قدر مراهقة

الجزء 106

#قدر_مراهقة
الجزء 106
الكلينيك رحلتها نسب ونعيط ونخبش محد كليتو ياالكلب وهذا كامل في جرتك ربي يجيبهالك ايما رايحة نموت والله لازدت حطيت يدك عليا رخيس. انا نسب والفرملية تضحك وزدت هبلت كي قالتلي مزال باش تولدي لثم عقل مابقا فيا. فاتو سوايع باش ولدت الموت شفتها مكنتش عارفة بلي صعيبة لدرجة هذي انو تخرج روح جديدة لهاذ الدنيا منك صعيبة موت الحنة تحت اقدام الامهات لانو الشي الي يجوزوه في الولادة يعادل كسر 42 عظم وهو ثاني اشد الم بعد الحرق حيا هكا ويجيك واحد من لهيت يقولك الاب خير من الام امشي تلعب بعيد انا تفرعت روحي خرجت باش قدرت نولد حليلهم النسا هذوك الي يولدو كل عام والله حرت فيهم كيفاه يتحملو الوجع منعرف وش في راسهم ومخليهم يطبعو فلولاد برك (الجمل يضكك على حدبة خوه ونسى بلي هو ثاني عندو حدبة هكا انا نضحك عليهم ورجعت كيفهم). ولدت وجبت طفلة صغرونة تهبل تشبه لباباها بزاف كي رفدتها وحطيتا فوق صدري رتحت شوي بصح مطولتش وتغاشيت ، فقت على صوت ماما وختي وعجوزتي يحكيو بلعقل حليت عينيا وحاولت نوقف مقدرتش فشلت خلاص جاو عاونوني وباركولي الفرحة في عينيهم كانت باينة. بدلولي قشي شوي هك دخل مجد وخاوتي وبابا وباباه باركولي وجات الفرملية جابتلي بنتي سقساني مجد وش حابة نسميها قولتلو لجين. رفدها وآذنلها في وذنها عطاهالي هزيتها شوي تقلقت منها كي بدات تبكي عيت نحمل ومع حس الي كانو مدايرونو عيطت عليهم قولتلهم اخرجو عليا  يالله برا راسي وجعني، كامل تخلعو فيا ماما جات قالتلي وش صرالك ابنتي هك قولتلها برا عليا مبغيتش نشوف حتى واحد واديو الطفلة هذي معاكم صوتها قلقني عيت نحملو. الرجال خرجو ونسا بقاو يهديو فيا وانا تقول خبطني جني نعيط عليهم برا قولتلكم براااا كي مالقاوش كيفاه يدرو معايا خرجو وداو لجين معاهم. جا مجد يقربلي قولتلو بعد انت ثاني منيش حابة نشوف وجهكم اخرج _ براحتك راني خارج متتقلقيش برك . هوما خرجو وانا بقيت مخنوقة وكرهت كلش جاني حالي على لبكا بقيت نبكي وبعدها نخبط في راسي تخنقت وعيت نحمل شوي هك دخلت عليا طبيبة تهدي فيا وانا غير مانطير كي عيات وش ديرلي ضربتلي برا مهدئة طحت راقدة زي الحطبة مفقتش. قعدت 15يوم في سبيطار فوتهم بالسيف حكمني اكتئاب مابعد الولادة كرهت كلش نبغي غير نبكي بنتي وهملتها نرضعها بالسيف وحتى من صدري مفيهش لحليب نشف من القلقة بزاف.
#فريال