قدر مراهقة

الجزء 97

#قدر_مراهقة
الجزء 97
فوتنا يامات شابين في دارهم جاو خواتاتو كامل خاوتو ونساهم ولاد خاوتو تلمينا كامل لثم حتى من رنيم وجات. فنهار نخرجو ندورو ونحوسو ومع كان الدخول المدرسي قريب لبنات كانو يخرجو يشريو القش لولادهم وانا ورنيم نخرجو معاهم نوجدو لفيونصاي تاعها مبقالوش بزاف ياربي سمانة. في الفترة هذي ماما راحت هي وعماماتي وخالتي خطبو لخليل وتفاهمو يديرو لفيونصاي بعد 15يوم هذاك هو يخلصو من وائل يبداو يوجدو لخليل. علاقتي بأهل مجد مليحة يماه متخليني نقيص والو حتى من خواتاتو حاطيني كيف ختهم كي يشوفوني مريضة يبقاو معايا حتى يروح مجد وينوضو. مجد انا وياه متفاهمين ديفوا نتقابضو ولا نقولو انا نتبلاه نغير نموت خصوصا كي نخرجو مع بعض وتشوف ليه كاش وحدة نهار هذاك يفوت عليه كحل منسكتش حتى ينوض يسب ويعيط باش نخطيه. قاعدة فوق الكرسي نتفرج في رنيم ووائل كيفاه فرحانين ويشطحو مع بعض اليوم لفيونصاي تاعهم الناس كامل فرحانين حتى من اسراء وخليل دارو معاهم تفاهمو يتلمو خير هكا ميتعبوش ماما عيات وحدها توجد. قراو الفاتحة دفعو المهر دخلو خاوتي معاهم غير مجد كل واحد لبس خاتم لمرتو قيمو لابياس مونتي تصورنا كامل وشطحنا انا بحكم كرشي عياتني دخلت لشهر السادس قعدت غير نتفرج منقدرش نشطح . فات الفيونصاي تفارقنا كل واحد لدارو اسيل راحت مع راجلها انا ومجد رجعنا لدارهم كنا معولين نباتو ولغدوا نرجعو لدارنا قررت نمد فرصة لزواجنا ونعيشو كأي متزوجين نمدلو حقوقو ونحبس تشراك الفم ونبدا نوجد حوايج لبنتي مبقالهاش وتجي لدنيا هذي ياربي 3 شهر ونهزها بين يديا. فقنا على صوت عياط في دار يبان كاش حرب قامت درت ورايا لقيت مجد ناض حتى هو مخلوع ، زرب لبس قشو وفات لدوش يغسل وانا ثاني لبست قشي غسلت وجهي وهبطت نجري لتحت لاحڨاتو وهو يعيط عليا بعقلك لاطيحي امشي في عقلك _ انت الي راك تجري حابة نلحڨك _ ياربي على المصيبة صباح ربي بعقلك برك متنسايش بلي كرشك سابقاتك ،انا كي شغل فقت مع روحي اهم شيء بنتي مكلاه نجري خلي تخلى بعد نهبط بالشوي. لقيت دانيا بنت خالة مجد طايحة في لرض وجها مشوه من كثرة الضرب شعرها واقف قشها مقطع  يديها مسلوخين حالتها حالة تبان دات كاش طريحة ولا مرمدها كاش كلب. لعجوز هبطت عندها حضنتها وهي تبكي نرجس جابلتها غطا ورماتو عليها ، خاوة مجد يتعايطو ويسبو ويتحلفو انا مافهمت والو عيط عليهم مجد فرد عيطة سكتو كامل وبقاو يشوفو فيه لعجوز زربت حضنت بنت ختها كأنو خايفة منو كشما يديرلها وعلى حساب خوفها باين الدعوة مخلطة بكراع الداب وهي دارت كاش زبلة.
#فريال