قدر مراهقة

الجزء 31

#قدر_مراهقة
الجزء 31
كي قريب نلحقو لاصال حبسو صحابو فنص الطريق ونزلو يشطحو وهو ثاني معاهم حطوه فنص ودارو بيه والبارود داير حالة، انا قاعدة عينيا عيت نحيهم منو ويااا شحال يعرف يشطح دالي عقلي وفي نفش اللحظة غرت محبيتوش يفرح ويشطح ولبنات يتفرجو فيه هو تاعي وحدي ووحدة معندها الحق تشوفو وتكحل عليه. جابو وقت وهوما يشطحو قفلو الطريق لبنات هبطو يتفرجو لكبار وصغار لفامي تاعو كامل ولات تشطح معاه وانا احكموني نطرطق وحدة هزت تلفون وتصور فيه قعدت نتخنزر فيها ومحفظ ملامحها باش من بعد نتفاهم معاها(ذوك تقولو ياك تكرهيه ومتحمليهش وعلاه غرتي، الله غالب انا حاجتي نحبها ليا وحدي وواحد مايدور بيها حتى ونكرها تبقا ليا ومجد من ممتلكاتي الخاصة انا الوحيدة الي نقدر نشوفو ونصورو ونكحل عليه ونسبو ونعيط عليه بصح غيري لا منقدرش نخليها). انا مع تخمامي وقاعدة نطلع ونهبط شكون الكلبة هذي الي راح تاكلو بعينيها تفتح الباب وركب مجد سقسيتو شكون هذيك_وينى وحدة راهم بزاف لبنات_هذيك الي لابسة لكحل تبان جاية للجنازة وماهي ساطرة والو لوكان خرجت عريانة خير _وش دخلك فيها تغطي ولا تتعرا الهاي بروحك_قولي برك شكون هذيك _علاه تحوسي_الفضول قتلني_بنت خالي_امممم متزوجة_لا مزال_عليها راهي معرية هك معندهاش خاوتها يلموها عيب عليها خارجة بنص ميترا وكلش معري وزيد هابطة فنص الطريق تشطح _غرتي _بعيد الشر لانغير من وحدة كيفها اصلا وش عندها باش نغير اذا على العرا كامل نقدرو نتعراو بصح احتراما لوالدينا مدرناهاش _حتى وتحبي تتعراي منخليكش والله نقتلك_خفتك راني نرجف لوكان بغيت نتعرا راني تعريت من زمان مش نستناك تقولي وتنبهني_عندك دارك تتعراي وانا مذابيا مرتي تلبسلي لمعري _بوس عينك باش تصرا قالو تلبسلي مرتي لمعري والله لاشفتها مني_ليام بيناتنا وهي الي تقرر. ديمارا باللوطو ربع ساعة كنا قدام لاصال تهبل، جا عاوني نزلت دارو بينا ليجان ويضربو فالبارود وفليميجان والشطيح داير حالة منظر يهبل مع بدا يطيح الليل والله غاية، انا رجليا طابو ساعة وهوما يشطحو وهو معاهم فرحتو باينة من عينيه للحظة حسدتو على هاذ الفرحة. دخلنا لصال لاقاتني يماه بالتمر والحليب شربتني وشرب مام هو معايا دخلنا تصورنا شوي من بعد هو خرج قالي من بعد ان شاء الله. بعد ماقعدت شوي جات اسيل واسراء عاونوني رحت لشومبرة كانو حاطين فيها حوايجي الي نتصدر بيهم (لعروس عندنا تتصدر نهار حنتها وتزيد نهار العرس وفالحنة تاع راجلها) بديت بالبلوزة الوهرانية من بعد الكاراكو والقفطان والقندورة القسنطينية والملحفة (تصدرت باللباس التقليدي الجزائري كل ولاية ولباسها وانا حاولت نلبسهم كامل بصح مقدرتش تعبت). كملت تصدرت وبقاو حوايج مقدرتش نلبسهم تعبت وجعت من صباح ماكليت والو، دخلت لشومبرة قعدت نرتاح شوي هكا دخلت رنيم وختو لكبيرة دنيا جابولي لعشا. ختو خرجت ورنيم بقات معايا قالتلي شفتك قبيل عيتي توقفي عرفت بلي جعتي_واحد ماقودك تجيبيلي ناكل_كولي برك من بعد ونحكيو. طحت على الماكلة هذيك كي الملهوفة تقول عندي عام مكليت، طحت عليها طيحت الاعمى وكي خلصت زدتلها قرعة كوكا ههههه الي يشوفني يقول منيش عروس بكل. رنيم بقات مخلوعة فيا وحالة فمها مهيش موالفة تشوفني ناكل هكا(ماكلتي قليلة موالفة ننقب برك).خلصت تكيت على ظهر الكرسي وكسلت رجليا شفت ليها لقيتها مخلوعة قولتلها اقفلي فمك لا تدخلك كاش ذبانة وتخمجك كثر ماراكي خامجة_مزالك برك _ووووش مزالني وجهك صحيح ومزالك تهدري لوكان انا منوريش وجهي عام _اففف غلطت وجيت طلبت السماح وقولتلك مش قصدي ومكانش علبالي بواش ناوي يدير _بلعي بلعي خير مانوض نتفك هنا نفرج فيك امة محمد خليني قاعدة ونزضي زيديلي قرعة كوكا _بزايدلك مش مليح تكثري منها_وش دخلك ياك مش بدراهمك جيبي وبلعي انا مقدرتش نوقف رجليا طابو_اصبري ذوك نجيبلك لا تاكليني _انا منكلش لحم الحلوف _صار وليت حلوفة _وكلبة زادة_عندك الحق لوكان ماجيت كلبة مانجري وراك ونحلل ونطلب السماح_زيدي ابكي باش تولي مظلومة وانا الظالمة _منبكيش بصح غاضني الحال_تستاهلي كثر من هك راني شاتية نعطيك طريحة باش يبرد قلبي_نوضي اضربيني وخلي قلبك يبرد ونرجعو كيف ماكنا _متخافيش يفوت العرس ونعطيهالك _معليش وانا راني نستنى غير قوليلي قبل بوقت باش نوجد روحي _طيري جيبي الكوكا ريقي نشف_خلاص بقرة هذي_ختك البقرة _انت هي. خرجت جابتلي الكوكا وجات مطولتش في ساع شربتها وتكيت حانرقد عبيت كريشتي ولازم ندخل فغيبوبة ذوك مفهمتش وش بيا طول اليوم نعسانة.
#فريال