قدر مراهقة

الجزء 95

#قدر_مراهقة
الجزء 95
فاتو ليامات بسرعة كبيرة محسيت بيهم خلاص مع جريات والتوجاد وزيد لوحم هلكني راسي بالسيف مانهزو مجد في الفترة هذي كل سمانة يجي يطل عليا ويرجع لخدمتو يخرجني ندور يديني لطبيبة، علاقتنا تحسنت بزاف ولينا مقربين من بعض. اليوم الحنة تاع ختي درنا فلاصال كلش وجدوهم هوما انا مدرت والو عيت نوقف كرشي خرجت دخلت لشهر الخامس واحد مافاقلي كامل قالولي من الماكلة سمنتي نظل نبلع الي يفوت عليا يوكلني ماما بابا خاوتي ختي مجد ردوني بقرة نهار كامل وانا نعلف وبسلامتي شهيتي مفتوحة تعمرت ورجعت دبدوبة تاع الصح الحمل خرج عليا زدت زينت كل مانحكي مع مجد يقعد يتغزل فيا حتى نذوب خلاص ولا يأثر فيا أي كلمة منو تحيني. لابسة غو بسواري فلكحل جاية غونفلي( لانو كرشي كبيرة منحبش نجيب الشبهات لعمري) مشقوقة على الجنب وعندها فتحة كبيرة جيهة الصدر لبست صندالة دومي طالو ياربي مانقدر نمشي بيها رجليا يوجعوني. جاو اهل مجد كامل يماه خالتو عمتو جداتو دار رنيم كامل سلمت عليهم وجداتو ويماه داروني في نص كيف العادة يبوسو ويحضنو وسقساوني على حملي تعبت ولا لا وقالولي نجي عندهم نقعد يامات كي يخلاص العرس قبلت نروح لاني معندي مندير وقرايتي حبستها كيما عيا معايا مجد نرجع محبيتش قولتلو غير الليسي منرجعلوش كرهتو وزيد بكرشي خارجة هك، راح سجلي نكمل نقرا بالمراسلة ورنيم كي سمعت بلي حبست حتى هي حبست وسجلت معايا ووائل جاتو كيف لعسل على قلبو مذابيه تبقى في دار ميحبهاش تخرج يغير يموت. فاتت الحنة تاع ختي بالطبع والشان كيف تاعي بعد مانقصو عليها والو تصدرت حناولها تصورنا شطحنا فاتت تهبل خلاص هي الفرحة باينة من عينيها دات الشخص الي تحبو حاجة باينة تفرح. لغدوا منو رحنا للحمام انا واسيل اسراء رنيم وبنات خالي وخالاتي درنا حفلة لثم دوشنا وروحنا ، فليل قعدنا نقصرو في ربعة رنيم اسيل اسراء وانا نحكيو ونضحكو حتى لحقنا لموضوع الزواج ولفراش كامل يهدرو تقول مجربين غير انا زي الاطرش في الزفة معلبالي بوالو تقول ماني متزوجة ولا رافدة بيبي في كرشي. كي شافوني ساكتة بداو يطلقو في غمالتهم عليا اي حشمة اي موالفة كيفاه ديري قوليلنا ولا حشمتي ياك مش من عوايدك تحشمي كيفاه حتى. كي شفتهم بداو يقلقوني رفدت تليفوني وطلعت لسطح الجو بارد بصح يريح النفس عيطت لمجد لقيتو يسوق قالي راني في طريق جاي كشما حبيتي نجيبلك معايا _ لا مبغيت والو عيطتلك برك _ اوك معليش ذوك منقدرش نحكي كي نوصل ونعيطلك _ باي.
#فريال