قدر مراهقة

الجزء 36

#قدر_مراهقة
الجزء 36
فقت الصباح على صوتو وياربي شحال حنين لوكان يبقى ينوض فيا هك والله مانوضها، حط يدو على شعري ويلعب بيه حسبت روحي نحلم_ميرال حبي نوضي_ماما خليني نرقد _انا مش ماماك _اففففف خليوني انمي حتى فاحلامي خرجلي الكلب هذاك _شكون هاذ الكلب_شكون غيرو مجد هذاك الرخيس. نحكي بالنوم تخلطت عليا انا هكا كي نتعب نولي منفرقش بين الواقع والحلم.ميرااااااال، عيط عليا فرد عيطة تخطفت من بلاصتي ووقفت _باسم الله الرحمن الرحيم وش الصباح هذا هكا تنوضو انتوما لعباد من رقاد وش قلة الادب هذي وينو احترام النائم وينهم حقوق الانسان وينو حق الطفولة  والمرأة _بلعي برك كشما بقالك طفولة راكي تزوجتي ذوك_اذا شايف روحك شرفت هذا الشي يخصك اما انا مزالني صغيرة بصغري ولعمر قدامي وحاية لدنيتي مش كيفك بينك وبين لقبر شبر _بلعي بلعي عليا هيا نوضي وجدي روحك داركم قريب يجيو ياربي نوصلو _مزال ميجيوش حتى ل13 _راهي 11الالة ياربي توجدي روحك واذا حابة تروحي هكا مكشردة معنديش مشكل _حتى انا معنديش مشكل يقولو مرت مجد مكشردة ومش قايمة بروحها ويضحكو عليك_خليهم يضحكو ميهمنيش ومذابيا واحد مايشوف في مرتي ويشكرها _ايه انت تحب ديما تعفسني وتخليني لخرة فيهم. بعد بعد خليني نوجد روحي وفوتني للحفافة وجيبلي نفطر راني جعت من البارح ماكليت والو _بالشوي على روحك لا يطرطقلك عرق_ان شاء الله يطرطق ونموت نتهنى منك_تطفر فيك غير انت _علبالي اصلا انتوما الرجال معندكمش قلب تدفنو لمرا من تروحو تحوسو على غيرها من تبدلو النسا كي التقاشر ربي يجيبهالكم وش نكرهكم ڨاع _معليش اكرهيهم كامل وحبيني انا وحدي _تحبك حبة وتعضك كلبة مكلوبة مجروبة _لحمك كلاك واقيلا. سكت وخليتو رحت لدوش درت روتيني وخرجت عندو لقيتو جابلي حليب وجي وكرواسو وميلفاي (اصلا وش من فطور ذوك الناس تتغدا ههههه) وقهوة ليه جريت نحيتهالو وشربتها قاعد يتخنزر فيا _القهوة تاعي مش تاعك_علبالي بصح بغيتها_ياك انت متشربيش لقهوة _كنت منشربش ذوك وليت نشرب_تبدلتي _تبدلت بزاف يوم واحد بدلي حياتي وقتل ميرال لقديمة وخلق هذي الي راهي قدامك_مش راح تنساي_مستحيل ننسى وش درت فيا _نطلب من ربي يحنن قلبك عليا _وانا نطلب ربي يبعدك عليا_غير الموت الي راح تبعدني عليك _ان شاء الله تموت ونتهنى_ونهون عليك _كيما هنت عليك وغتا. صبتني_خلاااص اربي خلاااص غلطت وعتارفت بغلطتي وطلبت السماح وراني نقولك بلي مكنتش فدار وعي انت ستفزيتيني بكلامك وأي واحد كان في بلاصتي كان راح يدير كيما هكاك ولا كثر _تسمى راك تقول بلي انا الغالطة وبسبابي صرا كلش _مش هكاك ياربي وش طفلة هذي راح طرطقلي عرق في راسي وعلاه متفهميش، حط صبعو على راسي وقالي هذا وش فيه علاه يابس هكا _فيه حمار راقد يشبهلك _ضحك وياربي ضحكتو كيدايرة  شحال شابة تذوبك، بقيت ساهية في ضحكتو حتى حبس وشاف فيا _عجبتك_وشنو _ضحكتي، بدون شعور قولتلو هيه ضحكتك تهبل خصوصا كي تغمض عينيك تقول نحكمك نعضك_لدرجة هذي _واكثر_ديريها_وش ندير _ياك حبيتي تعضيني هاني قدامك.
#فريال