل هك يخمم كي يكون مع وحدة وتمدلو كلش مش حايخمم يتزوجها لانو الشي الي لازم يتزوجها باش يديها صاي داه قبل الزواج وحتى ويتزوجها حايلقى طول عمرو شاكك فيها وحايذلها). وكي قرر يتزوج راحت يماه خطبتلو وكي سمعت سماح هبلت وعيات كيفاه دير بقالها غير حل واحد وهو لازم يشوفوهم كامل وهك حايجبروهم على زواج لانو العلاقة بين العايلتين حاتتضرر علاقة صداقة قديمة، وكيما كان الحال داتو لاوتال كيف عوايدهم وخلاتو يدير فيها وش بغا ووصات صاحبتها تعيط لدارهم ودارو وتخبرهم وهكاك صرا وتجمعو كامل وكي دخلو لقاوهم مع بعض، مع لول قالت بلي غتا. صبها وبقا يهدد فيها بأنو يفضحها بصح من بعد ظهر كلش كذب وهي الي سلمتلو روحها بنفسها من هذاك النهار مجد قطع علاقتو بيهم ولحد الان صاحبو ديما يحاول يحكي معاه ويرجعو كيما كانو بصح والو محد مقصح قلبو وفي حقو يدير هك تخيلي صاحبك الي حاطو كيف خوك يغدرك بالطريقة هذي _ كيما غدرتيني انت _ ميرال يعني مش حاتنساي _ مستحيل ننسى صخ انا سامحتك من قلبي بصح اليوم هذاك مستحيل يروح من بالي راح يبقى مرسخ في عقلي حتى نموت _ اسمحيلي مكانش علبالي بواش حا يصرا _ صاي كلش فات خلينا من الماضي. هيا نوضي جعت خلينا نديرو كاش حاجة للعشا جعت مت نزيد شوي ناكلك عادي وليت ملهوفة اليامات هذو ناكل برك _ ايه صح شفتك وليتي غير تاكلي بصحتك ربي يسمنك _ بعيد الشر شوفي كيفاه وليت بڨرة حتى من الدوارة بدات تخرجلي _ والله متمنية نشوفك كي تخرج كرشك باين تجي كيوت _ بعيد الشر لا تخرط كرشي خليني برك اصلا حانبدا ندير السبور _ لا مكلاه اقعدي كيما راكي خير اكي تهبلي.
#فريال