قدر مراهقة

الجزء 80

#قدر_مراهقة
الجزء 80
قعدت انا وياه حتى وصل وقت لغدا راح جابلنا تغدينا انا غير ننقب خفت ناكل ونتقيا كلش والله فات عليا عذاب اليامات هذو غير الدوخات ولقيا. مجد جا داخل يعوم عيا فيا نروح معاه كي محبيتش قعد مدخلش قالي منخليكش وحدك، بقينا مقصرين انا وياه كيما زوج مخطوبين وحايتعارفو . عيطولو من الخدمة وقالولو لازم تجي منعرف وش صرا وغير هو الي يقدر يحل المشكل، كوبا عليهم وقالي شوي هك ونرجعلكم ياربي ساعتين مانطولش واذا حابة هيا نروحكم وغدوا نرجعكم رفضت لانو رنيم عاجبها الحال ومن الما مخرجتش جرانة محطوطة. راح مجد وشوي هك جات رنيم قعدت معايا سقساتني وين راح مجد قولتلها عيطولو من الخدمة صرا مشكل وهو راح ميطولش _ معليش هيا دخلي معايا _ لا مكلاه ندخل كلش يتفصل فيا شوفي حالتك انت كيفاش _ عادي واحد ماهو لاتي بيا يخليو المعريات الي هنا كامل ويشوفو ليا _ معليش براحتك . حنا هكاك وتفوت علينا بنت خالتو جات سلمت علينا وقعدت تقصر مع رنيم ومام انا عجبتني عقليتها تبان ظريفة وخفيفة في نفس الوقت محبيتش نحكم عليها من طريقة لبسها لانو المظاهر خداعة (كانت لابسة دوبياس فلكحل ودور بيهم عادي بحكم الولاية هذي كلش فيها مباح). قعدت تقصر معانا سقساتها رنيم معامن جيتي واذا داركم راهم هنا فجأتني كي قالتلها جيت مع صاحبي (حبيبها ولا عشيقها ولا منعرف وش ممكن نسميه لانو علاقتهم فلحرام معندها حتى فايدة وراح تجيب غير المشاكل)، نقطت انا قولتلها ووالديك كيفاه خلاوك تجي لهنا وحدك _ عادي كذبت عليهم وقولتلهم راني عند صاحبتي وجيت لهنا عندي سمانة _ ومتخافيش كشما واحد يشوفك هنا مجد مثلا معندوش بزاف ملي ناض، هي سمعت اسم مجد ولونها تخطف كانت حاتوقف وحكمتها رنيم قالتلها او راح عندو خدمة ميجيش ذوك ، كي قالتلها هك باش قعدت _ علاه خفتي كي سمعتي اسم مجد _ شوفي نقولك حاجة مجد قد ماهو مليح قد ماهو قبيح _ وانت منين تعرفيه _ غير مكلاه تبداي تغيري انا وياه تربينا مع بعض تقريبا عشت عندهم بحكم ماما وبابا يظلو خدامين كنت نقعد عند خالتي وحتى كي كبرت بقيت ندور عليهم _ اصلا ماغرتش خلاص راجلي وعلبالي وش يسوا مستحيل يخمم يشوف في غيري _ في هذي عندك الحق خويا مجد عاقل وخاطيه النسا واذا خيرك انت باش تكوني مرتو فمعناها صاي لقى فيك وش يحب ومش حايبدلك هو عكس لفامي تاعنا كامل الي يظلو مع نسا هو من الخدمة لدار حتى كي يسهر معاهم ميطولش ويروح _ علبالي بيه _ ايا مليح. سقساتها رنيم وش دير هنا سمانة كامل وهي ماصدقت سقساتها بدات تحكي وتفتاخر فوقها وعاجبها الحال مبقالهاش وتنوض تزغرت على انجازاتها وجعتلي قلبي لدرجة هذي بلادنا تخربت ولبنات خرجو على الطريق ولا يشوفو في العلاقات المحرمة حاجة كبيرة وتستحق الافتخار.
#فريال