قدر مراهقة

الجزء 51

قدر_مراهقة
الجزء 51
روحت على سعدي ووعدي لبست قشي ولميت حوايجي شوي هك دخل هو جاب لفطور عيا فيا كولي محبيتش والله مانكلها حتى والجوع قتلني بصح عزة نفسي وكبريائي مستحيل يخسرو قدامو عيط عليا وسبني وبعدها يجيبلي ناكل والله مليحة هذا يجرح ويداوي معلبالوش بلي الجرح عمرو يتمحى وراح يبقى كذكرى محفورة في دماغي وقلبي ومننساهالوش للممات. هبطنا لتحت ديراكسيو دارهم هبطنا سلمنا عليهم لقيت يماه وختو صغيرة ولكبيرة وجداتو وخالتو والله نعم الناس سلمو عليا قعدنا شوي تقهوينا عندهم. دخل مجد قالنا هيا نروحو _ وين ياك قولتلي نقعدو يامات هنا ونزيد نروح لدار بابا _ايه هيا نروحو ذوك ياك من عاداتنا لازم تزوري داركم في سابع وحنا درنا روطار هيا نديك ذوك وفليل نجي نروحك_علاه خليني نبات خير توحشتهم _المرة الجاية ذوك متصلحش_علاه عليك والله توحشتهم _ميرال افهمي المرة الجاية ان شاء الله نرجعك ليهم. نطقت جداتو شوفي يابنتي حنا عاداتنا كي تروح لعروس تزور اهلها ملازمش تبات المرة لولى حتى لزيارة الثانية باش تقدر تبات_ علاه وينو المشكل _ يقولو مش مليح_اوك معليش. خرجنا جداتو ركبت من لقدام وانا وختو صغيرة من لور ويماه وختو لكبيرة وخالتو ووباباه راحو مع بعض. ديمارا ديراكسيو دارنا فنص الطريق نزل شرا بزاف حوايج وجداتو قالتلو علاه تشقي روحك راهي يماك تكفلت بكلش ووجدت لحوايج من البارح وهي واقفة عليهم ملي عيطت وقولت بلي اليوم نزورو دار ميرال_معليش جدة مكانش مشكل زيادة الخير خيرين _ايه ياولدي عندك الحق. وصلنا لدارنا اصلا مش بعيدة بزاف عليهم ياربي مشية نص ساعة ونكون عندهم، هبطت انا لولى نجري طبطبت الباب فتحتلي ريتال وياعمري شحال توحشتها رفدتها حضنتها وهي تبكي قتلت روحها بلبكا تبوس وتبكي _علاه خليتيني علاه حرام عليك والله توحشتك بدلتيني _والله مبدلتك كشما شفتي واحد يبدل بنتو _ايه كاين _شكون هذا _انت ياكلبة _ريتال عيب عليك والله اني كبيرة وش قولتلك على تطياح لكبار وش قولتلك _صاي منعاودش انت برك قلقتيني. حطيتها درت ورايا لقيتهم كامل يتفرجو فينا ومجد ميت بالضحك ريتال راحت تجري لعندو هزها ويبوس فيها وهي ثاني والله تقول هو خوها مش انا _توحشتك بزاف علاه متجيش عندنا ولا داتك اللفعى وبدلاتك _ههههه شكون هذي اللفعى _ميرال شكون اي عس روحك لا تاكلك اي شريرة انا ديما تضربني بالبشماق_ههههههه اي متخافيش اني نعس في روحي وشكرا ليك كعاد نبهتيني ذوك نعود ناخذ حذري اكثر واكثر _ احسنت يابطل. الي معاه كامل طرطقو بالضحك غير انا وجهي تبدل وقلقت ثم ثم كي شفتها تبوس فيه وتلعبلو بشعرو غرت وهذا الشي من حقي انا وحدي نقدر نبوس ونحضن او راجلي تاعي وحدي. ريتال هيا انزلي عيب عليك _علاه عيب وش درت ياك حتى هو خويا خليني عندو نحضنو توحشتو _عيطت انزلي قولتلك متقلقينيش. ناضت تبكي وتهرنن تڨول عطيتها طريحة خلصت روحها بلبكا. وش دارتلك الطفلة حتى تبكيها هكا _خليها الدلال فزدها، نحيتهالو من يدو ورفدتها الغش عماني ونسيت بلي هذي ختي الصغيرة بنتي وحبيبتي الي نحبها زعفتها مني على جال الكلب هذا لوكان غير جا يستاهل معليش. 
#فريال