قدر مراهقة

الجزء 59

#قدر_مراهقة
الجزء 59
راح ديراكت حكمها من شعرها وخبطها للحيط، قعد يخبط ويعاود ويماه تعيط على خاوتو وباباه باش يجيو يفكو وتفجأت كي جاو كامل وبقاو يتفرجو واحد ماقرب وفكها منو باباه قالهم خليوه يربيها كان لازم عليه يديرلها هك نهار طيحت بينا قدام الناس قال كلامو ودار راجع لشومبرتو اما خاوتو قعدو يتفرجو وساكتين ، لاحظت بلي كامل يحتارموه ونهار يحكي ولا يدير حاجة يسكتو ميناقشوهش وديما قراراتو يوافقو عليها كأنو هو لكبير فيهم. قعد يضرب فيها شوها بمعنى الكلمة جبهتها تسيل باادم نيفها في حالة(انا الي ضربتها ليه مش مجد) ، مابعد عليها حتى تغاشات باش ناض دار طالع لشومبرة لفوق ويماه راحت تجري تندب فوق راسها قتلها قتلها وش راكم تتفرجو ارواحو عاونوني نديوها لسبيطار نرجس مرام عاونوني ، قعدت تعيط ولا واحد قرب وعاونها تقول ماهي ختهم الي متغاشية فلرض وانما كلبة من شارع وحتى الكلبة وتغيضهم شفتهم نربين بزاف كلاب ويعاملوهم احسن معاملة خوه كي تكسرت رجل الكلب تاعو قلب الدنيا مخلاش طبيب مجابوش. روحت جبتلها كاس ما ومديتهولها خليتها ترش على وجها شوي هك حلت عينيها تخنزرت فيا ودزتني تقول ماهي نفس الشخص الي دا طريحة ذوك متترباش كلبة وكيف عوايدها تتهجم عليا جات تلوح يدها خبطتها يماها بكف _سماااح هنا وتحبس تغيطي بزاف شبيك هبلتي هاتضربي مرت خوك وحنا واقفين لدرجة هذي وليت متحتارمي لا كبير لا صغير ياخسارة تربيتي وتعبي فيك، هي تقولها هك ولوخرا تنوض تسب وطيح مخلاتش كلمة تاع عيب ومقالتهاش _وتحڨرو فيا على جال الق*** فرخة قد صبعي جات البارح ولات تمشي فيكم من وذنيكم وهذا كامل كعاد مرت الع*** تاع ولدك ووو. مخلات مقالت تسب فيا وفي مجد قالتهم كامل خاوتها ونساهم ناضو روحو بقاو غير خواتاتها شوي هك وهبط مجد في يدو صاشي وصل قدامها ورماهالها في وجها_شوفي هاو دليل على شرف مرتي وعفتها شوفي بعينيك باش تعرفي بلي مرتي اشرف منك بألف مرة. انا تشوكيت مكنتش متوقعة يدير العفسة هذي يماه هبطت راسها خواتاتو ثاني غير هي فتحت الصاشي ولقات شوميز تاعو فلبيض وفيها بقعة تاع دم، تفكرت الشوميز هذي هي نفسها الي كان لابسها نهار غتا. صبني اصلا كيفاه ننساها مزال هذاك اليوم محفور في عقلي ومستحيل ننساه. كي شافت الدليل هذاك سكتت مزادتش حرف هو عاود رفدو وطلع وتنوض نرجس تسب وتعاير ويالكلبة وصلت بيك لهنا حتى تخلي لقدر يطيح بينك وبين خوك ووش دخلك فيه واذا صح توشاها قبل الزواح هو على الاقل راح يجري وزوجها مش كيفك رماك حتى عدتي تحللي وتبكي باش جا تزوجك وبشنافة ثاني وهي على الاقل عندها دليل على شرفها شوفي انت وين تلقايها واذا عارفة وين ضيعتي شرفك منعرف وينى بلاصة داك الكلب تاعك_بلعيه ومتخلينيش نوض ليك نمرمدك الليلة معندو مدخلك فيا. نطقت يماها هذا ماخص تضربي ختك لكبيرة هيا اتهزي طيري لشومبرتك وجهك منشوفوش قدامي ياله _ودارت لبناتها طيرو انتوما ثاني لشومبرتكم. دارت ليا انا ثاني بنتي اسمحيلي على وش صرا علبالي جرحاتد بزاف بصح امسحيها فيا الله غالب الطفلة هبلت واكي شفتي راجلك وش دار على جالك باين بلي هابل عليك اطلعي ليه ذوك وحاولي تهديه شوي ونصيحة مني راجلك احكمي فيه بيديك وسنيك مستحيل تلقاي واحد كيفو يحبك ويقدرك لدرجة ضرب ختو على جالك، هي راحت لشومبرتها وانا بقيت نخمم في كلامها من جيهة عندها الحق بصح الشي الي دارو معايا مستحيل ننساه حتى ويدافع عليا ويضرب الناس على جالي مستحيل ننساهالو ولوكان منوجعوش كيما وجعني ميبردش قلبي.
#فريال