قدر مراهقة

الجزء 22

#قدر_مراهقة
الجزء 22
نضت الصباح لبست قشي مشطت شعري ورحت فطرت معاهم وخرجنا. وصلنا وائل انا وماما وختي ريتال حطنا وراح بديناها من 9 ماخلصنا حتى ل18 رجليا طابو مقدرتش نوقف جبنا لعشا من برا ودخلنا تعشينا ورقدنا من التعب ماحسيت بوالو. فاتت سمانة تجري مع توجاد والجريات لحق نهار الجمعة تلمو عماماتي وعمومي ونساهم وولادهم وخوالي وخالاتي جداتي الدار تعبات هذا يوجد من هذا يجري (تعرفو حالة المناسبات) وانا محبيتش ندير حاجة كبيرة بغيت كلش عادي وفدار منعيط لحتى واحد بصح مقبلتش ماما، جات لكوافوز لدار دارتلي كلش سامبل منحبش حاجة شارجي، لبست غوب صواري فالغوج جاية من الفوق مزيرة ولتحت لارج وفيها شقة لنص لفخذ مع طالو غوج (حمرتها المرة هذي ولاو يعيطولو طمطومة مع خدودي حومر من عند ربي) نسيت موصفتلكمش روحي (جاية طويلة 1,68 وضعيفة بصح عندي لاريار الله يبارك يكفي ويوفي هههه اما الصدر والو مكانش صغير كثر خير لبونج هو الي فكني  بيضة وشعري كحل يوصل لنص ظهري عينيا كبار وخوضر خرجت لماما وشوافري طالعين وحدهم بلا ريسيل بلا والو فمي صغرون كي نحكي ميبانش بكل ونيفي متوسط ماهو كبير ماهو صغير وعندي لخدود). دخلت ماما وخالتي وجداتي وعمتي غير يقولو الله يبارك ربي يبعد عليك عيون الحساد وربي يحفظك وحطولي ملح فطرف سارفيات ولاحوه فصدري (زعما يبعدو العين عليا تعرفو عقلية لكبار ههههه) باركولي شوي هكا سمعنا صوت لاصونات والبارود داير حالة خرجو يستقبلوهم وخلاوني مع اسيل حتى هي جات تهبل لبست غوب صواري ستيل حوتة فلبلوسيال وريتال لبست كيفي غوب غوج تحب تعاندني ديما نبان ضرتها ، شوي هك جاو خرجوني دخلت لصالة لقيتها معمرة بلفامي تاعي وتاعو الله يبارك في عرام سلمت على جداتو ويماه وخالاتو نسا خاوتو خواتاتو يهبلو الله يبارك (غير فرد وحدة محملتهاش السم يقطر من وجها) رنيم جات حضنتني وتبوس فيا علبالها منقدرش ندزها قدام الناس فرحانة كثر مني تقول هي لعروس.حطينالهم الضيافة الرجال قراو الفاتحة ودخل خويا وائل ومعاه مجد وياربي وشنو هذا الصراحة جا يهبل اول مرة نشوف معاه مليح ونثبت في شكلو(جاي طويل بزاف انا منبانش قدامو وهاز صحتو من السبور لحديد مهوش سمين بصح لاطاي تاعو تهبل وجاي بيض وشعرو كحل وشوافرو غاثيين وعينيه كوحل يهبلو وفمو يهبل خصوصا كي يضحك تقول نروح نعضو من الغيرة) الكلب باشع غير انا بالغت شوي فالوصف تاعو، لابس كوستيم وشوميز وصباط فلكحل (كحلها كثر من زهري ايه عندو الحق الزواج هذا راح يكون كحل عليه ) مع جسمو ووقفتو جا يهبل. دخل لبسلي الخاتم وانا ثاني قسمنا لابياس مونتي وكلنا بعض وتصورنا معاهم كامل عطاني الشرط تاعي(حنا عندنا يمدو 35 مليون وكبش وقضية لنهار الحنة ولا يمدوهم دراهم) وخرج ،زادو شوي ولحقوهم النسا بقاو غير لفامي تاعنا تعشاو وتفارقو خلاونا حاصلين مع التڨفاض والتسياق لوكان مش بنت خالتي وخالتي رانا حصلنا كملنا مع 1تاع ليل قدقد هوما راحو رقدو وانا واسيل واسراء بنت خالتي(عندها 22سنة قد ختي ويقراو مع بعضملي كانو يتفاهمو يبانو خواتات الي يشوف الانسجام بيناتهم يقول توأم غيرحقيقي) روحنا لشمبرة وبقينا نشوفو فلحوايج الي جابوهملي جابولي فاليزة(فيها الشدة التلمسانية بصوالحها كامل وصندالة وبوشات ودوبياس بيجامة زوج حجابات شرعية) وبارير تاع ذهب (يعبيو العين تاع قيمة) سلة تاع فواكه ومكسرات وكوسميتيك ليبارفا. اسيل واسراء طار عقلهم وعجبوهم لحوايح اما انا ملي شفت الحجاب الشرعي الجنون ضربوني وش يقصد الكلب هذا راح يحكم فيا ولا وش بابا ومسيفش عليا الحجاب يجي الع&& يحكم فيا ويدبر قلقني روحت رقدت وخليتهم ماقصرت ماندبت جايبتها اليامات هذو غير رقاد قد مانقدر نهرب من الواقع.
#فريال