قدر مراهقة

الجزء 108

#قدر_مراهقة
الجزء 108
فقت على صوت لعياط باين بلي رجال يتقابضو حليت عينيا لقيت روحي في سبيطار تالمو نظل فيه حفظتو جيت نتحرك مقدرتش كلش فيا مكسر الله يعطيك كسرة ليديك كلب كسرتني الله يكسرك. بقيت نعيط كشما يجي واحد يمدلي نشرب عطشت دخلت ماما تجري ومن وراها بابا خويا وائل ومعاهم مجد كان رافد لجين. ماما جات حصنتني _ بنتي لباس عليك بواش راكي تحسي _ عطشت بغيت نشرب، جابتلي شربت بابا باسني وحضني سقساتني ماما قالتلي وش صرا كيفاه حتى وصلتو للحالة هذي احكيلي ابنتي _ وش نحكيلك هاي باينة حالتي تاع وحدة دات طريحة _ علبالنا عيطلنا مجد وقالنا بلي ضربك وراكي في سبيطار ذوك بصح مقالناش السبب الي خلاه يضربك وحتى حاولنا معاه مبغاش _ والمطلوب _ احكيلنا وش صرا مبغيناش نظلموه _ هههههه بنتك في سبيطار وانت مزالك واقفة معاه ومبغيتيش تظلميه اي باينة وش صرا الراجل هذا ضربلك بنتك ودخلها لسبيطار هاهو قدامك جيبيلها حقها كيما باقي الامهات _ بنتي ونعرفها فمها خاطيها وملي تزوجتي وحنا نشوفو معاملة مجد لمليحة معاك حتى قبل مايتزوجك كنا نعرفوه متربي وعاقل وباين كشما قولتيلو حتى خليتيه يوصلك لهنا _ ايا مدامك واقفة معاه اخرجي عليا متوريليش وجهك هاو قدامك اديه وروحي عليا براااا. عيك عليا وائل بلعي وش الطريقة هذي الي راكي تحكي فيها مع يماك متحشميش _ بلع انت معندو مدخلك اخطيني ادي يماك وبرا _ تاع الصح عندو الحق كي ضربك تستاهلي اكثر من هك باينة تكوني سبستيه ولا كشما قولتيلو عليها وصلك هنا من عندي شح فيك _ براااا اخرج عليا باش توقف مع ختك وتجيبلها حقها وقفت ضدها _ ختي على العين وراس الي يقيسك نجبدلو عينيه بصح نعرفك مليح ونعرف فمك والدليل ذوك كيفاه حكيتي معانا ومجد نعرفو مليح ميظلمش _ ايه معليش انا لقبيحة والظالمة اخرجو برك عليا قلقتوني برا. قالي بابا اتكالماي متتقلقيش _ خرجهم عليا برك نكون لباس _ خلاص بنتي ذوك نخرجو. هوما خرجو وانا نضت لشومبرة هذيك قلبتها كامل نخبط ونعيط كلاب رخاس واقفين معاه ديما هو الصح وانا الغالطة كلب الله لاتربحو، قلبتها كامل دخلو عليا يتجاراو عياو يسيطرو عليا اخر شي شفيت عليه ضربولي برا وتكالميت . جبت سمانة وانا في سبيطار ككمني انهيار عصبي الضغط الي كنت عايشاتو كامل فجرتو في سمانة هذي وليت نهدر برك نسب نكسر حتى رتحت وتنحى عليا قلبي برد من كلش. اليوم خرجت من سبيطار لقيت بابا ومحد واقفين مع بعض ولجين في يدو مغطيها من البرد قالي روحي رتحي يامات ونجي نتفاهمو كي تكوني لباس عيطيلي _ منتفاهمو ماوالو اخطيني برك نكون لباس ودرت لبابا قولتلو هيا نروحو لدارنا تعبت. فتحت الباب جيت نركب شفت مجد عطتلي لجين قالي حوايجها راني من بعد نبعثهملك _ وش ندير بيهم _ كيفاه وش ديري بيهم حوايج الطفلة حليبها وقشها وكلش تاعها _ ايه ومن بعد احكم حوايجك عندك _ ميرال متهبلينيش شدي بنتك الجو بارد تعود تمرض _ بنتك شدها ولا اقعد مدخلنيش . دارت ليا ماما قالتلي وش راكي تقولي احكمي بنتك وش تمسخير هذا _ منيش نتمسخر يحكم بنتو عندو نهار تزوجت كنت وحدي ونرجع وحدي دبر راسو يحكمها ولا يرميها _ ميراااال انت هبلتي خلاص هذي بنتك اذا نسيتي كيفاه تقدري تقولي عليها هك _ مبغيتهاش يحكمها عندو. قالي معليش بنتي نشدها معنديش مشكل _ دير مزية . ديمارا بابا طريق كامل وهو ساكت وماما تاكل في روحها وكيفاه تخلي بنتك وحدها ومتحشميش وش من قلب عندك ، مخلات ماقالتلي انا غير ساكتة سمطتها. لحقنا لدار فت ديراكت لشومبرة دخلت وسكرتها من اليوم نفسي وبس الباقي بحر عليهم يروح يقود بيه ببنتو الرخيس انا يضربني بصح عادي هاني تهنيت منو ذوك نكمل حياتي منين حبستها ونرجع كيف ماكنت ميرال لقديمة الي ضحكة متفارقهاش دير وش تحب .
             النـــــــهايـــــــة
#فريال