قدر مراهقة

الجزء 78

#قدر_مراهقة
الجزء 78
وجدنا لعشا حطينا على الطابلة دخل مجد تعشينا مع بعض، غسلنا لماعن وتعاونا سيقنا الكوزينة فت لدوش دوشت وتوضيت صليت،  ردفت مخدتي وجيت خارجة حبسني مجد _ وين بيها _ نرقد مع رنيم _ وشكون شاورتي _ شاورت راسي شكون حانشاور مثلا _ تشاوريني انا _ علاه راني في حبس ولا وش _ ماشي حبس وانما انت مرا متزوجة ومن واجبك تشاوري راجلك فكل حاجة قبل ماديريها _ هذيك كي نخرج لبرا اني نشاورك بصح كي نكون في دار مكلاه تطمع نجي ونشاورك وهيا ذوك نخليك راني رايحة نرقد بونوي راجلي لعزيز _ مكانش ترقدي هنا في شومبرة غير مطمعيش تباتي بعيدة عليا _ ناناك منرقدش قدامك باش تزيد تعضني ايا باي. هربت لشومبرة رنيم وغلقت الباب بالمفتاح جا يطبطب وانا والو مي الحيط يغات تفتحلو رنيم الباب تخنزرت فيها قعدت متحركتش، هو طبطب حتى كره وراح لشومبرتو انا قولت صاي كره ورايح يرقد بصح لا رجع فتح الباب بالمفتاح منعرف منين جابو وجا هزني وانا نفرفط بين يديه زي الجاجة، وصلني لشومبرة ورماني فوق السرير وغلق الباب بالمفتاح خباه في جيبو وجا تكا على سرير تخنزرت فيه جيت نايضة عيط عليا _ بلاااصتك، رجعت تكيت ماشي خفت منو ولا اصلا انا منخافش غير تعبت برك وبغيت نرقد منحبش ندير المشاكل انا انسانة مسالمة نميل للهدوء بزاف نكره العنف والعياط، رقدت على جنبي وغطست في النوم كيما موالفة. الصباح نضت لقيت روحي وحدي رفدت تليفون لقيتها 13 ايه وش رقدت اويلي نبان دخلت في غيبوبة منعرف منين طاح عليا الرقاد هذا كامل. نضت دوشت توضيت صليت وفت للكوزينة لقيت رنيم توحد في الطابلة تاع لغدا شوي هك دخل مجد كي شاف عينيا منفخين _ متقوليش هذا وين نضتي _ ايه هذا وين علاه كاين مشكل _ لا مكانش بصحتك النوم. مجاوبتوش كليت معاهم شوي دار عليا قلبي نضت نجري لدوش نتقيا، غسلت وجهي وجيت خارجة لقيتو قدام الباب _ وش بيك _ والو غير قلبي دار عليا كعاد هذا وين نضت وتغديت عليها صرالي هك _ تحبي نديك لطبيب _ لا مكلاه ذوك نشرب كاش جو يتنحى عليا _ هيا روحي لشومبرة ذوك نجيبلك _ مكلاه تعب روحك.  رجعت للكوزينة شربت كاس جو عجبني زدت كاس مور خوه حتى خلصت القرعة كامل هوما مخلوعين فيا. كملو غداهم مجد رجع يخدم وانا ورنيم تعاونا غسلنا لماعن وسيقنا الديار كامل مسحنا الغبرة بدلنا لفراشات وغسلناهم ، ماجينا نخلصو لقيناها 17 تاع لعشيا انا ظهري حسيتو تقسم عليا، فت لدوش دوشت وتوضيت صليت ورحت رقدت مافقتش حتى لغدوا صباح اي وشنو هذا نعول نرقد ساعة يرجعو سوايع اففف ياربي مايكون غير داش مرض حكمني اذا بقيت على الحالة هذي لازم نروح لطبيب ونشوف وش بيا.
#فريال