قدر مراهقة

الجزء 23

#قدر_مراهقة
الجزء 23
غدوا نضت على 15على صوت اسيل واسراء يشايخو انا كنت حاطتها 8تاع صباح نضت ديراكت نعرشلهم_وش انتوما متحشموش الناس راقدة وانتوما قاعدين قدام راسها وتغردو وينو احترام النائم وينو احترام حقوق الانسان هذا اصغر حق عندي وبخلتوني فيه، نطقت اسيل_بعثلك برك لا يطرطقلك كاش عرق ويكون في علمك راهي 15الالة الناس ناضت وتغدات وراحت تخدم وروحت وانت مزالك راقدة وفوق هاذ الشي تنوضي تندبي على ريوسنا منعرف وكتاه تزوجي ونتهناو منك_مبقاش ونروح وتتهناو مني عندك برك تبكي عليا ولا تجي عندي كعاد انا مش راح نجي عندكم، جات اسراء حضنتني_وش بيها بنت خالتي الزينة وعلاه تتقلقي مديريش على البقرة هذي راهي غارت كيعاد راح تتزوجي قبلها وتخليها مع ماماك تعود تدي لبهادل وحدها _خليني منها الكلبة لوكان غير يجي مسود السعد تاعك يديك ونتهنى منك _ربي يعينو راجلك راح تهبليه. نضت روحت غسلت وجهي وفت حطيت نفطر لقيت ماما وخالتي هذا وين راح يحطو لقهوة تاع لعشية، ايا قعدت قصرنا شوي وطبعا بلا بهادل ماما متكملش القعدة_وش الالة انت ناوية تقضيها رقاد اليامات هذو_خليني برك ياك رانا فالعطلة _علبالي راكم ديتو العطلة بصح متنسايش عرشك بقالو شهر وياربي توجدي حوايجك باش تلحقي_عادي ماشي شرط ندي بزاف حوايج نشري غير وش نلبس_شفتي الجايحة وش تقول تروح بلا جهاز باش يضحكو عليها الناس ويقولو والديها مجهزوهاش. قالتلها خالتي خليها عندها الحق تدي وش تلبس وصاي ياك الطفل قالكم متجيب والو دارو واجدة من كلش تجيب قشها وصاي وزيد مش راح يقعدو فالولاية عذي راح يديها معاه وين يخدم _اخلايا وشنو وكتاه قالها كيفاش يديني معاه انا منروحش نبقى هنا فنفس الولاية معاكم_لازم يديك معاه هو خدمتو كامل لهيت ومتصلحش يخليك هنا ويروح _وش فيها يخليني عندكم كي يروح ويحي يديني_ياربي صبرني على الكفلة الي عطيتهالي مدام بغيتي دار باباك وعلاه قبلتي تتزوجي _خلاص مقلنا والو نروحو معاه ونسكتو خير. جاو لبنات قعدنا نقصرو ودرنا لاليست وش نحتاج نشري ڨاع وتفاهمنا غدول نبداو نخرجو_التصديرا على ماما وخالتي انا خيرت وش بغيت وهوما يتفاهمو مع الخياطة حبيبتهم وصاحبتهم من الصغر، اسراء واسيل وانا نخرجو ونجيبو الباقي تعرفو الجهاز ميخلاصش وزيد شهر ياربي مايكفينا، القاطو راح نكومونديه من عند نفس لمرا. درنا لعشا مع بعض حنا لبنات ونقصرو خلصنا حطينالهم تعشينا مع بعض هذا كامل تحت نظرات العشق والحب بين اسراء وخليل يبالهم والحد ماهو لاتي بيهم بصح كامل فاقولهم ودارو رواحهم معلبالهم بوالو هههه ماما وخالتي تفاهمو بعد عرسي يزوجوهم ويتهناو (عام الزواج بداو بيا ومن بعد هوما ويزيدو وائل ورنيم قالك حبو يتهناو منا ويشوفو ولادنا).
#فريال