قدر مراهقة

الجزء 18

#قدر_مراهقة
الجزء 18
نضت غسلت لماعن الي كلات فيهم وروحت دوشت وصليت عندي يومين بلا صلاة غير هي الي تريحني. صليت وش فاتني بالسيف مانتحرك جرحي مزالو جديد الكلب فرعني الله لاتربحو ربي يجيبهالو.نصلي ونبكي اول مرة نبكي على السجادة يقولو الشكوى لغير الله مذلة وانا شكيت لربي على الضر الي صرالي ونتمنى تفرج عليا. مع ال18 دخلت ماما وختي ومعاهم بابا باين كانو مع بعض لقيتهم جايبين السوق كامل، ميرال ارواحي بنتي عندي معاك هدرة_راني جاية بابا روحت لصالو لقيتو قاعد قعدت قدامو وانا مهبطة راسي حشمت منو حتى ومهيش غلطتي بصح كي نتفكر بلي شرفي ضاع وشرف بابا وخاوتي ولا في الارض منقدرش نهز عيني ونحطها في عينيهم. بنتي تعرفي معزتك عندي ومكانتك وقداش نحبك واي قرار ناخذو راح نكون فكرت مليح في مصلحتك _ايه بابا علبالي بلي تحبلي الخير ومستحيل تضرني _شوفي بنتي مجد ولد الحاج محمد الله يبارك راجل وعليه لكلام مكانش كيفو راجل وسيد الرجال والناس كامل تشهد بهاذ الشي وخدام وبدارو وصلا انت تعرفي عايلتهم مليح وصاحبتك بنت عمو ونعم التربية_ايه نعرفهم الله يبارك_المهم مجد خطبني فيك وانا شاورتك خاوتك ويماك وهوما قابلين بقيتي انت بعثت الصباح ماماك تحكي معاك وقالتلي بلي انت قابلة وذوك نحب نعاود نسمع قرارك ومتخافيش انا نوقف معاك سوا رفضتي ولاقبلتي تلقايني ديما في كتافك ونساندك وهذي حياتك انت قرري وش يخرج عليك وعلبالي بلي جامي تغلطي وتهبطيلنا ريوسنا. كي قالي هكا موس ومشا في قلبي ايه يابابا وتعرف وش صرا لبنتك وبلي شرفكم ولا يطايش وبلي بنتك عفسو عليها وهانوها وبلي الراجل الي تشكر فيه وتقولي بلي راح يصوني هو نفسو الي غلط ودمرني. نطقت بالسيف وقولتلو ايه قابلة _امالا نقولو مبروك عليك ومتأكد مستحيل تندمي على هاذ الزواج وغير هو الي يوقف معاك ويساندك _ان شاء الله. نضت رجعت لشومبرة لقيت اسيل تفرز لحوايج انا قاعدة وهي توريلي وانا منيش حاطة معاها بكل نخمم في حياتي ومستقبلي ووش مخبيلي المكتوب ووكتاه تضحكلي الدنيا، بصح ديما يصرا العكس كل مانقول تحلو مشاكلي وراح تفرج يخرجلي مشكل من تحت الارض ويخربلي حياتي كل ماراهي مخربة.
#فريال