قدر مراهقة

الجزء 71

#قدر_مراهقة
الجزء 71
مابعد عليا غير كي طبطب باب الشومبرة انا زربت وقفت ورحت لخزانة هزيت قشي وخرجت لقيت رنيم قدامي قالتلي جيت نسقسي على خويا ياك مابيه والو _ايه فاتت سلامات ادخلي عندو _ لا مكلاه نخليكم على راحتكم . رجعت لشومبرتها وانا فت دوشت وتوضيت صليت وفت للكوزينة باش نطيب قهوة ملقيت والو تصفر تصفار . رحت لمجد قولتلو مكان والو في الكوزينة اخرج جيبلنا باش ندير لعشا كرهت من ماكلة برا _ والله جيت نقولك بلي ماكلة برا قريب تخرجلي من خشمي كرهتها _ ايا امالا اخرج جيبلنا ياربي مانوجدو لعشا الليلة _ هاني رايح اكتبيلي وش تحتاجي كامل _ نخرجو معاك خير والله كرهنا من دار وزيد انت متعرفش وش يحتاجو في الكوزينة حتى ونقولك مش حاتعرفهم _ قولي حابة نخرج من لخر بلا ماتكثري فالهدرة _ ايه حابة نخرج كرهت وتخنڨت من دار _ياك غير الصباح كنتي برا _الخرجة تاع صباح ماشي كيف تاع لعشية _ هيا البسي قشك في يدك 5 دقايق لوكان طولي نروح ونخليك _ فوت عيط لرنيم تجي معانا وانا ذوك نلبس. خرج فات على رنيم عيطلها من الباب برك مفاتش الحاجة الي تعجبني فيه جامي لا دخل لشنابر خواتاتو ولا يماه ديما يخلي عندهم خصوصية. لبست حجاب الي شريتو صباح فالغوج ودرتلو خيمار كحل وبشماق كحل وساك مديتش درت شوي بارفا مكثرتش باش واحد مايشمها وندي ذنوبو ثاني (ذنوبي وراني حاصلة فيهم خص غير ذنوب الكلاب الي برا ). رفدت تليفوني وخرجت لقيتهم يستناو فيا، رنيم لبست جلابة برك عليها مطولتش . مجد عينيه حا ياكلوني بصح ماقال والو . رحنا لسوبيرات شرينا كلش انا نرفد ونحط في سلة وهو يسلك فرغتلو جيبو اليوم  قضيت قيس شهر هكا نتهنى.  زاد فات جاب الخضرة واللحم ورحنا، دخلنا لدار على 21 عيا فينا نجيبو لعشا من برا مبخيتش اليوم نفحتلي نطيب في دار . نحيت قشي ودخلت الكوزينة فرزت لحوايج هذوك ورنيم عاونتني . قليت بطاطا ودرت حميص وسكالوب ودرت سلاطة ، انا تشهيت المرقاز مع البيض والفرماج. وجدنا الطابلة هوما بداو ياكلو وانا طايحة على المقلة ناكل فالخالوطة تاعي (نحب ناكل من المقلة تجيني بنينة بزاف) طحت عليها كول كول حتى خلصتها وختمتها بكوكا شربت 3 كيسان جيت نزيد الرابع نحالي مجد القرعة من يدي _ بزايدلك متشربيهاش بزاف اي تضرك _ هاتلي برك القرعة خليني نشرب بغات تضرني ولا تقتلني حاجة تخصني هذي _ مكانش _ كيفاه هذي مكانش هاتلي نشرب متقلقنيش _ منمدش _اوك براحتك ذوك نجيب وحدة خلاف من لفريجيدار _ مكانش جبت فرد وحدة نعرفك تكثري منها بزاف _ حلوف قرعة كوكا خسرتها فيا _ ماشي خسارة فيك بصح اي تضرك من بعد _ مدخلكش فيا اعطيني برك _ مكانش غير مطمعيش . عينيا دمعو حسيت بالحڨرة الكلب شويتح كوكا محبش يمدهالي، تخنزرت فيه وفت لشومبرة نغلي وحدي قعدت طالعة وهابطة لحقني هو شنفت عليه وبقيت نغلي وحدي _ ماشي مبغيتكش تشربي ولا خسرتها فيك لا بالعكس الشي الي تطلبيه نجيبهولك بصح مهيش مليحة ليك تكثري منها اي تضرك _ مدخلكش فيا تضرني ولا تنفعني حاجة تخصني غير انا _ انت كلك على بعضك تخصيني .
#فريال