قدر مراهقة

الجزء 91

#قدر_مراهقة
الجزء 91
فاتو يامات عادي انا من فراشي منوضش غير للضرورة مجد شايط بين خدمتو وبيني انا منقص عليا والو الي نبغيها تجيني للفم بش نقولكم سامحتو ونسيت كلش منعرف حاسة روحي مبدلة بزاف. عيطتلي ختي قالتلي اذا تجي تعاونيني عرسي مبقالوش بزاف ياربي شهر قولتلها نشوف مع مجد ونقولك. كي سقسيتو قالي هيه روحي معليش اصلا انا عندي خدمة ومضغوطة ومنقدرش نبقى معاك لهيت خير في وسط اهلك يهتمو بيك _ بصح كيفاه ندير على جال كرشي راهي بدات تخرج وباينة طول _ عادي قوليلهم راكي بالحمل مافيهاش عيب _ ولوكان يقولولي شحال عندك من شهر كيفاه ندير _ شوفي اي ساهلة خلاص انت الي مكبرتها انا وياك متزوجين وانت بالكرش وصاي والي سقساك قوليلو عندي 3 شهر ديجا انا نخبرهم هكا تروحلك الحشمة. رفد تليفونو عيط ليماه قالها بلي راح يولي اب وبلي انا بالكرش عندي 3 شهر وزاد عيط لماما وفوتهالي قالي تخبريها انت ولا نخبرها انا وعلبالي بيه يديرها ميحشمش. حكيت معاها وكي قولتلها ناضت تزغرت وتباركلي وعندك على روحك مترفديش الثقيل وارواحي عندي نهتم بيك حتى تكملي فترة وحمك لثم مكانش الي يقوم بيك _ ان شاء الله اماما اصلا راني جاية باش نعاون اسيل في العرس تاعها _ ايه ارواحي وزيد مور عرس ختك رايحين نديرو فيونصاي لخوك وائل وثاني خليل بغا يخطب _ قولي والله شكون حايخطب _ باينة شكون اسراء _ كانت باينة تكمل كيما هك الحب يقطر من عينيهم وانتوما مفقتولهمش _ اي وراسك غير كنت فايقة بيهم وسكت منحبش ندخل _ صح عندك الحق ومع خليل جاي منطوي بزاف تاع راسو متقدري تعرفي لا فرحان لا زعفان _ شتي انتوما صح خاوة جيتو من نفس الكرش بصح كل واحد وطبايعو _ طبعا اكيد واحد ماهو كيفي اصلا شكون يلحقني انا كامل _ واحد مايلحقك في المشاكل وتشراك الفم _ حرام عليك تقولي عليا هك _ صاي متزعفيش صغروتني _ منيش صغرونة راني كبرت _ صح عندك الحق كبرتي وراح تجيبي صغرون ولا صغرونة _ ايا ماما نخليك باي _ هاي حشمت الطفلة باي اتهلاي في روحك. كوبيت على ماما ومديتلو تليفونو، قولتلو يخىجني نشري شوي قش لانو الي عندي كامل ولا مزير على كرشي سمنت بزاف وهو كيف عوايدو مرفضش وداني جبت عشية كامل وانا ندور شريت قنادر عراض ومستورين وزدت شوي حجابات وفتنا تعشينا برا وروحنا. لغدوا منو وصلني لدارنا وناض مفاتش قالي مشغول بزاف ياربي مانرجع نفري شغالاتي وصح اليامات هذو كلش كاح عليه تضغط بزاف وانا الي زدت هلكتو معايا. دخلت لدار رحبو بيا ماما غير تبوس وتحضن اسيل نفس الشيء خاوتي وبابا ملقتيهمش كانو برا ريتال مشنفة ورافدة شنايفها عليا قالتلي متحشميش بدلتيني ورحتي مبغيتي تزوريني وتلعبي معايا وناضت تبكي وهي مشعالة تزيد فيها بزاف تكون حاجة صغيرة تكبرها وتضخمها ترجعها كبيرة وماتسكت غير بالمحاولة.
#فريال