قدر مراهقة

الجزء 27

#قدر_مراهقة
الجزء 27
كليت حتى شبعت والنعاس بدا يحكم فيا نحب برك نحط راسي ونرقد مام في وسط الحس هذا كامل جاتني عادي المهم نرتاح شوي. جات اسيل واسراء ومعاهم رنيم ثاني جيت نحاوزها من بعد تراجعت منيش حابة يشكو فينا وهوما يعرفوني منستغناش عليها وهي كلش في حياتي وراح يقولولي وعلاه تبدلتي وش دارتلك ولثم يبداو ينشنشو وراح يلحقو لفضيحتي ولثم نخسر كلش، عاونوني بدلت لبست كاراكو فالغوج نموت على لون هذا ودرت خيط الروح الجزائري(مكلاه تجي وحدة وتقولي مهوش جزائري) وخرجت المرة هذي نفرق فالبوقالات على لبنات الي مش متزوجين زدت تصورت شوي ورجعت لشومبرة مهلوكة تاع صح راح نتغاشا بصح لازم نكمل مزالي مخلصت السهرة، لبست قفطان وخرجتني المرة هذي رنيم وهي كيف العادة تطلب فالسماح وتبوس وتحضن وانا غير ساكتة قولتلها في قلبي غير اصبري يكمل العرس هذا تاع لخلا ونوريلك كيفاش الاعتذار يكون وانا كيفاش راح نديرلك. صورت شوي وجات جداتو وجداتي راح يحنيولي (من عاداتنا لكبير فالعائلة هو الي يحني لعروس وهوما خيرو جداتو وجداتي) بداو يخلطو فالحنة ولبنات دارو عليا وهازين شموع في يديهم ويغنيو معاهم(صلو على محمد صلى الله عليه صلو على نبينا والصلاة عليه..... جابو طبق الحنة والسكر والشمعات صلو على محمد صلى الله عليه جاو طاكسيات من العيد تبااات جاو طاكسيات من العيد تبات العروسة بالبينوار تضوي كيف شمعة). وجداتي في زوج (جداتو وليت نعيطلها جدة مجاياش نقولها خالتي وهي كبيرة وطيوبة بزاف ربي يحفظها وقفتها معايا جامي ننساها) خلطو الحنة بالمزهر (ماء الزهر هكا يقولولو بصح انا لازملي ماء النسيان باش ننسى وش صرالي اما الزهر يوصل ليا ويهرب) خلطوها وجابو زوج ويزات تاع ذهب (جايين كيف الدائرة الي يتندارو فلمحزمة) حطوها في كف يدي وزادو فوقها الحنة وربطولي يدي باش منتوسخش وزادو دارو لبنات الي بغاو يتزوجو بداو برنيم قالولها لازم تلحقي صاحبتك وهي جاتها على قلبها ميتة على زواج.جابولي زوج مقايس كبار يعبيو العين (هو مخلا حتى حاجة في خاطري والذهب جابلي بزاف وغير الحاجة الغالية). نضنا شطحنا وغنينا الليلة هذيك قعدنا ل2 باش روحنا مام هوما قعدو معانا عاجبهم الزهو هذاك والشطيح قلبناها وانا ثاني نضت نشطح معاهم نسيت شوي همي وڨاع التعب هذاك تقول ماني انا الي كنت نندب على الرقاد ونقولهم خليوني نرقد راني تعبت ههههه،بصح مزدت لبست والو تعبت قولتاهم خليوهم لنهار العرس ونتصدر بيهم . كملنا روحنا وصلت نحيت قشي ورقدت هكاك طلقت روحي على كرشي ماحسيت بوالو حتى غطاتني اسيل.
#فريال