قدر مراهقة

الجزء 79

#قدر_مراهقة
الجزء 79
نضت دوشت وفت فطرت . يومي فات عادي فليل خرجنا مجد ندورو شوي وتعشينا برا وروحنا. فاتو يامات عادي تحسيهم هدوء ماقبل العاصفة . اليوم تفاهمنا مع مجد يدينا لبحر لانو الصيف كمل وحنا مزال مبحرناش وبحكم الولاية الي ساكنين فيها مخلطة بزاف محبش يخلينا نروحو غير بالمحاولة والنديب تاعي، رحنا الصباح على 10تقول رايحين نحاربو. دانا لبلاج بريفي مع نوصلو بعد رمينا لحوايج انل ورنيم ودخلنا نبانو مشتاقين بحر وحنا على العام فيه. انا لبسا بوركيني ورنيم شورط وبيستي كي دخلنا للما تفصلنا تفصال انا زربت خرجت حشمت بزاف لاني مدايرة حجاب شرعي وعيب عليا نتعرا هك. خرجت قعدت نستنى قشي يشيح ونلبس فوقو الحجاب لانو صح صح مفصل مع انا زدت سمنت حتى من دوارة وخرجتلي منعرف علاه (نظل نبلع زي البقرة ناكل الاخضر واليابس اليامات الي فاتو كامل وانا نبلع كل مرة نتشهى حاجة ولازم ناكلها ولا اليوم هذاك نقلب الدار عليهم بالنديب ولبكا كامل حارو فيا هبلتهم ونظل لاصقة في مجد نبوس ونعض وهو غير مسايرني يحب يريحني وانا غير مانزيد في هبالي ولا رنيم مسكينة الي في الفترة هذي شربتلها المر مسكينة نظل نطلب منها تطبخلي ومناكلش ولا الديار نظل نسيق فيهم صباح وعشية ونقولهم فيهم الريحة) . قعدت مع مجد وهو كان يحكي فتليفون ملي جينا وهو رافدو قالي عندي شغالات وهكاك وانا آصريت عليه نخرجو اليوم وهو كيما عوايدو مرفضليش طلبي. كوبا على الراجل وشاف فيا كيلني من لفوق للتحت _ علاه خرجتي ياك تظلي تندبي على لبحر هاو قدامك روحي تعومي اشبعي منو _ لا محبيتش _ تتمسخري بيا ذوك سمانة وانت تندبي على راسي خليت شغالاتي وجيت معاك _ اذا مشغول هيا نروحو _ علاه شبيك شكون قلقك وريهولي اليوم نتفاهم معاه _ لا حتى واحد غير كي دخلت للما ولا كلش مفصل فيا وهذا ميصلحش لاني مدايرة حجاب شرعي _ عمري كبرت ولات تعرف صلاحها الله يبارك ان شاء الله تبقاي كيما هك بهاذ الوعي الي طاح عليك اليامات هذو مفهمتش منين بصح جا في وقتو _ ان شاء الله _ مكيش مريضة _ لا لباس علاه سقسيت _ كي مرديتيش عليا ومشركتيش فمك كيف عوايدك _ وش حانربح كي نشركو تعبت من المشاكل وقررت نبدا من جديد ونسسى الي فات لانو ماربحت والو كي راني متفكراتو غير يضرني برك _ ان شاء الله تكوني قد كلمتك وتكملي هك ورايحة تكون حياتنا افضل _ ان شاء الله بصح خلي كلش في وقتو مكلاه تزربني _ اوك معليش براحتك الي يساعدك نديروه. كنت ناوية نبدا من جديد ونعطيه فرصة لانو في الفترة الي عشت فيها معاه شفت منو غير الخير واهتمامو بيا كي نمرض غفرلو كلش، بصح تجري الرياح بما لا تشتهي السفن نويت نسامحو ونبدا معاه من جديد بصح صرات حاجة خلاتني نحقد عليه ونكرهو كثر من قبل ونتمنالو الموت لدرجة وصل ليها ومرحتش نطل عليه.
#فريال