قدر مراهقة

الجزء 87

#قدر_مراهقة
الجزء 87
فقت على صوت طبيبة قاعدة تحكي معاه ماجيت نحل عينيا بالسيف ، حاسة بالدوخة وعندي سطر جيهة كرشي وحاسة بجسمي كامل مخدر. حليت عينيا وتقابلو مع عينيه توقعتو يجي يعيط عليا ولا يسبني ولا يضربني بصح ردة فعلو كانت باردة بزاف راح قعد على الكرسي والطبيبة جات ليا دارتلي لافيزيت وسقساتني شوي اسئلة وانا نجاوب لساني ثقال عليا. قالتلي بلي البيبي مزالو عايش وقلبو ضعيف بزاف اي غلطة مني يروح والرحم تاعي ثاني تضرر شوي من القرفة ، دارت درس على جالها وكيفاه تشربيها هبلتي انت وحتى وسخفتي عليها متكثريش مغرفة تكفيك ، راهي تضرك ومش مليحة لصحتك وصحة بنتك ولوكان زدتي شوي راكي رحتي فيها انت وطفلة صرالك نزيف عندك يومين وانت راقدة . هي تحكي وانا دموعي محبسوش هذا وفقت بواش درت يعني لدرجة هذي قصاح قلبي ورجعت حلوفة نحاول نقتل بنتي بكل بساطة كأنها حيوان ولا حشرة لهاذ الدرجة تبدلت انا الي طول عمري منقيسش حيوان يالوكان بحجرة حاولت نقتل بنتي الي من لحمي ودمي قطعة من روحي بغض النظر على الطريقة الي جات بيها بصح هذا الشيء ميبررش فعلتي وغلطتي. خرجت طبيبة بعد ماوصاتني منتحركش بزاف ومنتعبش روحي حتى تستقر حالة البيبي وناكل دوايا في الوقت واذا نقدر نبقى في سبيطار خير هكا يراقبو حالتي، قبل ماننطق ونقولها هيه قابلة معنديش مشكل ندير اي حاجة على جال بنتي وبلي انا ندمت بزاف ، جاوبها مجد قالها تقعد مكلاه تشاوريها اخدمي خدمتك وصاي. خرجت الطبيبة هو وقف جا جيهتي توقعتو يضربني لاني نستاهل بصح هو سممني بكلامو لاول مرة يديرها كان ديما يسايرني ويحاول يجذبني ليه بصح هاذ الخطرة جرحني بزاف وعندو الحق نستاهل. قالي ياريت ماتت الطفلة وتهنات لانها متستاهلش تجي لهاذ الدنيا يماها تحاول تقتلها بدم بارد كأنها شي حشرة قدامها وفوق منها تعيط وتقول بنت حرام كبولة وتهينها وهي معندها حتى ذنب ملائكة صغيرة مزال ماجات لدنيا هذي وبدات معاناتها ياترى نهار تزيد وتجي وش راح ديريلها تضربيها ولا ترميها من البالكو ولا تسمميها كيما سممتيها ذوك . كل كلمة يقولها دموعي ينزلو معاها ول مرة منردلوش الهدرة ولا نسبو اصلا بأي وجه نحكي عندو الحق انا انانية خممت في روحي ونسيت بنتي صحيح هو غلط بصح صحح غلطتو وانا بدل مانعطي فرصة لزواجنا ونخليه ينجح باختجي بنتي وتتربى فجو عائلي مناسب ليها رحت خربت الدنيا وذوك راني نستنى في وش راح يديرلي وكل حاجة تجي من عندو قابلة منها لانو مجروح بزحوهذا باين من عينيه اول مرة نشوفو بهاذ الحالة موالفة نسبو نطيحلو وهكاك يبقى مبرد اعصابو بصح المرة هذي قستو في الوتر الحساس الي هي بنتو حبيبة قلبو تعلق بيها قبل ماتجي ومتأكدة بعد ماتجي راح يتعلق اكثر واكثر وممكن حتى هي  تحبو كثر مني، وهذا الي صرا.
#فريال