قدر مراهقة

الجزء 24

#قدر_مراهقة
الجزء 24
كملنا لعشا غسلنا لماعن وسيقنا الكوزينة انا رحت ديراكت رقدت منحبش نقعد وحدي باش منتفكرش وش صرا. لغدوا منو نوضوني على صباح ربي 7 تقول رايحة نحارب، نضنا فطرنا لبسنا قشنا (انا كيف العادة سروال جين وشوميز ودرت كوتشيفال لشعري والله ماندير الحجاب الشرعي يبالو راح نخافو كلب). وصلنا خليل انا ولبات (طبعا علبالكم علاه باين باش يشوف حبيبة القلب هههه)، بديناها من 8وحنا لبرا ماخلصنا حتى ل21 تاع ليل رجليا طابو عيت نوقف شرينا قش تاع دار وتاع برا وليصاندال البشامق ليزيكسيسوار الماكياج ليباغفا سيشوار ليسور (تقريبا جبنا كلش وبقاولنا حوايج خفاف وكيما الكريمات وليبرودوي تاع البشرة خليناهم لخرين). روحنا لدار تطحنا ديراكت رقدنا متعشيناش بكل مافقنا غير على صوت نبع الحنان والعذاب هي وخالتي ينوضو فينا باش نزيدو نخرجو عياو معانا كي مفقناش راحو خرجو وداو معاهم ريتال، حنا مافقناش خلاص يوم كامل راقدين التعب والشمس صرعتنا ل19باش نضنا ديخانين حالتنا حالة وانا اكثر وحدة نضريت منحملش الشمس بزاف. دوشنا وروحنا للموزينة كشما ناكلو قتلنا الجوع ملقينا حتى واحد فدار على زهرنا لمسود حتى نديرو وكل وحدة تقول لختها ديري انت، ايا لبست جلابة وخرجت جبت بيتزا من برا ناكلو خير مايقتلنا الجو وزدت كوكا وهمبرغر ليا (الله غالب كرشي كبيرة نحب ناكل بزاف) روحت ليه ليه مطولتش لوكان يشوفوني خاوتي يديرولي درش على لخريج فليل. كلينا خلصنا ورجعنا نرقدو دخلنا في غيبوبة ديراكت التعب بزاف رجع علينا وزيد سمانة كامل وحنا نجريو ونوجدو للفاتحة وزاد الجهاز هلكنا. جبناها 21يوم وحنا نجريو مع جهاز جيب منا روح من لهيت بزاف صوالح ومزية عاونوني لبنات ولا كنت ضعت مخلاونيش لاخر لحظة، غدوا لعقد تاعي وفليل ندير الحنة الدار مهولة بالغاشي راح ندي رالحنة فلاصال بصح هوما جاو هنا لوكان غير جاو يعاونونا شوي بالعكس زادو علينا الهم والغمة كي نسا خوالي كي عمامي غير مرت عمي وحدة هي وبناتها دايرين اليد فاليد مع ماما وخالتي يعاونوهم وعماماتي يبانو ضياف قاعديين الرجل فوق الرجل ويدبرو فوق هاذ الشي ديرو هك ومديروش هك وعلاه زوجتو الطفلة مزالها صغيرة وهذيك وهذيك، من لخر فامهم مشركين يليق الواحد يقتل عزرينهم ويتهنى. كملنا كلش حكمت بلاصتي جيت نرقد صونا تلفوني نيمرو جديد منعرفوش كوبيت زاد عاود وانا نكوبي شي 5مرات من بعد بعلي ميساج(هزي عليا انا مجد نحب نحكي معاك فموضوع مهم) زاد عاود عيط هزيت عليه_الو_وش بغيت وش خصك فنص الليل تعيط لناس ماتقول راقدين ميتين تعبانين_بلعقل برك متاكليناش_من لخر ازرع ينبت وخليني نروح نرقد تعبت_غدوا لعقد تاعنا _ايه علبالي عيكت باش تقولي المعلومة هي_لا ماشي هكاك عيطت باش نقولك غدوا راح تولي مرتي فالقانون وانا بصراحة نحب مرتي تتحجب وتستر روحها منحبش الناس تتفرج فشعرها وجسمها_والمطلوب_من قبل بعثتلك الحجاب الشرعي ديريه _وشنو_كيما سمعتي غدوا ارواحي بيه _منجيش ومنديروش من لخر معندو مدخلك حياتي وانا حرة فيها _شوفي اليامات الي فاتو خليتك على راحتك تخرجي بلا حجاب ودوري مقلت والو بصح من غدوا اسمك راح يتكتب على اسمي وتولي مرتي قدام الناس الكل وانا نحب مرتي تستر روحها _منديرش واذا بغيت تبطل بكل ميهمنيش فوق مادمرتلي حياتي حاب تزيد تهردها_انا منغاودش الهدرة وانت غدوا تجي مدايراتو ولا نروح لباباك ونحكيلو كلش وهو اكيد راح يصدقني كيمل تعرفي يحبني بزاف وعلبالو انا منكذبش_وليت تهدد فيا ذوك ياواحد الرخيس هذا ماخصك _انت بغيتي متفهميش الهدرة ويليقلك غير التهديد باش تتريڨلي _الله لاتربحك ربي يجيبهالك يالكلب _سبي حتى تشبعس مرتي لعزيزة وبلعقل على روحك لايطرطقلك كاش عرق. كوبيت عليه نرجف من لعصب الكلب هذا راح يمرضني وزايد فوقها يهدد فيا، بصح عندو الحق لازم نستر روحي ذوك كلش تبدل راني مرا متزوحة واصلا انا كنت راح نديرو وحدي بلا مايقولي بصح كي قالي ذوك وهددني غاضني الحال، غطيت على راسي وهربت لرقاد الحل الوحيد للمشاكل هو الرقاد.
#فريال