قدر مراهقة

الجزء 105

#قدر_مراهقة
الجزء 105
فاتو يامات وانا ومجد رجعنا زي المتزوجين عادي فنهار يخرجني ندور ونمشي شوي وفليل او باين ميطلقنيش كي طفل صغير الي مدولو لعبة جديدة وهو فرحان بيها تظل بين يديه. كل يوم نتعلق بيه اكثر من الي قبلو كيفاه يعاملني بحنية ويساعفني وحتى كي نتعب هو يدوشني يوكلني خصوصا فالفترة اللخرة ولين نتعب بزاف كرشي خرجت وليت نخطي خطوة بشق النفس. اليوم نضت روطار فت دوشت ورحت فطرت وش هك لحقني مجد فطر ولبس قشو قالي اليوم خارج عندي شوي شغالات نكملهم ونرجع. هو خرج وانا بقيت ندور فدار حكيت شوي مع ماما وزدت اسيل ختي قالتلي راني نتوحم باركتلها وتمسخرت شوي بيها _ ياك قولتي العام لول تجيبيه غير تحواس وتقلاش مع راجلك وفي العام ثاني باش تخممي تجيبي لولاد _ الله غالب مش بيدي رفدت من ليلتي مدرتش احتياطاتي. هي تقول هك وانا نطرطق بالضحك ظهرنا كامل نرفدو من ضربة لولى الله يبارك علينا سارفيس رابيد ، انا نضحك وهي قريب تهبل تعيط وتسب فيا اعصابها تلفو ربي يعين راجلها عليها باين رايحة تهبلو معاها. كي شفتها هكاك تاكل في روحها كوبيت مش ناقصني عياط وحس تروح تقود. فت للكوزينة بغيت ندير لغدا لقيت الكوكوط لفوق منقدرش نوصلها لازم كرسي، رحت جبت الكرسي وطلعت فوقو بالسيف كرشي كبيرة انا مع نلوح يدي باش نجبدها ويتقلب بيا الكرسي ونجي طايحة على ظهري روحي طلعت عيطت فرد عيطة من لوجع هذاك الي حسيت بيه. جيت نوقف مقدرتش السطر كل مايمشي ويزيد بقيت نتلوى فلرض وحدي التليفون بعيد عليها بقيت ندعي ونطلب من ربي يحميلي بنتي ويزرب يروح مجد لدار. بقيت تقريبا ساعة وانا على الحالة هذيك طاقتي كامل راحت مع لعياط. دخل مجد يجري كي شافني طايحة فلرض نزل عندي وحكملي وجهي _ وش بيك وش صرا عيطلي العساس قالي كاين عياط في دارك اجري شوف وش صرا غير الخير علاه راكي فلرض انطقي . الوجع عڨابي وهو يندب فوق راسي وش زدتي درتي قولي وش شربتي ثاني انت متتربايش اه عيت مانوريلك ونفهمك بلي هذا مكتوب وحرام عليك تآذي البيبي معندوش دخل في الشي الي صرا مشكلتك معايا انا انتقامي مني مش منو هو او قطعة منك انت ثاني اي بنتك ارب العالي كشما كاين ام تآذي وليدها اه قولي راني نحكي مع ر**_مجد تعيش راح نموت والله مدرت حتى حاجة المرة هذي مش بقصدي والله مكنت ناوية نآذيها طلعت نجيب الكوكوط كانت لفوق والكرسي زلق بيا _وش مطلع عزرينك ياك قالتلك الطبيبة متتحركيش بزاف وانت فيك دود متقدريش تحكمي فرد بلاصة لازم طيري وفلخر تجيبيها في نعيك. نضت نبكي ونعيط الوجع كل مايزيد ويقوا وهو مزال يندب ويعيط لوكان نقولكم زدت عليها شوي ومش هذاك الوجع الي يقتل بصح حبيت نتسيتت باش يسكت ويخليني لانو من قبل نبهني وقالي لوكان كشما نزيد ندير ونآذي البيبي يجيفني. بقا ياكل في روحو كي شافني نبكي راح جابلي حجابي وخماري عاوني لبستهم كي جيت حانوقف لقيت لرض مشمخة انا خلعت مت يبالي بلت تحتي من الخوف وهو كي شاف اللرض مبلولة هكاك قالي رايحة تولدي _ كيفااااه وين نولد في نعيك ياك قالتلي طبيبة مزال سمانة _ ياووو بلعي فمك عليا شوفي الماء تاع راس البيبي او هبط اسكتي. انا قاتلة روحي بلبكا شوي من الخوف تاع زيادة وشوي من الوجع الي كل مايزيد يقوا ، راح جابلي فاليزة تاعي بعثتهالي ماما وحظتلي كلش بحكم هذي اول ولادة ليا منعرف فيها والو . خرجنا نمشيو بالشوي كي شافني عيت ولا عيط للعساس هبط الفاليزة وهو هزني ركبني فلوطو ديراكسيو الكلينيك، في طريق قوا عليا السطر نعيط بأعلى صوتي ونضرب فيه ايما خيتي وشنو هذا السطر الموت شفتها مكنتش حاسبة الولادة صعيبة هك بصح الاصعب منها هو انك تربي وتسهري مع بنتك وتقومي بيها وانا للآسف مقدرتش عليها.
#فريال